ប្រទេសអាហ្វ្រិកមួយទៀតប្រកាសបញ្ចប់ប្រតិបត្តិការយោធាបារាំង
ប្រទេសបួគីណាហ្វាសូ ៖ កងទ័ពបួគីណាហ្វាសូប្រកាសពីការបញ្ចប់ប្រតិបតិ្តការយោធារបស់កងទ័ព
ប្រទេសបួគីណាហ្វាសូ ៖ កងទ័ពបួគីណាហ្វាសូប្រកាសពីការបញ្ចប់ប្រតិបតិ្តការយោធារបស់កងទ័ពបារាំងនៅលើដែនដីខ្លួន ប៉ុន្មានសប្ដាហ៍ក្រោយពីរដ្ឋាភិបាលបណ្ដោះអាសន្នប្រទេសនេះ បរិហារបណ្ដាកិច្ចព្រមព្រៀងការពារទាក់ទិនប្រទេសទាំង២ ដែលទំនាក់ទំនងកំពុងមានការស្រុតចុះខ្លាំងរយៈពេលប៉ុន្មានខែចុងក្រោយនេះ។
សេនាធិការដ្ឋានកងទ័ពបួគីណាហ្វាសូ និងទីបញ្ជាការដ្ឋានកងកម្លាំងTASK FORCE SABREបារាំង បានប្រារព្ធធ្វើកាលពីថ្ងៃទី១៨ កុម្ភៈ ពិធីដកទង់ជាតិបារាំងចេញ នៅមូលដ្ឋានយោធាBILA ZAGRE ជាយរដ្ឋធានីអាវហ្គាឌូហ្គូ ជាពិធីតំណាងឲ្យការបញ្ចប់ជាផ្លូវការប្រតិបត្តិការរបស់កងកម្លាំងTASK FORCE SABREបារាំង នៅលើដែនដីបួគីណាហ្វាសូ។
ចំនួនកងទាហានបារាំងស្ថិតនៅបួគីណាហ្វាសូ គេមិនបានដឹងច្បាស់ឡើយ មកដល់យប់ថ្ងៃទី១៩កុម្ភៈ តែតាមព័ត៌មាននានាថាទាហានបារាំងភាគច្រើនបានចាកចេញរួចហើយ។ បារាំងជាអតីតអាណានិគមលើបួគីណាហ្វាសូ បានបញ្ជូនកងទ័ពមកកាន់ប្រទេសនេះ ដើម្បីជួយប្រយុទ្ធប្រឆាំងពួកជីហាដក្រុមអាល់កៃដានិងក្រុមរដ្ឋអ៊ិស្លាម។ តែប្រជាជនប្រទេសនេះហាក់កាន់តែមិនសប្បាយចិត្តចំពោះវត្តមានយោធានោះ និងមានអារម្មណ៍ប្រឆាំងបារាំង។
រដ្ឋាភិបាលប្រទេសនេះទុកពេល១ខែក្នុងការដកចេញ ក្រោយការប្រកាសពីការបញ្ចប់វត្តមានកងទាហានបារាំង។ ពលរដ្ឋបួគីណាហ្វាសូ ច្រើនពាន់នាក់ក្រោយការប្រកាសនេះ បាននាំគ្នាធ្វើបាតុកម្មនៅរដ្ឋធានីសម្ដែងការគាំទ្រចំពោះប្រមុខរបបយោធានិងអធិបតេយ្យភាពរបស់ប្រទេស។
ប្រទេសនោះដែលជួបប្រទះអំពើហិ.ង្សាបង្ហូរឈា.ម ជាប់មិនដាច់និងកាន់តែសាហា.វក៏ដោយ ទោះបីមានវត្តមានយោធាបារាំង អះអាងនាពេលនេះថា គេចង់ស្វែងរកដៃគូថ្មីៗមកជួយការពារសន្តិសុខហើយហាក់ដូចជាចាប់អារម្មណ៍លើរុស្ស៊ីពិសេសក្រុមទាហានស៊ីឈ្នួលរុស្ស៊ី WAGNER ដូចនៅម៉ាលីនិងអាហ្វ្រិកកណ្ដាលដែរ៕
ចែករំលែកព័តមាននេះ