ក្តីស្រទ្បាញ់របស់បងចំពោះអូន គឺមានជារៀងរាល់ថ្ងៃ ដូចដែលបងចូលចិត្តកាហ្វេពេលព្រឹក ទឹកតែពេលរសៀល និងក្លិនផ្កាឡាវេនឌ័រពេលរាត្រី។ នេះជាសំណេរដ៏មានអត្ថន័យចាក់ដោតរបស់អ្នកឧកញ៉ា គិត ម៉េង សរសេរជូនចំពោះឧត្ដមភរិយាជាទីគោរពស្រលាញ់របស់អ្នកឧកញ៉ា គឺលោកជំទាវ
រាជធានីភ្នំពេញ ៖ ក្តីស្រទ្បាញ់របស់បងចំពោះអូន គឺមានជារៀងរាល់ថ្ងៃ ដូចដែលបងចូលចិត្តកាហ្វេពេលព្រឹក ទឹកតែពេលរសៀល និងក្លិនផ្កាឡាវេនឌ័រពេលរាត្រី។ នេះជាសំណេរដ៏មានអត្ថន័យចាក់ដោតរបស់អ្នកឧកញ៉ា គិត ម៉េង សរសេរជូនចំពោះឧត្ដមភរិយាជាទីគោរពស្រលាញ់របស់អ្នកឧកញ៉ា គឺលោកជំទាវ ស្រីតូច ចំណាន ក្នុងថ្ងៃ១៤កុម្ភៈ បុណ្យទិវានៃក្ដីស្រលាញ់ ដែលភាសាបរទេសហៅថា (Valentine’s Day )។
ក្នុងថ្ងៃទី១៤ ខែកុម្ភៈនេះ អ្នកឧកញ៉ា គិត ម៉េង បានលើកឡើងនៅទស្សនៈមួយមកនិយាយទៅកាន់ភរិយាថា មនុស្សខ្លះទទួលបានក្តីស្រឡាញ់ពិតតាមរយៈការអានសៀវភៅ សុភាសិត និងកំណាព្យ។ អ្នកខ្លះទៀតទទួលបានក្តីស្រទ្បាញ់ពិតតាមរយៈការមើលរឿង ល្ខោន និងភាពយន្ត»។ តែចំពោះអ្នកឧកញ៉ាវិញ ស្នេហាពិតបានកើតទ្បើងតាមរយៈការសម្លឹងមើលកែវភ្នែករបស់លោកជំទាវ ស្រីតូច ចំណាន ឧត្ដមភរិយាជាទីគោរពស្រលាញ់។ នេះជាដំណើរស្នេហារបស់អ្នកឧកញ៉ា និងលោកជំទាវតាំងពីពេលនោះមក។
អ្នកឧកញ៉ា គិត ម៉េង ដែលមហាជនតែងតែហៅលោកថាជាស្វាមីគំរូនោះ បានរៀបរាប់ពីរបស់៣យ៉ាងដែលលោកចូលចិត្ត ប្រៀបប្រដូចទៅនឹងលោកជំទាវ ស្រីតូច ចំណាន ដែលជាឧត្ដមភរិយា។
សំណេរដ៏មានអត្ថន័យចាក់ដោត៣យ៉ាងរបស់អ្នកឧកញ៉ាមានខ្លឹមសារថា «អូនគឺជាកាហ្វេពេលព្រឹករបស់បង ដែលធ្វើឲ្យបងភ្ញាក់ពីដំណេកដោយមានសុភមង្គល។ អូនជាទឹកតែ ដែលបងចូលចិត្តបំផុតនៅពេលរសៀល ហើយដែលធ្វើឲ្យថ្ងៃរបស់បងកាន់តែល្អប្រសើរ។ អូនក៏ជាក្លិនផ្កាឡាវេនឌ័ររបស់បងនៅពេលយប់ ដែលជួយឲ្យបងគេងស្កប់ស្កល់ផងដែរ។ បងស្រទ្បាញ់អូនជារៀងរាល់ថ្ងៃ។
ជាមួយគ្នានេះផងដែរ ប្រធានសភាពាណិជ្ជកម្មកម្ពុជាដ៏មានកេរ្តិ៍ឈ្មោះល្បីល្បាញទាំងក្នុង និងក្រៅប្រទេសរូបនេះ បានលើកសរសើរពីឧត្ដមភរិយា មិនដាច់ពីមាត់ថា អូនគឺជាស្ត្រីដែលបានធ្វើឲ្យគ្រួសាររបស់យើងរឹងមាំ។ បងស្រទ្បាញ់អូនទៅលើលក្ខណៈសម្បត្តិរបស់អូន និងរបៀបដែលអូនធ្វើឲ្យបងពេញចិត្តលើអូន។ គ្មានរឿងនិទានណាអាចប្រៀបធៀបនឹងរឿងស្នេហាពិតដែលយើងចែករំលែកនេះទេ។ អ្វីៗគ្រប់យ៉ាងដែលអូនមាន គឺសម្រស់ដ៏លេចធ្លោ និងមន្តស្នេហ៍ពីធម្មជាតិរបស់អូន។ មនុស្សគ្រប់គ្នាអាចនិយាយបានថា អូនមានបេះដូងមាស។ អូនមិនមែនជាបវរកញ្ញាពិភពលោក ឬបវរកញ្ញាចក្រវាលនោះទេ ប៉ុន្តែអូនបានយកឈ្នះបេះដូងរបស់បងទាំងស្រុង។ បងអាចហៅខ្លួនឯងថា ជាបុរសមានភ័ព្វព្រេងល្អបំផុតនៅលើផែនដីនេះ ព្រោះបងមានភរិយាដ៏ស្រស់ស្អាត ឆ្លាត រឹងមាំ យល់ដឹងខ្ពស់ គួរឲ្យស្រទ្បាញ់ និងចេះជួយអ្នកដទៃ។ រីករាយទិវានៃក្តីស្រទ្បាញ់ អូន ចំណាន ភរិយាសម្លាញ់របស់បង! ។
យ៉ាងណាមិញ ក្រោយឃើញសំណេរដ៏សែនវែងអន្លាយពោរពេញទៅដោយអត្ថន័យរបស់អ្នកឧកញ៉ា គិត ម៉េង ភ្លាម ស្រាប់តែមហាជនដែលចូលចិត្តតាមដានខ្សែជីវិតពិតរបស់អ្នកឧកញ៉ា និងលោកជំទាវ ក៏បាននាំគ្នាចូលទៅខមិនបញ្ចេញមតិក្រោមការផុសរបស់អ្នកឧកញ៉ាយ៉ាងព្រោងព្រាតតែម្តង។ ដោយខ្លះបានលើកសរសើរពីអ្នកឧកញ៉ាមិនដាច់ពីមាត់ថា អ្នកឧកញ៉ាជាស្វាមីដ៏ល្អ ជាឪពុកដែលបង្ហាញគំរូល្អៗទុកឲ្យកូនៗចង់ចាំ និងយកគំរូតាម ហើយក៏ជាមេគ្រួសារដែលពោរពេញទៅដោយភាពស្មោះស្ម័គ្រចំពោះភរិយា និងកូនៗជានិច្ច។
ទន្ទឹមនឹងមតិសរសើរអ្នកឧកញ៉ា ក្នុងនោះអ្នកប្រើប្រាស់បណ្ដាញសង្គមដទៃទៀត ក៏បានពោលថា លោកជំទាវ ស្រីតូច ចំណាន ពិតជានារីដ៏ល្អដែលតែងតែនៅពីក្រោយអ្នកឧកញ៉ាជានិច្ច ។ ហើយកាន់តែពិសេសជាងនេះ លោកជំទាវ ពិតជាមានភព្វសំណាងខ្លាំងណាស់ ដែលទទួលបានស្វាមីល្អ ចេះថ្នាក់ថ្នម យកចិត្តទុកដាក់គ្រប់សព្វបែបយ៉ាង និងមានតែសុភមង្គលក្នុងក្រុមគ្រួសារ។
មិនតែប៉ុណ្ណោះទេ មហាជនជាច្រើនទៀតក៏បានជូនពរអ្នកឧកញ៉ា និងលោកជំទាវ ព្រមទាំងកូនៗឲ្យជួបតែសំណាងល្អក្នុងជីវិត មានតែស្នាមញញឹម និងមានតែសុភមង្គល ភាពសុខសាន្តក្នុងក្រុមគ្រួសារជានិរន្តរ៍ ៕ អត្ថបទដោយ ៖ រៀម រ៉ាន់
ចែករំលែកព័តមាននេះ