នាយករដ្ឋមន្ត្រីវៀតណាមដាស់តឿនអាជ្ញាធរ ក្រោយមានការស្នើដំឡើងថ្លៃអគ្គិសនី
វៀតណាម ៖ នាយករដ្ឋមន្ត្រីវៀតណាម លោក ផាំ មិញជិញ (Pham Minh Chinh) បានដាស់តឿន
វៀតណាម ៖ នាយករដ្ឋមន្ត្រីវៀតណាម លោក ផាំ មិញជិញ (Pham Minh Chinh) បានដាស់តឿនអាជ្ញាធរខ្លួនថា ការដំឡើងថ្លៃអគ្គិសនី ដែលស្នើឡើងដោយអគ្គិសនីរដ្ឋវៀតណាម គួរតែត្រូវបានរក្សាឱ្យសមហេតុផល និងស្របតាមប្រាក់ចំណូលពិតប្រាកដរបស់ប្រទេសវៀតណាម។ នេះបើយោងតាមប្រភពពីសារព័ត៌មាន ចេញផ្សាយកាលពីថ្ងៃទី០៤ ខែកុម្ភៈ កន្លងទៅ។
លោកនាយករដ្ឋមន្ត្រី មិញជិញ បានថ្លែងនៅក្នុងវេទិកាមួយ កាលពីថ្ងៃទី០៣ ខែកុម្ភៈ ថា «តម្លៃអគ្គិសនីក្នុងប្រទេសវៀតណាម មិនអាចដូចនឹងប្រទេសអភិវឌ្ឍន៍ទេ ប្រសិនបើតម្លៃខ្ពស់ពេក ប្រជាជន អាជីវកម្ម រួមនិងសេដ្ឋកិច្ច នឹងមិនអាចទ្រាំទ្របានឡើយ។ ដូច្នេះក្រសួងឧស្សាហកម្ម និងពាណិជ្ជកម្ម ត្រូវតែគ្រប់គ្រងតម្លៃដោយគ្មានការផ្លាស់ប្តូរភ្លាមៗ ដើម្បីរក្សាអតិផរណាឱ្យស្ថិតក្រោមការគ្រប់គ្រង និងធានាបានថា កំណើនផលិតកម្មកើនឡើង»។
អគ្គិសនីរដ្ឋវៀតណាម (EVN) បានស្នើសុំដំឡើងថ្លៃលក់រាយ បន្ទាប់ពីបានប្រកាសពីការខាតបង់ចំនួន ៣១ទ្រីលានដុង ដែលស្មើនឹង ១.៣ពាន់លានដុល្លារអាមេរិក កាលពីឆ្នាំមុន ខណៈដែលក្រសួងឧស្សាហកម្ម និងពាណិជ្ជកម្ម កំពុងពិនិត្យលើសំណើមួយនេះ។
តម្លៃអគ្គិសនីលក់រាយរបស់វៀតណាមបច្ចុប្បន្ន ស្ថិតនៅតម្លៃ ០.០៨ដុល្លារ ក្នុងមួយគីឡូវ៉ាត់ម៉ោង ហើយតម្លៃមិនមានការប្រែប្រួលទេ ចាប់តាំងពីខែមីនា ឆ្នាំ២០១៩។ តម្លៃអគ្គិសនីរបស់វៀតណាម គឺទាបជាងហ្វីលីពីន ៥០% ដែលជាប្រទេសមានតម្លៃអគ្គិសនីថ្លៃជាងគេ នៅអាស៊ីអាគ្នេយ៍ ហើយតម្លៃនៅវៀតណាម ក៏ទាបជាងតម្លៃនៅឥណ្ឌូនេស៊ី និងថៃ ផងដែរ។ ប៉ុន្តែតម្លៃនេះ ថ្លៃជាងនៅឡាវ រុស្ស៊ី បង់ក្លាដែស ឥណ្ឌា និងតួកគី។ នេះបើតាមប្រភពពីវេទិកាទិន្នន័យថាមពល GlobalPetroPrices បានចេញផ្សាយ។
នាយករដ្ឋមន្ត្រីវៀតណាម ក៏បានអំពាវនាវដល់ឧស្សាហកម្មថាមពល ឱ្យពិនិត្យមើលបញ្ហាទាក់ទងនឹងការផ្គត់ផ្គង់ ការបញ្ជូន ការចែកចាយ និងការប្រើប្រាស់អគ្គិសនី។ លោកបានជំរុញអ្នកធ្វើសេចក្តីសម្រេចចិត្តឱ្យជួយវៀតណាម ទាញយកប្រយោជន៍ពីសក្តានុពលនៃថាមពលខ្យល់ និងពន្លឺព្រះអាទិត្យ។ ដោយលោកបានបន្តថា ប្រទេសវៀតណាម គួរតែបដិសេធពីការបង្កើតគម្រោងថាមពលថ្មី ដោយមិនអាចបញ្ជូនថាមពល ដែលទើបផលិតថ្មី ឆ្លងកាត់តាមតំបន់។
បន្ថែមលើសពីនេះ លោក មិញជិញ បាននិយាយថា ផែនការអភិវឌ្ឍន៍ថាមពលលេខ៨ របស់វៀតណាម ដែលបង្ហាញអំពីផែនការថាមពល សម្រាប់រយៈពេល១០ក្រោយ នៅតែស្ថិតក្នុងដំណើរការ ដែលត្រៀមនឹងបញ្ចប់នៅឡើយ។ លោកបានសន្និដ្ឋានថា គុណភាពនៃផែនការ គឺសំខាន់ជាងល្បឿន ដែលវានឹងត្រូវបញ្ចប់៕
ចែករំលែកព័តមាននេះ