ខេត្តក្រចេះ ៖ ប្រធានគណៈបញ្ជាការឯកភាពស្រុកស្នួល លោកសាម ណាល់ បានណែនាំដល់កម្លាំងអធិការដ្ឋាន ផ្នែករដ្ឋបាលព្រៃឈើ មន្ទីរបរិស្ថាន កងកម្លាំង មានសមត្ថកិច្ច ត្រូវអនុវត្តឲ្យបានត្រឹមត្រូវតាមតួនាទីភារកិច្ច ជាពិសេសត្រូវមានវិធានាការទប់ស្កាត់ និងបង្ក្រាប់ឲ្យខានតែបាន នូវបទល្មើសនានា និងការដឹងជញ្ជូនធ្យូងឆ្លងទៅប្រទេសវៀតណាម ។ ការរំលឹកឡើងបែបនេះ នៅក្នុងកិច្ចប្រជុំបូកសរុបលទ្ធផលការងារប្រចាំខែមករា និងទិសដៅខែកុម្ភៈ ឆ្នាំ២០២៣ ក្នុងសាលប្រជុំសាលាស្រុក កាលពីថ្ងៃទី០២ ខែកុម្ភៈ ឆ្នាំ ២០២៣។
លោកអភិបាលស្រុក បានជម្រុញមន្ដ្រីច្រកព្រំដែនតាមខ្សែបន្ទាប់ព្រំដែនកម្ពុជា-វៀតណាម និងសមត្ថកិច្ចពាក់ព័ន្ធត្រូវអនុវត្តឲ្យបានត្រឹមត្រូវតាមតួនាទីភារកិច្ច សំដៅលើសមត្ថកិច្ចគ្រប់គ្រង ការថែរក្សា និងការពារ ដោយត្រូវចាត់វិធានការណ៍ឲ្យបានហ្មត់ចត់ ដើម្បីបង្ក្រាប់ និងលុបបំបាត់បទល្មើសធនធម្មជាតិក្នុងភូមិសាស្ដ្រស្រុកស្នួល បន្ថែមពីលើនោះ លោកអភិបាល ជម្រុញឲ្យអាជ្ញាធរស្រុក ត្រូវពិនិត្យឡើងវិញនូវការធ្វើអាជីវកម្ម សិប្បកម្ម ដែលមិនមានច្បាប់អនុញ្ញាត។
គូសបញ្ជាក់ដែរថា ពាក់ព័ន្ធនិងករណីព្រៃឈើខាងលើនេះ លោក ទ្រី សុភក្រ័ ប្រធានមន្ទីរកសិកម្មខេត្តក្រចេះ បានបញ្ជាក់ ក្នុងសន្និសីទកាសែត កាលពីថ្ងៃទី៣១ ខែមករា ថា រឿងបទល្មើសព្រៃឈើ ក្នុងស្រុកសំបូរ និងស្រុកស្នួល គឺបង្ក្រាបមិនចេះអស់នោះទេ តែយើងនៅតែបន្ដព្យាយាមបង្ក្រាប។
ចែករំលែកព័តមាននេះ