ម្ចាស់ផ្ទះបានអុជធូប ហើយនាំប្តី ប្រពន្ធទៅដេកផ្ទះកូនដែលជាប់របងគ្នា ដោយដោតឌុយម៉ូទ័របូមទឹកទុកចោល បណ្តាលឱ្យទុស្សេក្លាយជាអណ្ដាតភ្លើងឆាបឆេះផ្ទះម៉ត់ត្រឹមមួយរំពេចតែម្តង បង្កឱ្យមានការភ្ញាក់ផ្អើលពេញភូមិ
ខេត្តសៀមរាប ៖ បើតាមសេចក្តីរាយការណ៍បានឱ្យដឹងថា ម្ចាស់ផ្ទះបានអុជធូប ហើយនាំប្តី ប្រពន្ធទៅដេកផ្ទះកូនដែលជាប់របងគ្នា ដោយដោតឌុយម៉ូទ័របូមទឹកទុកចោល បណ្តាលឱ្យទុស្សេក្លាយជាអណ្ដាតភ្លើងឆាបឆេះផ្ទះម៉ត់ត្រឹមមួយរំពេចតែម្តង បង្កឱ្យមានការភ្ញាក់ផ្អើលពេញភូមិ។ ហេតុការណ៍នេះបានកើតឡើងនៅថ្ងៃទី១៩ ខែកុម្ភៈ ឆ្នាំ២០២៣ វេលាម៉ោង២១និង៣០នាទីយប់ ស្ថិតនៅភូមិគោកចាស់ ឃុំសសរស្តម្ភ ស្រុកពួក ខេត្តសៀមរាប។
បើតាមលោកវរសេនីយ៍ឯក ទេព ពុំសែន អធិការនគរបាលស្រុកពួក បានប្រាប់នៅវេលាម៉ោង១៧និង៣០នាទីល្ងាច ថ្ងៃទី២០ ខែកុម្ភៈ ឆ្នាំ២០២៣នេះថា ម្ចាស់ផ្ទះខាងលើមានឈ្មោះ ក្អោប រឹម ភេទប្រុស អាយុ៦១ឆ្នាំ រស់នៅភូមិ-ឃុំកើតហេតុខាងលើ ដែលមានផ្ទះទំហំ៨ម៉ែត្រ×៧ម៉ែត្រ ថ្មក្រោមឈើលើ ជញ្ជាំងលើក្តារ ប្រក់សង្កសី។
តាមការបំភ្លឺរបស់ឈ្មោះ ខិម សំអឿន ភេទស្រី អាយុ៥៧ឆ្នាំ ត្រូវជាប្រពន្ធ បាននិយាយរៀបរាប់ប្រាប់សមត្ថកិច្ចឱ្យដឹងថា មុនពេលកើតហេតុប្រហែលជាង១ម៉ោង ខ្លួនគាត់បានឡើងទៅលើផ្ទះ ដើម្បីអុចធូប ក្រោយមកក៏ចុះមកដេកនៅផ្ទះកូនច្បងវិញ (ខាងជើងជាប់របងគ្នា)។ ហើយនៅមុនចេញទៅដេកនោះ គឺគាត់ជាប្រពន្ធបានពិនិត្យមើលភ្លើងធូបអស់ហើយ មិនអាច ឆេះមកពីធូបបានទេ។ អ្នកស្រីបន្ថែមទៀតថា មួយរយៈមុន ផ្ទះរបស់គាត់ធ្លាប់បានដោតភ្លើងប្រើម៉ូទ័របូមទឹកទុកចោល ហើយលោ.តឌីសង់ទ័រម្តងរួចមកហើយ ប៉ុន្តែរកមិនឃើញ (មិនដឹងឆ្លងកន្លែងណា)។
អធិការនគរបាលស្រុកពួក បានបញ្ជាក់ថា ក្នុងពេលកំពុងកើតហេតុនោះ កម្លាំងប៉ុស្តិ៍នគរបាលរដ្ឋបាល និងប្រជាការពារ ព្រមទាំងប្រជាពលរដ្ឋបាននាំគ្នាជួយសង្គ្រោះ និងពន្លត់តែមិនរលត់នោះទេ។
លោកបញ្ជាក់ទៀតថា ហើយករណីឆាបឆេះផ្ទះពលរដ្ឋនេះ ត្រូវបានរថយន្តពន្លត់អគ្គិភ័យរបស់អធិការនគរបាលស្រុកពួក បានចេញអន្តរាគមន៍ជួយបាញ់ទឹកពន្លត់អស់១គ្រឿង ហើយប្រាស់ទឹកអស់ចំនួន១គ្រឿង ទើបអណ្ដាតភ្លើងរលត់ទៅវិញទាំងស្រុងនៅវេលាម៉ោង២០និង៤៥នាទីយប់។ ហើយដោយសារកន្លែងកើតហេតុ គឺឆ្ងាយពីទីរួមស្រុកពួក មានចម្ងាយ១៦គីឡូម៉ែត្រឯណោះ។ ក្នុងអគ្គិភ័យខាងលើនោះ ក៏បានបណ្តាលឱ្យខូចខាតផ្ទះទាំងស្រុង និងសម្ភារៈក្នុងផ្ទះដែលសរុបជាទឹកប្រាក់ប្រមាណជា២០០០០ដុល្លារសហរដ្ឋអាមេរិក។ ចំពោះមូលហេតុវិញ គឺបណ្តាលមកពីទុស្សេឆ្លងចរន្តភ្លើង ធ្វើឱ្យឆាបឆេះពីខាងលើផ្ទះមកមុន។
គួរបញ្ជាក់ថា បច្ចុប្បន្ន ផ្ទះពលរដ្ឋដែលឆេះអស់ទាំងស្រុងនោះ បើគិតជាទឹកប្រាក់គឺប្រមាណជា ២០០០០ ដុល្លារគត់ នេះបើតាមសម្តីរបស់សមត្ថកិច្ច៕
ចែករំលែកព័តមាននេះ