ខេត្តស្វាយរៀង ៖ ប្រជាពលរដ្ឋចំនួន២ភូមិកំពុងតែក្តៅក្រហាយជាមួយក្រុមរថយន្តដឹកដី ដែលកំពុងតែបំផ្លាញផ្លូវលំចំនួន៣ខ្សែ មានប្រវែងជិត៤,០០០ម៉ែត្រ បណ្តាលឲ្យបាក់ស្រុតខូច និងហុយធូលីដីចូលលំនៅឋានធ្វើឲ្យប៉ះពាល់ដល់សុខភាពប្រជាពលរដ្ឋយ៉ាងខ្លាំង។ ករណីប្រជាពលរដ្ឋតវ៉ានេះ កើតឡើងនៅវេលាម៉ោង៩និង១០នាទីព្រឹក ថ្ងៃទី២ ខែកុម្ភៈ ឆ្នាំ២០២៣ ស្ថិតនៅភូមិទន្លៀង ឃុំរមាំងថ្កោល ស្រុកស្វាយទាប និងភូមិស្រម៉ជ្រំ សង្កាត់សង្ឃ័រ ក្រុងស្វាយរៀង។
បើតាមប្រជាពលរដ្ឋនៅភូមិស្រម៉ជ្រំ សង្កាត់សង្ឃ័រ ក្រុងស្វាយរៀង បានប្រាប់កោះសន្តិភាពឱ្យដឹងថា មានក្រុមអាជីវកម្មជីករណ្តៅដីយកអាចម៍ដីលក់ បានជីករណ្តៅដីជ្រៅជម្រៅ១០ម៉ែត្របង្កឲ្យប្រជាពលរដ្ឋមានការព្រួយបារម្ភ ខ្លាចបាក់ដីស្រែរបស់ពួកគាត់នៅពេលរដូវវស្សា និងខ្លាចធ្លាក់គោក្របីចូលក្នុងរណ្តៅដី ជាពិសេសបច្ចុប្បន្ននេះ រថយន្តធុនធំដឹកអាចម៍ដីជាច្រើនគ្រឿង បានកំពុងបំផ្លាញផ្លូវលំចំនួន២ខ្សែ ធ្វើឱ្យស្រុតខូចប្រវែងជាង២,០០០ម៉ែត្រ និងបង្កឱ្យហុយធូលីដីចូលផ្ទះរបស់ពួកគាត់ទៀត។
ទាក់ទិនករណីខាងលើនេះដែរ លោកស្រី សុក ណន ចៅសង្កាត់សង្ឃ័រ បានមានប្រសាសន៍ថា លោកស្រីបានហៅម្ចាស់អាជីវកម្មមកធ្វើកិច្ចសន្យា និងឲ្យជួសជុលផ្លូវឲ្យប្រជាពលរដ្ឋវិញ នៅពេលចរាចរណ៍រថយន្តដឹកដីខូចផ្លូវធ្ងន់ធ្ងរប៉ះពាល់ការធ្វើដំណើររបស់ប្រជាពលរដ្ឋ ហើយម្ចាស់អាជីវកម្មសុំពេល២ថ្ងៃទៀត ដើម្បីដឹកខ្សាច់ភ្នំមកជួសជុល។
ចំណែកប្រជាពលរដ្ឋរស់នៅភូមិទន្លៀង ឃុំរមាំងថ្កោល ស្រុកស្វាយទាប ដែលនៅជាប់ព្រំប្រទល់ភូមិស្រម៉ជ្រំ ក៏បានប្រាប់កោះសន្តិភាពឱ្យដឹងដែរថា មានរថយន្តធុនធំជាច្រើនគ្រឿងរបស់ក្រុមហ៊ុន «ម៉ីសម្បត្តិ» បានចរាចរណ៍ដឹកអាចម៍ដី ក៏បានបំផ្លាញផ្លូវលំមួយខ្សែប្រវែងជិត២,០០០ម៉ែត្រ ឱ្យក្លាយទៅជារណ្តៅ ជង្ហុកសំបុកមាន់ ធ្វើឱ្យពិបាកក្នុងការធ្វើដំណើរ និងហុយធូលីដីចូលផ្ទះរបស់ពួកគាត់ ធ្វើឲ្យប៉ះពាល់ដល់សុខភាពយ៉ាងខ្លាំង។
ហើយទាក់ទិនករណីនេះដែរ លោកមេឃុំរមាំងថ្កោល ក៏បានប្រាប់ឲ្យដឹងដែរថា លោកបានហៅក្រុមហ៊ុន «ម៉ីសម្បត្តិ» ដែលជាតំណាងសម្របសម្រួលឲ្យធ្វើកិច្ចសន្យាជួសជុលផ្លូវក្រាលខ្សាច់ភ្នំ និងដាក់លូកាត់ថ្នល់ដែលបែកខូចសងប្រជាពលរដ្ឋវិញ ក៏ប៉ុន្តែរហូតមកដល់ថ្ងៃទី២ ខែកុម្ភៈនេះ មិនទាន់ឃើញជួសជុលផ្លូវ និងដាក់លូសងប្រជាពលរដ្ឋវិញនៅឡើយទេ ដូច្នេះលោកនឹងចាត់ក្រុមប្រឹក្សាឃុំឲ្យចុះទៅពិនិត្យមើល និងឃាត់ឲ្យក្រុមហ៊ុនផ្អាកសកម្មភាព មួយរយៈដើម្បីជួសជុលផ្លូវ និងដាក់លូសងប្រជាពលរដ្ឋវិញ។
ចំណែកលោក ប៉ុក តក ប្រធានមន្ទីររ៉ែ និងថាមពលខេត្តស្វាយរៀង ក៏បានមានប្រសាសន៍ថា ចំពោះការផ្តល់អាជ្ញាប័ណ្ណ ការធ្វើអាជីវកម្មជីករណ្តៅដីយកអាចម៍ដីលក់នេះ មិននៅក្រោមមន្ទីររ៉ែ និងថាមពលខេត្តទៀតទេ។ ក្រសួងបានប្រតិភូកម្មឲ្យទៅរដ្ឋបាលក្រុងស្រុករាជធានីខេត្ត ជាអ្នកចេញអាជ្ញាបណ្ណ័ បើក្រុងស្រុក អនុញ្ញាតិជីជម្រៅ៣ម៉ែត្រ បើរដ្ឋបាលខេត្ត ជីករណ្តៅបានជម្រៅ០៥ម៉ែត្រ ហើយបើម្ចាស់អាជីវកម្មជីកជម្រៅដល់១០ម៉ែត្រ គឺខុសច្បាប់ហើយ។
បើយោងតាមបុរសម្នាក់ដែលជាមេការឲ្យម្ចាស់ដីឈ្មោះ មី រតនា នៅភូមិថ្មី សង្កាត់សង្ឃ័រ ក្រុងស្វាយរៀង បានឲ្យដឹងថា រថយន្តដឹកអាចម៍ដី យកមកចាក់លើដីស្រែឲ្យឈ្មោះ ម៉ី រតនា នៅភូមិថ្មី សង្កាត់សង្ឃ័រ ធ្វើជាដីលំនៅឋាន (ដីឡូតិ៍) ទំហំជាង៣ហិកតា កម្ពស់០,៦០ម៉ែត្រ។
បើតាមមន្ត្រីសុរិយោដី ម្នាក់បានបង្ហើបឲ្យដឹងថា ការផ្លាស់ប្តូរដីកសិកម្មមកជាដីលំនៅឋាន ជាដីឡូតិ៍លក់ ដែលមានទំហំធំជាង៣ហិកតា ត្រូវលើកគម្រោងសុំច្បាប់ដល់ក្រសួង ទើបអាចដំណើរការចាក់ដីបាន។
លោក ណុប ចំរើន អភិបាលក្រុងស្វាយរៀង បានប្រាប់កោះសន្តិភាពដែរថា ក្រុមអាជីវកម្ម ម៉ីសម្បត្តិ បានមកសុំច្បាប់ពីសាលាក្រុងស្វាយរៀង ធ្វើអាជីវកម្មជីករណ្តៅដី ទំហំក្រោម១ហិកតា ដើម្បីយកអាចម៍ដីចាក់លើកដីលំនៅឋានឲ្យឈ្មោះ ម៉ី រតនា នៅភូមិថ្មី។ ហើយចំពោះច្បាប់ជីករណ្តៅដី លោកអភិបាលក្រុងស្វាយរៀង បានអនុញ្ញាតិក្រោម១ហិកតា ជីករណ្តៅជម្រៅ០៣ម៉ែត្រ។ ប្រសិនបើជីកជម្រៅដល់១០ម៉ែត្រ លោកនឹងឲ្យក្រុមការងារសាលាក្រុង និងមន្ត្រីមន្ទីររ៉ែ និងថាមពលចុះទៅពិនិត្យដោះស្រាយ។
ព័ត៌មានបន្ថែមនឹងមានផ្សាយជូននៅលើកាសែតកោះសន្តិភាព៕
ចែករំលែកព័តមាននេះ