ខ្លោងទ្វារខាងលិចរបស់ប្រាសាទតាព្រហ្ម ដែលជាច្រកចេញ-ចូលសំខាន់ក្នុងវង់ទស្សនានៃប្រាសាទនេះ ត្រូវបានបើកឱ្យធ្វើចរាចរណ៍ធម្មតាឡើងវិញហើយ កាលពីដើមខែកុម្ភៈ ឆ្នាំ២០២៣នេះ ក្រោយពីអាជ្ញាធរជាតិអប្សរា សហការជាមួយឥណ្ឌា បានបិទផ្អាកចរាចរណ៍ជាបណ្តោះអាសន្ន
ខេត្តសៀមរាប ៖ ខ្លោងទ្វារខាងកើតរបស់ប្រាសាទតាព្រហ្ម ដែលជាច្រកចេញ-ចូលសំខាន់ក្នុងវង់ទស្សនានៃប្រាសាទនេះ ត្រូវបានបើកឱ្យធ្វើចរាចរណ៍ធម្មតាឡើងវិញហើយ កាលពីដើមខែកុម្ភៈ ឆ្នាំ២០២៣នេះ ក្រោយពីអាជ្ញាធរជាតិអប្សរា សហការជាមួយឥណ្ឌា បានបិទផ្អាកចរាចរណ៍ជាបណ្តោះអាសន្ននៅដើមខែមករា កន្លងទៅ ដើម្បីរៀបចំទល់ទ្រធ្នឹម ផ្នែកខាងកើត ដែលបានរហែកប្រេះចំពាក់កណ្តាល ឱ្យមានសុវត្ថិភាពទាំងតួខ្លោងទ្វារ និងភ្ញៀវទេសចរដើរឆ្លងកាត់ផងដែរ។
ក្រុមការងារគម្រោងសហប្រតិបត្តិការឥណ្ឌា-កម្ពុជា ដើម្បីអភិរក្ស និងជួសជុលប្រាសាទតាព្រហ្ម លោក ចាន់ ឡាយ បានឱ្យដឹងថា ដោយសារអាយុកាលសំណង់ និងកត្តាធម្មជាតិផង បានធ្វើឱ្យស្រុតគ្រឹះ និងធ្នឹមផ្នែកខាងកើត នៃខ្លោងទ្វារនេះ បានរហែកប្រេះដោយសារទម្ងន់សង្កត់ពីខាងលើ។ លោក ចាន់ ឡាយ បន្តថា បច្ចេកទេស នៃការងារទល់ទ្រនេះ ក្រុមការងារមិនបានរើថ្មចេញនោះឡើយ ដោយប្រើដាក់ដែកពីខាងក្នុង រៀបចំ.តធ្នឹម និងដាក់ឱ្យស្មើឡើងវិញនៅទីតាំងដើម។
លោក ចាន់ ឡាយ បានបញ្ជាក់បន្ថែមថា ការងារទល់ទ្រ បានបញ្ចប់ដោយជោគជ័យ ឥឡូវនេះតួខ្លោងទ្វាររឹងមាំ និងមានសុវត្ថិភាពឡើងវិញ ភ្ញៀវទេសចរអាចដើរឆ្លងកាត់ ថតផ្តិតរូបភាព ហើយត្រូវស្វែងយល់ស្លាកព័ត៌មាន មុននឹងចូលទៅទស្សនាប្រាសាទនៅខាងក្នុង។ បន្ថែមពីលើនេះ ក្រុមការងារក៏នៅតែពិនិត្យតាមដានជាប្រចាំ ចៀសវាងមានហានិភ័យផ្សេងៗកើតឡើងជាយថាហេតុផងដែរ៕
ចែករំលែកព័តមាននេះ