បិទការប្រកួតកីឡាការ៉ាតេជ្រើសរើសជើងឯកថ្នាក់ជាតិឆ្នាំ២០២២ ឆ្នាំ២០២៣
- ភ្នំពេញ
រាជធានីភ្នំពេញ ៖ ការប្រកួតកីឡាការ៉ាតេជ្រើសរើសជើងឯកថ្នាក់ជាតិប្រចាំឆ្នាំ២០២២ បានប្រកាស
រាជធានីភ្នំពេញ ៖ ការប្រកួតកីឡាការ៉ាតេជ្រើសរើសជើងឯកថ្នាក់ជាតិប្រចាំឆ្នាំ២០២២ បានប្រកាសបិទការប្រកួតជាផ្លូវការហើយកាលពីល្ងាចថ្ងៃទី៥ កុម្ភៈ នៅទីលានសាលដំបូលទូកនៃសាកលវិទ្យាល័យភូមិន្ទភ្នំពេញ ។
ថ្លែងក្នុងឱកាសនោះ ឯកឧត្តម សាមឺឌី ស៊ីវឌ្ឍនា អនុប្រធានសហព័ន្ធកីឡាការ៉ាតេកម្ពុជា បានជំរុញដល់កីឡាករ-កីឡាការិនី និងថ្នាលទាំងអស់ ត្រូវបន្ដខិតខំហ្វឹកហាត់ និងស្វែងយល់បច្ចេកទេសបន្ថែម ដើម្បីលើកកម្ពស់សមត្ថភាពត្រៀមការប្រកួតថ្នាក់ជាតិ និងអន្ដរជាតិនានា ពិសេសត្រៀមការប្រកួតកីឡាស៊ីហ្គេម លើកទី៣២ ឆ្នាំ២០២៣ នៅកម្ពុជា នាពេលខាងមុខ។
ការលើកឡើងនេះ បន្ទាប់ពីសហព័ន្ធបានរៀបចំការប្រកួតកីឡាការ៉ាតេជ្រើសរើសជើងឯកថ្នាក់ជាតិ ឆ្នាំ២០២២ ដែលបញ្ចប់ដោយជោគជ័យ ក្រោយដំណើរការប្រកួតរយៈពេល ៣ថ្ងៃ ចាប់ពីថ្ងៃទី០៣-០៥ ខែកុម្ភៈ ឆ្នាំ២០២៣ នៅសាលដំបូលទូក នៃសាកលវិទ្យាល័យភូមិន្ទភ្នំពេញ ។ ការប្រកួតនេះ មានប្រតិភូ គ្រូបង្វឹក និងកីឡាករ-កីឡាការិនីចូលរួមសរុប ២៤៨នាក់ មកពី២១ក្លិប។
ឯកឧត្តម សាមឺឌី ស៊ីវឌ្ឍនា បន្ដថា ការចូលរួមរបស់បណ្ដាសមាគម ក្លិប និងសាលាគុនយ៉ាងផុសផុលនេះ សបញ្ជាក់ពីការរីកចម្រើន លើកកម្ពស់ការយល់ដឹងពីតម្លៃកីឡា និងបេសកកម្មលើកស្ទួយវិស័យកីឡាការ៉ាតេ។ ម្យ៉ាងការប្រកួតនេះ ក៏ជាសក្ខីភាព នៃស្មារតីសហការខ្ពស់ពីគ្រប់មជ្ឈដ្ឋានរបស់គ្រួសារការ៉ាតេ ក្នុងយុទ្ធនាការជាតិ ស្ដីពីការផ្សព្វផ្សាយលើប្រធានបទ «កីឡារស់ក្នុងសន្ដិភាព» ផងដែរ។
ចំពោះលទ្ធផលបច្ចេកទេស នៃការប្រកួតប្រចាំឆ្នាំនេះវិញ បន្ទាប់ពីឆ្លងកាត់ការប្រកួតដ៏ស្វិតស្វាញ គឺក្លិបក្រសួងការពារជាតិ ដណ្ដើមបានមេដាយច្រើនជាងគេសរុប ១៩គ្រឿង មានមេដាយមាស ១០, ប្រាក់ ៥ និងសំរឹទ្ធ ៤។ ក្រសួងសេដ្ឋកិច្ច និងហិរញ្ញវត្ថុ ឈរលេខ២ ឈ្នះមេដាយសរុប ១៣គ្រឿង មានមេដាយមាស ៦, ប្រាក់ ១ និងសំរឹទ្ធ ៦។ ក្លិបហនុមាន ឈរលេខ៣ ឈ្នះមេដាយសរុប ២២គ្រឿង មានមេដាយមាស ៥, ប្រាក់ ៩ និងសំរឹទ្ធ ៨ និងក្លិបក្រសួងមហាផ្ទៃ ឈរលេខ៤ ឈ្នះមេដាយសរុប ១៤គ្រឿង មានមេដាយមាស ៤, ប្រាក់ ៤ និងសំរឹទ្ធ ៦គ្រឿង ៕
ចែករំលែកព័តមាននេះ