រាជធានីភ្នំពេញ ៖ ជិះម៉ូតូកៀររថយន្តខូចខាតតិចតួច ទូរស័ព្ទហៅសាច់ញាតិមកកាងទះកំផ្លៀងស្ត្រីជាអ្នកបើករថយន្តមួយកំផ្លៀង ហើយបើករថយន្តរត់គេចខ្លួន បន្សល់ទុកម្ចាស់រថយន្ត និងម៉ូតូមួយគ្រឿង នៅកន្លែងកើតហេតុ បង្កឲ្យមានការភ្ញាក់ផ្អើលកាលពីវេលាម៉ោង០៣និង៤៥នាទីទាបភ្លឺ នៅចំណុចស្ថានីយប្រេងឥន្ធនៈសូគីមិច ច្រមុះជ្រូកក្បាលថ្នល់ ផ្លូវព្រះមុនីវង្ស សង្កាត់ផ្សារដើមថ្កូវ ខណ្ឌចំការមន ។
រាជធានីភ្នំពេញ ៖ ជិះម៉ូតូកៀររថយន្តខូចខាតតិចតួច ទូរស័ព្ទហៅសាច់ញាតិមកកាងទះកំផ្លៀងស្ត្រីជាអ្នកបើករថយន្តមួយកំផ្លៀង ហើយបើករថយន្តរត់គេចខ្លួន បន្សល់ទុកម្ចាស់រថយន្ត និងម៉ូតូមួយគ្រឿង នៅកន្លែងកើតហេតុ បង្កឲ្យមានការភ្ញាក់ផ្អើលកាលពីវេលាម៉ោង០៣និង៤៥នាទីទាបភ្លឺ នៅចំណុចស្ថានីយប្រេងឥន្ធនៈសូគីមិច ច្រមុះជ្រូកក្បាលថ្នល់ ផ្លូវព្រះមុនីវង្ស សង្កាត់ផ្សារដើមថ្កូវ ខណ្ឌចំការមន ។
នារីរងគ្រោះមានឈ្មោះ ល ស ហ ភេទស្រី អាយុ២៩ឆ្នាំ មុខរបរលក់ដូរ ស្នាក់នៅក្នុងបុរីពិភពថ្មីចំការដូង ភូមិសំបួរ សង្កាត់ដង្កោ ខណ្ឌដង្កោ ចំណែកបីនាក់ទៀត ដែលរួមដំណើរជាមួយ មិនបានឲ្យដឹងឈ្មោះទេ ចំណែកតំណាងឲ្យជនបង្កបើករថយន្តចេញទៅ ហើយត្រូវសមត្ថកិច្ចឃាត់ខ្លួនបុរសម្នាក់ ដែលមានកាំភ្លើង មានឈ្មោះ វណ្ណ វិរៈ ភេទប្រុស អាយុ៣៥ឆ្នាំ មុខរបរអនុប្រធានសាខាកាំកុងត្រូលខេត្តក្រចេះ មានស្រុកកំណើតនៅស្រុកល្វាឯម ខេត្តកណ្ដាល ដកហូតកាំភ្លើងខ្លី ម៉ាកប៉េអាតា មួយដើម មានលិខិតឧទ្ទេសនាមត្រឹមត្រូវ និងម៉ូតូម៉ាកហុងដាឌ្រីម ស៊េរីឆ្នាំ២០១៧ ពណ៌ខ្មៅ ពាក់ស្លាកលេខ ១GC-៨១៦៧ មួយគ្រឿង ។
តាមសម្តីស្ត្រីរងគ្រោះ បានឲ្យដឹងថា ៖ មុនពេលកើតហេតុ រូបគាត់មានគ្នា៤នាក់ ប្រុសម្នាក់ និងស្រីបីនាក់ ហើយរូបគាត់ជាអ្នកបើករថយន្តម៉ាកតូយ៉ូតាព្រុស ពណ៌ស ពាក់ស្លាកលេខ ភ្នំពេញ ២AO-៧៨០៨ ចេញពីផ្សារកុងតឺន័រ គោលបំណងត្រលប់ទៅផ្ទះនៅក្នុងបុរីពិភពថ្មីចំការដូង ដោយបានធ្វើដំណើរតាមផ្លូវព្រះមុនីវង្ស ក្នុងទិសដៅពីជើងទៅត្បូង ខណៈមកដល់ចំណុចកើតហេតុ ជិតនឹងរោងចក្រគួងហុង ក៏ស្រាប់តែមានម៉ូតូ៣គ្រឿង មិនចាំម៉ាក បានជិះមកជែងរថយន្តរបស់គាត់ ក្នុងនោះម៉ូតូ២គ្រឿងបានបើកវ៉ាជែងទៅផុតហើយ នៅសល់ម៉ូតូមួយគ្រឿងទៀតជែងមិនផុត ក៏ជ្រុលទៅប៉ះជាមួយនឹងរថយន្តរបស់គាត់ បណ្តាលឲ្យរងការខូចខាតបន្តិចបន្តួច តែមិនមានរងរបួសទេ ។
ប្រភពដដែលបានបន្តទៀតថា ៖ នៅពេលដែលប៉ះហើយរូបគាត់ជាស្រីមិនហ៊ានឈប់ទេ បានបើករថយន្តទៅដល់ច្រមុះជ្រូកក្បាលថ្នល់ ក៏ស្រាប់តែមានរថយន្តម៉ាកឡិចស៊ីស RX330 មួយគ្រឿង បើកបរដោយបុរសជាអនុប្រធានសាខាកាំកុងត្រូលខេត្តក្រចេះ បានបើកមកកាក់ពីមុខរថយន្តរបស់គាត់ រួចហើយបានចុះពីលើរថយន្តប្រាប់ឲ្យរូបគាត់សុំទោស ពេលនោះរូបគាត់មិនទាន់បានសុំទោសផង ក៏ស្រាប់តែមានបុរសម្នាក់ បានជិះម៉ូតូម៉ាក់ហុងដាឌ្រីម ស៊េរីឆ្នាំ២០១៧ មួយគ្រឿង បានចុះពីលើម៉ូតូមកទះកំផ្លៀងគាត់មួយដៃ រួចហើយបុរសដែលទះកំផ្លៀងនោះបានឡើងបើករថយន្តឡិចស៊ីសរបស់អនុប្រធានសាខាកាំកុងត្រូលខេត្តក្រចេះចេញទៅបាត់ នៅតែម្ចាស់រថយន្តឡិចស៊ីសស្ថិតក្នុងសភាពស្រវឹងផងនោះ និយាយអួតអាងមិនខ្លាចនរណា និងម៉ូតូម៉ាកហុងដាឌ្រីម ស៊េរីឆ្នាំ២០១៧ មួយគ្រឿង នៅកន្លែងកើត ។
ក្រោយពេលកើតហេតុ សមត្ថកិច្ចប៉ុស្តិ៍ផ្សារដើមថ្កូវ បានចុះទៅដល់កន្លែងកើតហេតុ បានសាកសួរពីដំណើររឿង រួចហើយបាននាំខ្លួនបុរសម្នាក់ជាម្ចាស់រថយន្តឡិចស៊ីស RX330 ដែលបានដែលបានឲ្យជនបង្កដែលទះកំផ្លៀងស្ត្រីជាអ្នកបើករថយន្ត បានជិះរថយន្តរបស់គាត់រត់គេចខ្លួន និងនារីរងគ្រោះយកទៅសាកសួរ នៅប៉ុស្តិ៍នគរបាលផ្សារដើមថ្កូវ ។
ដោយឡែកនៅពេលដែលទៅប៉ុស្តិ៍ផ្សារដើមថ្កូវ សមត្ថកិច្ចក្រឡេកឃើញបុរសដែលអនុប្រធានសាខាកាំកុងត្រូលខេត្តក្រចេះ មានកាំភ្លើង នៅជាប់នឹងខ្លួន ក៏បានដកហូតកាំភ្លើងខ្លីមួយដើម យកមកត្រួតពិនិត្យមើល មានលិខិតអនុញ្ញាតត្រឹមត្រូវឬអត់ ត្រូវបុរសនោះច្រងេងច្រងាងរើបម្រះមិនព្រមឲ្យសមត្ថកិច្ចដកហូតកាំភ្លើងទេ ដោយបានបោះពាក្យសម្ដីថា ៖ ទោះបីជាមានបទបញ្ជាពីអធិការដ្ឋានខណ្ឌ ក៏គាត់មិនខ្លាចដែរ ។ ក្រោយមកទើបសមត្ថកិច្ចអាចដកហូតកាំភ្លើងខ្លីនោះយកមកមើល ឃើញមានលិខិតឧទ្ទេសនាមត្រឹមត្រូវ ។
ចំពោះស្ត្រីរងគ្រោះវិញ បានដាក់ពាក្យបណ្តឹងនៅប៉ុស្តិ៍នគរបាលផ្សារដើមថ្កូវ ដើម្បីឲ្យជនបង្កដែលទះកំផ្លៀងរូបគាត់ចូលខ្លួនមកដោះស្រាយ តែបើមិនដូច្នេះទេ បុរសដែលជាអ្នកឲ្យជនបង្កបើករថយន្តរត់គេចខ្លួន គឺជាអ្នកទទួលខុសត្រូវ ៕
ចែករំលែកព័តមាននេះ