​ភ្នំពេញ៖ លោក សួស យ៉ារ៉ា ប្រធានគណៈកម្មការកិច្ចការបរទេស សហប្រតិបត្តិការអន្តរជាតិ ឃោសនាការ និងព័ត៌មាននៃរដ្ឋសភា បាន​ដឹកនាំគណៈប្រតិភូ ​បំពេញទស្សនកិច្ច​នៅទីស្នាក់ការថ្មីនៃ​អង្គជំនុំជម្រះវិសាមញ្ញក្នុងតុលាការកម្ពុជា នាព្រឹកថ្ងៃទី១០ ខែកុម្ភៈ ឆ្នាំ២០២៣។ អង្គជំនុំជម្រះវិសាមញ្ញក្នុងតុលាការកម្ពុជា ដែលគេស្គាល់ថា សាលាក្តីកាត់ទោស​អតីតមេដឹកនាំខ្មែរក្រហម បានប្តូរទីតាំង ចេញពី​បញ្ជាការដ្ឋាន​កងទ័ពជើងគោក មកកាន់ទីស្នាក់ការថ្មី ​ដើម្បីបន្តអាណត្តិការងារ ៣ឆ្នាំទៀត រាប់ចាប់តាំងពីឆ្នាំ២០២៣នេះ រហូតដល់ឆ្នាំ២០២៥។​

ក្នុងដំណើទស្សនកិច្ចនេះ គណៈប្រតិភូទាំងអស់ទទួលបាន ការស្វាគមន៍យ៉ាងរាក់ទាក់ពីលោក​ ក្រាញ់ តូនី ប្រធានរដ្ឋបាលស្តីទី លោក ឃ្នុត រ៉ូហ្សិនហក អនុប្រធានរដ្ឋបាល និងមន្ដ្រីជាន់ខ្ពស់​របស់អ.វ.ត.ក។

លោក ក្រាញ់ តូនី និងលោក ឃ្នុត រ៉ូហ្សិនហក បានជម្រាបជូន​គណៈប្រតិភូអំពីសមិទ្ធផល ដែលសម្រេចបានដោយជោគជ័យរបស់អ.វ.ត.ក ក្នុងការជំនុំជម្រះក្ដី លើអតីតមេដឹកនាំខ្មែរក្រហម​អស់រយៈពេល ១៦ឆ្នាំមកនេះ ដោយបានរួមចំណែកដល់ការរក្សាបាននូវសន្ដិភាព ការផ្សះផ្សារ​ផ្លូវចិត្តរបស់ជនរងគ្រោះ ការមិនមានការសងសឹក និងចងគំនុំគ្នា ក្នុងសង្គមជាតិ និងការបំបាត់​បាននូវវប្បធម៌និទណ្ឌភាព នៅកម្ពុជា។

លោក​ប្រធាន និងលោកអនុប្រធានរដ្ឋបាល ក៏បានជម្រាបជូនគណៈប្រតិភូអំពីសកម្មភាព​ការងារសេសសល់របស់អ.វ.ត.ក ដែលត្រូវអនុវត្តក្នុងអំឡុងពេលបីឆ្នាំទៅមុខ ចាប់ពីឆ្នាំ២០២៣ ដល់ឆ្នាំ២០២៥ ដែលរួមមានៈ ការងារគតិយុត្តមួយចំនួន ជាពិសេសពាក់ព័ន្ធនឹងការឃ្លាំមើល​ការអនុវត្តទោស ការធ្វើ​ចំណាត់ថ្នាក់ឯកសារសំណុំរឿងឡើងវិញពីសម្ងាត់ ទៅជាសាធារណៈ ការគ្រប់គ្រង និងការផ្សព្វផ្សាយឱ្យបានទូលំទូលាយបណ្ណសារនៃសំណុំរឿងអស់ដែលមានជាង ៣លានទំព័រ កា​រផ្សព្វផ្សាយនិងអប់រំ ក្នុងស្មារតីលើកកម្ពស់ការយល់ដឹងនៃដំណើរការកាត់សេចក្តី សមិទ្ធផល និងកេរតំណែលរបស់អ.វ.ត.ក ដល់យុវជនជំនាន់ក្រោយ។

លោក ឃ្នុក រ៉ូហ្សិនហក ក៏បានធ្វើបទបង្ហាញអំពីផែនការសកម្មភាពការងារលម្អិតរបស់អ.វ.ត.ក ដែលត្រូវបំពេញ ក្នុងអំឡុងពេលបីឆ្នាំខាងមុខផងដែរ។  

លោក សួស យ៉ារ៉ា បានកោតសរសើរ លើសមទ្ធិផលរបស់អ.វ.ត.ក និងបានបញ្ជាក់ថា សមទ្ធិ ផលនេះ មានសារៈសំខាន់ណាស់ សម្រាប់ការអប់រំ និងសន្ដិភាពរបស់ប្រជាជាតិទាំងមូល។

លោក សួស យ៉ារ៉ា ​គាំទ្រទាំងស្រុង​នូវសកម្មភាពរបស់អ.វ.ត.ក ដែលត្រូវបំពេញក្នុងអំឡុង ពេលបីឆ្នាំខាងមុខនេះ ហើយលោក​សង្ឃឹមថា នឹងមានកិច្ចសហប្រតិបត្តិការរវាងអ.វ.ត.ក និង គណៈកម្មការកិច្ចការបរទេសសហប្រតិបត្តិការអន្តរជាតិ ឃោសនាការ និងព័ត៌មាននៃរដ្ឋសភា ជាពិសេសគណៈប្រតិភូទាំងពីរ ក៏បានពិភាក្សាគ្នាលើគម្រោងសហប្រតិបត្តិការរួមគ្នា ក្នុងការ លើកកម្ពស់ការងារអប់រំផ្នែកគតិយុត្តិ ការចែករំលែកយុត្តិសាស្រ្តល្អៗរបស់អ.វ.ត.ក នៅថ្នាក់តំបន់ និងអន្តរជាតិ តាមរយៈការបង្កើតឱ្យមានបណ្ណាល័យច្បាប់ឌីជីថល និងការងារផ្សព្វផ្សាយ​ដល់សាធារណជនឱ្យបានទូលំទូលាយផងដែរ៕ សុខ សារ៉ាយ