អកុសល គ្រោះមកដល់ ក៏ត្រូវអស់ជីវិត..!
រាជធានីភ្នំពេញ ៖ បុរសម្នាក់ស្រវឹងស្រាជិះម៉ូតូឌុបប្រពន្ធ និងកូនទៅបុកគូទរថយន្តមួយគ្រឿងបណ្តាលឱ្យកូនរងរបួសបែកមាត់
រាជធានីភ្នំពេញ ៖ បុរសម្នាក់ស្រវឹងស្រាជិះម៉ូតូឌុបប្រពន្ធ និងកូនទៅបុកគូទរថយន្តមួយគ្រឿងបណ្តាលឱ្យកូនរងរបួសបែកមាត់ និងពកក្បាល ភ្លាមនោះស្ត្រីជាប្រពន្ធបានលើកកូនជិះម៉ូតូឌុបដឹកកូនទៅព្យាបាលនៅពេទ្យហើយទុកឱ្យប្តីជិះម៉ូតូតែម្នាក់ឯងតាមក្រោយ ខណៈនោះបុរសជាប្តីជិះប្រញាប់ទៅមើលកូននៅមន្ទីរពេទ្យបានបើកឆ្លងផ្លូវទៅបុករ៉ឺម៉កម៉ូតូមួយគ្រឿងទៀតបណ្តាលដួលបោកទៅនឹងថ្នល់ដាច់ខ្យល់ស្លាប់ភ្លាមៗយ៉ាងអាណោចអាធម៌ ហេតុការណ៍ដ៏រន្ធត់នេះបង្កឱ្យមានការភ្ញាក់ផ្អើលឡើងកាលពីវេលាម៉ោង៨និង៣០នាទីយប់ ថ្ងៃទី១៥ ខែសីហា ឆ្នាំ២០១៧ តាមបណ្តោយផ្លូវ២០១១ ស្ថិតក្នុងសង្កាត់ក្រាំងធ្នង់ ខណ្ឌសែនសុខ ។
ជនរងគ្រោះដែលស្លាប់មានឈ្មោះ ខុន ពិសិទ្ធ ភេទប្រុស អាយុ៣២ឆ្នាំ មុខរបរមេការដំឡើងគ្រឿងសង្ហារឹម ស្នាក់នៅភូមិច្រេះ សង្កាត់គោកឃ្លាង ខណ្ឌសែនសុខ មានស្រុកកំណើតនៅភូមិបូសខ្នោ ស្រុកចំការលើ ខេត្តកំពង់ចាម មានប្រពន្ធឈ្មោះ ហីម មាឡៃ អាយុ២៦ឆ្នាំ មុខរបរជាអ្នកដាំបាយក្នុងក្រុមហ៊ុនស្នាក់នៅជាមួយគ្នា និងមានកូនប្រុសម្នាក់ទៀត អាយុ៣ឆ្នាំ ជិះម៉ូតូមួយគ្រឿងម៉ាកហុងដាឌ្រីម ស៊េរីឆ្នាំ២០១៥ ពណ៌ខ្មៅ ពាក់ស្លាកលេខ ភ្នំពេញ១DF-១៩៨៩ ។
តាមប្រភពព័ត៌មានពីកន្លែងហេតុបានឱ្យដឹងថា នៅមុនពេលកើតហេតុគេឃើញបុរសរងគ្រោះជិះម៉ូតូខាងលើក្នុងស្ថានភាពស្រវឹងស្រាឌុបប្រពន្ធ និងកូនពីក្រោយដោយធ្វើដំណើរតាមបណ្តោយផ្លូវ២០១១ក្នុងទិសដៅពីត្បូងទៅជើងលុះជិះមកដល់ចំណុចខាងមុខផ្សារឈូកមាសក៏បានជ្រុលទៅបុកគូទរថយន្តមួយគ្រឿងទៀតមិនចាំម៉ាក ដែលធ្វើដំណើរស្របទិសគ្នាបណ្តាលឲ្យម៉ូតូដួលរងរបួសកូនប្រុសបែកមាត់ និងពកក្បាល ចំណែករថយន្តមិនចង់មានរឿងវែងឆ្ងាយក៏បន្តដំណើរទៅបាត់ដោយមិនទាមទារសំណង់អ្វីពីបុរសរងគ្រោះនោះទេ ។ បន្ទាប់មកស្ត្រីជាប្រពន្ធបុរសរងគ្រោះបានទុកប្តីចោល ហើយឡើងជិះម៉ូតូឌុបដឹកកូនយកទៅព្យាបាលនៅមន្ទីរសំរាកព្យាបាលនិងសម្ភពផ្សារឈូកមាស ។ ក្រោយមកបុរសរងគ្រោះជាប្តីបានលើកម៉ូតូបំណងជិះតាមទៅមើលប្រពន្ធ និងកូន តែត្រូវប្រជាពលរដ្ឋដែលរស់នៅក្បែរនោះឃាត់មិនឱ្យបន្តដំណើរទៅមុខទៀត ព្រោះខ្លាចមានគ្រោះថ្នាក់ទោះជាប្រជាពលរដ្ឋព្យាយាមឃាត់យ៉ាងណាក៏បុរសរងគ្រោះនៅតែមិនស្តីហើយបានជិះម៉ូតូបន្តដំណើរទៅមុខទៀតក្នុងល្បឿនបោះពួយយ៉ាងលឿនព្រោះប្រញាប់ទៅមើលកូន ។ លុះមកដល់ចំណុចកើតហេតុបុរសរងគ្រោះបានបើកម៉ូតូបត់ឆ្វេងឆ្លងផ្លូវចូលគ្លីនិកជ្រុលទៅបុករ៉ឺម៉កម៉ូតូមួយគ្រឿងទៀតមិនចាំម៉ាកដែលបើកបរបញ្ច្រាសទិសចំពាក់កណ្តាលពេញទំហឹងបណ្តាលឲ្យបុរសរងគ្រោះបោកទៅនឹងថ្នល់ស្លាប់ភ្លាមៗនឹងកន្លែងកើតហេតុ រីឯម៉ូតូរងការខូចខាតបែកចង្កៀង និងក្បាំង ចំណែកឯរ៉ឺម៉កម៉ូតូបានព្យាយាមបើករត់គេចខ្លួនបាត់ស្រមោល ។
ក្រោយពេលកើតហេតុស្ត្រីជាប្រពន្ធបានរត់បីកូនប្រុសមកកន្លែងកើតហេតុរួមទាំងសាច់ញាតិរបស់ជនរងគ្រោះហើយបានស្រែកទ្រហោយំគួឱ្យសោកសង្វេគជាខ្លាំងបង្កឲ្យប្រជាពលរដ្ឋចោមរោមមើលយ៉ាងច្រើន ។ បន្ទាប់សមត្ថកិច្ចជំនាញចរាចរណ៍ខណ្ឌសែនសុខបានចុះមកដល់កន្លែងកើតហេតុ និងបានធ្វើកំណត់ហេតុហើយបានប្រគល់សពបុរសរងគ្រោះរួមទាំងម៉ូតូទៅសាច់ញាតិក្រុមគ្រួសារដឹកយកទៅធ្វើបុណ្យទៅតាមប្រពៃណីនៅឯវត្តក្រាំងធ្នង់ ៕
ចែករំលែកព័តមាននេះ