ក្នុងឆ្នាំ២០២២ កន្លងទៅនេះ ក្នុងសូចនាករនៃកម្មវិធីសុខភាពបន្តពូជ មាតា និងទារក និងកុមារ នៅតែបន្តស្ថិតក្នុងវឌ្ឍនភាពគួរឱ្យមោទនៈ ជាក់ស្ដែងលទ្ធផលបានបង្ហាញថា
ខេត្តកែប ៖ ក្នុងឆ្នាំ២០២២ កន្លងទៅនេះ ក្នុងសូចនាករនៃកម្មវិធីសុខភាពបន្តពូជ មាតា និងទារក និងកុមារ នៅតែបន្តស្ថិតក្នុងវឌ្ឍនភាពគួរឱ្យមោទនៈ ជាក់ស្ដែងលទ្ធផលបានបង្ហាញថា ពុំមានករណីស្លា.ប់របស់មាតា និងទារកនោះទេ។ ប្រការនេះ បានធ្វើអោយសមាមាត្រ នៃការសម្រាលកូននៅមូលដ្ឋានសុខាភិបាល ចាប់ពីឆ្នាំ២០១៨ រហូតដល់ឆ្នាំ២០២២ ស្ថិតក្នុងអត្រា៥៥% ក្នុងនោះការសំរាលកូនដោយឆ្មបបុរាណ គឺពុំមានឡើយ។
នេះបើយោងរបាយការណ៍របស់ឯកឧត្តម ម៉ែន សុធីរ ប្រធានមន្ទីរសុខាភិបាលខេត្តកែប បានថ្លែងក្នុងពិធីបិទសន្និបាតបូកសរុបលទ្ធផលការងារឆ្នាំ២០២២ និងលើកទិសដៅសម្រាប់ឆ្នាំ២០២៣ របស់មន្ត្រីសុខាភិបាលខេត្តនារសៀលថ្ងៃទី១០ ខែកុម្ភៈ ឆ្នាំ២០២៣នេះ។
ជាមួយលទ្ធផលនេះដែរ ឯកឧត្តមបណ្ឌិត សោម ពិសិដ្ឋ អភិបាលខេត្តកែប បានសម្ដែងនូវការកោតសរសើរ និងវាយតម្លៃខ្ពស់ ចំពោះការខិតខំប្រឹងប្រែងរបស់ថ្នាក់ដឹកនាំមន្ត្រីរាជការទាំងអស់នៃមន្ទីរសុខាភិបាល ដោយផ្អែកតាមលទ្ធផលឆ្នាំ២០២២នេះ អត្រាមរណភាពស្ត្រី និងកុមារ ត្រូវបានកាត់បន្ថយដល់កម្រិតសូន្យ នេះសបញ្ជាក់ឱ្យឃើញថា ស្ថានភាពសុខភាពរបស់ស្ត្រីកុមារ និងប្រជាពលរដ្ឋមានលក្ខណៈល្អប្រសើរបន្តិចម្តងៗជារៀងរាល់ឆ្នាំនៅទូទាំងប្រទេស ជាពិសេសនៅខេត្តកែបយើងនេះ។
ឯកឧត្តមបន្តថា រាជរដ្ឋាភិបាល បានបង្កើនថវិកាសម្រាប់វិស័យសុខាភិបាលជារៀងរាល់ឆ្នាំ ពិសេសបានអនុវត្តគម្រោង លើកទឹកចិត្តជាច្រើនក្រៅពីប្រាក់បៀវត្សរួមមាន ៖ មូលនិធិសមធម៌ ការផ្ដល់ប្រាក់ ការបន្ថែមលើកទឹកចិត្ត ដល់ឆ្មបដែលបានបង្កើតកូនរស់ ព្រមទាំងប្រាក់ឧបត្ថម្ភស្នាដៃការងារ តាមរយៈការវាយតម្លៃគុណភាពសេវាសុខា ភិបាលសាធារណៈ ជាដើម។
ទោះជាយ៉ាងណា ឯកឧត្តមបានបញ្ជាក់ថា ទន្ទឹមនឹងនេះ មន្ទីរក៏ត្រូវយកចិត្តទុកដាក់បន្ថែមលើសុខភាពមាតា ទារក និងកុមារតូចៗ ក្នុងចំណោមគ្រួសារក្រីក្រនៅទីជនបទ តំបន់ដាច់ស្រយាល នៅតែជាបញ្ហាប្រឈមនៅឡើយ ជាពិសេសប្រជាពលរដ្ឋដែលកំពុងរស់នៅតាមបណ្តាកោះក្នុងខេត្តកែប រួមមាន ៖ កោះពោធិ៍ និងកោះទន្សាយ ដែលតម្រូវអោយយើងគិតគូរចំពោះការផ្តល់សេវាដឹកជញ្ជូននៅពេលពលរដ្ឋមានបញ្ហាដូចជាសម្រាលកូន ឬសង្រោះបន្ទាន់ជាដើម៕
ចែករំលែកព័តមាននេះ