ខេត្តសៀមរាប ៖ អាជ្ញាធរខេត្តរួមជាមួយអាជ្ញាធរជាតិអប្សរា ដែលគ្រប់គ្រងឧទ្យានអង្គរ បេតិកភណ្ឌពិភពលោកដ៏ល្បាញល្បី បានជូនដំណឹងជាលើកចុងក្រោយទៅដល់ប្រជាពលរដ្
ខេត្តសៀមរាប ៖ អាជ្ញាធរខេត្តរួមជាមួយអាជ្ញាធរជាតិអប្សរា ដែលគ្រប់គ្រងឧទ្យានអង្គរ បេតិកភណ្ឌពិភពលោកដ៏ល្បាញល្បី បានជូនដំណឹងជាលើកចុងក្រោយទៅដល់ប្រជាពលរដ្ឋ ដែលផ្សងព្រេងសង់លំនៅដ្ឋានដោយខុសច្បាប់ នៅក្នុងតំបន់ហាមឃាត់ដ៏តឹងរ៉ឹងនៃឧទ្យានអង្គរ ឲ្យរុះរើចេញជាកំហិតត្រឹមថ្ងៃទី០៩ សីហា ខាងមុខ បើពុំដូច្នេះកម្លាំងចម្រុះនឹងបើកប្រតិបត្តិការវាយកម្ទេច ដោយមិនទទួលរ៉ាប់រងនូវលើការខូចខាតឡើយ។ អភិបាលខេត្តសៀមរាបលោក ឃឹម ប៊ុនសុង នៅព្រឹកថ្ងៃទី២ សីហា ២០១៧នេះ បានមានប្រសាសន៍តាមទូរស័ព្ទប្រាប់អ្នកព័ត៌មានយើងឲ្យដឹងថា រដ្ឋបាលខេត្ត និងអាជ្ញាធរជាតិអប្សរា បានជូនដំណឹងជាផ្លូវការរួចហើយ នៅលើប្រពន្ធ័បណ្តាញទំនាក់ទំនងសង្គម ដោយទុកពេលត្រឹមថ្ងៃទី០៩ ខែសីហា ឆ្នាំ២០១៧ខាងមុខ សម្រាប់ឲ្យបងប្អូនប្រជាពលរដ្ឋ លោកបានសាងសង់សំណង់ល្មើសច្បាប់ទាំងហ្នឹងស្ម័គ្ររុះរើចេញដោយខ្លួនឯង មុននឹងកម្លាំងសហប្រតិតបត្តិការចុះបោសសម្អាត។
លោកបានថ្លែងយ៉ាងដូច្នេះថា«យើងបានត្រៀមកម្លាំងរួចរាល់ហើយ ដើម្បីប្រតិបត្តិការដ៏សំខាន់មួយនេះ ដោយមានសមាសភាពចូលរួមមកពីអាជ្ញាធរអប្សរា អាជ្ញាធរខេត្ត អាជ្ញាធរដែនដី ចាប់ពីក្រុង ស្រុករហូតដល់ឃុំ សង្កាត់ រួមជាមួយកម្លាំងប្រដាប់អាវុធរាប់សិបនាក់ផងដែរ។ លោកបានហៅប្រតិបត្តិការដែលនឹងគ្រោងធ្វើឡើងនាពេលខាងមុខថា ជាការអនុវត្តន៍ច្បាប់ក្នុងគោលបំណងបង្កាកុំឲ្យឧទ្យានអង្គរធ្លាក់នៅក្នុងដំណាក់កាលដាក់ក្នុងបញ្ជីបេតិកភណ្ឌពិភពលោកងាយរងគ្រោះ។ ក្នុងករណីមានការរារាំងនោះចំណាត់ការច្បាប់នឹងត្រូវបានយកមកប្រើប្រឆាំងជាក់ជាមិនខាន។ ជាមួយគ្នាដែរ អ្នកនាំពាក្យអាជ្ញាធរអប្សរា លោក ឡុង កុសល បានថ្លែងកាលពីថ្ងៃទី០១ សីហា នេះថា៖ សំណង់ថ្មីដែលស្ថិតនៅក្នុងបញ្ជីរុះរើចេញហ្នឹងមាន ចំនួនរហូតដល់ទៅជាង៥០០ខ្នងផ្ទះ មានតូចមានធំ ស្ថិតនៅរាយប៉ាយក្នុងតំបន់ហាមឃាត់តឹងរ៉ឹង១ និង ២នៃឧទ្យានអង្គរតែម្តង។ លោកបញ្ចាក់បន្ថែមថា សំណង់ទាំងហ្នឹងភាគច្រើនសង់ទុកចោលគ្មានមនុស្សរស់នៅទេ ភាគច្រើនសង់នៅក្នុងអំឡុងពេលយុទ្ធនាការឃោសនាបោះឆ្នោតឃុំ-សង្កាត់ អាណត្តិទី៤កន្លងទៅ។
លោកថា ចាប់តាំងពីខែកក្តដាកន្លងទៅ យើងបានចុះធ្វើការណែនាំអប់រំ និងជូនដំណឹងចំនួនពីរដងរួចមកហើយ លើសពីនោះក៏បានធ្វើសន្និសិទកាសែតមួយលើកផងដែរ ដើម្បីពន្យល់ឲ្យម្ចាស់សំណង់ទាំងនោះបានយល់ដឹង និងធ្វើការរុះរើចេញដោយខ្លួនឯង ប៉ុន្តែមានអ្នកស្ម័គ្ររុះរើស្ទើរតែសូន្យភាគរយ។ អភិបាលក្រុងសៀមរាបលោក សូរ ប្លាតុង នៅរសៀលថ្ងៃទី២ សីហា នេះបានថ្លែងប្រាប់ថា៖ យ៉ាងហោចណាស់មានសំណង់សង់ខុសច្បាប់ប្រមាណជាង៣៦ខ្នង ក្នុងសង្កាត់ចំនួន៦ រួមមានសង្កាត់ នគរធំ, គោកចក, ស្លក្រាម, ទឹកវិល ,ស្រង៉ែ និងសង្កាត់ក្របីរៀល របស់ក្រុងសៀមរាប បានស្ថិតនៅក្នុងបញ្ជីនៃសំណង់ដែលត្រូវរុះរើ។ លោកអភិបាលបានបន្ថែមថា៖ តួលេខខ្នងផ្ទះខុសច្បាប់ ក្នុងក្រុងសៀមរាបមានចំនួនច្រើន ជាងគេ ព្រោះតំបន់ភូមិសាស្ត្រទាំងហ្នឹងភាគច្រើន ជាទីប្រជុំជន និងនៅជាប់កៀកនឹងប្រាសាទបំផុត។ ជុំវិញករណីនេះដែរក្រុមអ្នកតាមដានការអភិវឌ្ឍន៍សង្គមបានអះអាងថា៖ វិធានការណ៍ចុះបោសសម្អាតសំណង់ខុសច្បាប់នៅក្នុងតំបន់អង្គរហ្នឹងគឺពិជាល្អសម្រាប់ការពារព្រលឹងជាតិ ប៉ុន្តែវាហាក់ដូចជាធ្វើឡើងយឺតពេលបន្តិច ពោលអាជ្ញាធខេត្ត ក៏ដូចអាជ្ញាធរជាតិអប្សរា ដែលមានភារកិច្ចប្រចាំការផ្ទាល់នៅទីនោះ គួរតែចុះទប់ស្កាត់ភ្លាមៗ ប្រសើជាងរង់ចាំដល់សំណង់ផុសឡើងហើយទើបបង្ក្រាបនោះទេ។
ការធ្វើបែបហ្នឹង មិនខុសពីយកដបសាំងទៅគប់ចូលភ្នក់ភ្លើងកំពុងឆេះនោះទេ ខណៈពេលគេមើលឃើញថាបក្សនយោបាយមួយចំនួន បានប្រឹងប្រែងយកឧទ្យានអង្គរ ដែលត្រូវបានចាត់ទុកជាព្រលឹងជាតិធ្វើជាដើមទន់ ក្នុងការទាក់ទាញការគាំទ្រ។ ជាមួយគ្នាដែរប្រជាពលរដ្ឋម្នាក់ដែលសុំមិនឲ្យបញ្ចេញឈ្មោះបានត្អូញត្អែថា៖ដោយសារតែគ្រួសារគាត់ពុំមានលទ្ធភាពទិញដីនៅក្រៅតំបន់អប្សរាសម្រាប់សង់ផ្ទះ ទើបសម្រេចផ្សងព្រេងទិញដីធ្វើផ្ទះនៅទីនេះ តែពេលនេះប្រហែលដូចគេថា«ប្រាក់ក៏បង់ថង់ក៏ដាចហើយ» មើលទៅ។
ស្ត្រីវ័យជាង៥០ឆ្នាំម្នាក់នោះបានថ្លែងរៀបរាប់ទាំងទឹកមុខក្រៀមក្រំថា«ការប្រថុយផ្សងព្រេងមកសង់ផ្ទះនេះ ព្រោះពេលបោះឆ្នោតរាល់លើក ឃើញគេធ្វើបាន និងរស់នៅជាហូរហែហ្នឹង តែពេលដឹងថាពេលនេះគេតឹងតែងបែបហ្នឹង»។ ប្រាក់ដែលយកមកធ្វើផ្ទះហ្នឹង គឺគ្រួសារគាត់បានទៅខ្ចីបុលពីស្ថាប័នមីក្រូហិរិញ្ញវត្ថុ និងខ្ចីបងប្អូនខ្លះតែពេលនេះចប់ហើយខ្ញុំ។ ប្រតិកម្មឆ្លើយតបទៅនឹងការលើកឡើងខាងលើ អភិបាលខេត្តសៀមរាប លោក ឃឹម ប៊ុនសុង បានមានប្រសាសន៍ថា«យើងម្នាក់ៗសុទ្ធតែបានដឹងហើយថាតំបន់អង្គរ មិនត្រូវបានអនុញ្ញាតឲ្យសង់សំណងថ្មីទេ ជាពិសេសពេលចាប់ផ្តើមសង់ មន្ត្រីអប្សរាគេបានចុះទៅធ្វើការពន្យល់ឃាត់អស់ហើយតែពួកគាត់មិនស្តាប់ ដូច្នេះដើម្បីប្រយោជន៍ជាតិទាំងមូលមានតែសុំការយោគយល់ហើយ មិនអាចអនុគ្រោះបានទេ»៕
ចែករំលែកព័តមាននេះ