ខេត្តសៀមរាប ៖ កម្លាំងសមត្ថកិច្ចចម្រុះនៃស្រុកស្វាយលើ បានសហការគ្នាជួយពន្លត់ភ្លើងឆេះចម្ការពូជឈើធ្នង់ ដែលស្ថិតក្នុងភូមិសាស្ត្រស្រុកស្វាយលើ ត្រូវបានអគ្គិភ័យឆាបឆេះអស់ប្រមាណ១០ហិកតាឯណោះ ដោយសារតែភ្លើងបានរាលឆេះពីស្រែរបស់អ្នកភូមិដុតកញ្ច្រាំងទុកចោលក្នុងរដូវប្រាំង ។
បើតាមលោក ម៉ែន វុទ្ធី នាយសង្កាត់រដ្ឋបាលព្រៃឈើស្វាយលើបានឱ្យដឹងនៅវេលាម៉ោង១៥ និង៣០នាទីថ្ងៃទី៣ ខែកុម្ភ: ឆ្នាំ២០២៣ នេះថា បន្ទាប់ពីលោកទទួលបានព័ត៌មាន ករណីភ្លើងឆេះក្នុងចំការពូជឈើធ្នង់ នៅរសៀលថ្ងៃទី០២ ខែកុម្ភៈ ឆ្នាំ២០២៣ លោកបានរាយការណ៍ទៅថ្នាក់លើ ដើម្បីសុំការជួយអន្តរាគមន៍។
គ្រានោះ លោក អៀង ពិសិដ្ឋ អភិបាលស្រុកស្វាយលើ បានចាត់ឲ្យកម្លាំងចម្រុះដើម្បីចុះជួយអន្តរាគមន៍ពន្លត់ភ្លើងដែលឆេះរាលក្នុងចំការពូជឈើធ្នង់ ។ លោកបន្តថា កម្លាំងអធិការដ្ឋាននគរបាលស្រុកស្វាយលើ បានយករថយន្តពន្លត់អគ្គិភ័យ១គ្រឿង ចុះដល់ទីតាំងដែលភ្លើងកំពុងឆេះរាលដាល ហើយបានរាយទុយោធ្វើការបា.ញ់ទឹកពន្លត់អណ្តាតភ្លើងឆេះរាលដាលខ្លាំង និងកម្លាំងខ្លះទៀតបានកាច់មែកឈើដើរវាយពន្លត់តាមជួរភ្លើងឆេះរាលដាលតូចៗ។
លោកបន្ថែមថា ការចុះអន្តរាគមន៍ពន្លត់ភ្លើងព្រៃនេះ ក្រុមការងារប្រើរយៈពេលជាង២ម៉ោងទើបអាចគ្រប់គ្រងស្ថានការណ៍បាននិងពន្លត់រំលត់ចប់ជាស្ថាពរនៅវេលាម៉ោង១៧និង២០នាទីថ្ងៃដដែល។ លោកបញ្ជាក់ថា មូលហេតុដែលបង្កជាភ្លើងឆេះរាលដាលចូលចម្ការពូជឈើធ្នង់ នេះគឺដំបូងឆេះចេញពីវាលស្រែរបស់តាក្របី
(មិនស្គាល់នាមត្រកូល) ដែលនៅខាងត្បូងក្រៅក្រវាត់ព្រំចំការ ហើយទំហំនៃការឆេះខូចខាតក្នុងចំការពូជឈើធ្នង់នេះគឺឆេះអស់ប្រហែល១០ហិកតា ។
សូមរំលឹកផងដែរថា ក្នុងរដូវប្រាំងនេះ ភ្លើងឆេះព្រៃអាចកើតឡើងជាយថាហេតុ ដូច្នេះ សូមពលរដ្ឋនិងសមត្ថកិច្ចមេត្តាបង្កើនការប្រុងប្រយ័ត្នឱ្យបានខ្ពស់ថែមទៀត ទាំងដីព្រៃនិងផ្ទះសម្បែង។ ជាមួយគ្នានោះដែរ ក៏មានជនខិលខូចមួយចំនួនតែងតែមានគំនិតមិនល្អដុតព្រៃ ដើម្បីរានយកព្រៃ រដ្ឋធ្វើជាកម្មសិទ្ធិរបស់ខ្លួន៕
ចែករំលែកព័តមាននេះ