ខេត្តតាកែវ ៖ យោងតាមពាក្យបណ្ដឹង១ច្បាប់របស់ប្រជាពលរដ្ឋរស់នៅភូមិទួលសាំង ឃុំអង្គរបុរី ស្រុកអង្គរបុរី ខេត្តតាកែវ បានអោយដឹងថា ពួកគាត់បានដាក់ពាក្យបណ្ដឹងតាំងពីថ្ងៃទី១១ ខែមករា ឆ្នាំ២០២៣ រហូតមកទល់ពេលនេះ អភិបាលស្រុកអង្គរបុរីនៅមិនមានចំណាត់ការអោយពួកគាត់នោះទេ រហូតពួកគាត់ទៅសុំដកពាក្យបណ្ដឹងវិញដើម្បីបន្តទៅប្ដឹងនៅសាលាខេត្តតាកែវវិញម្ដង ។
គួរបញ្ជាក់ថា កាលពីពេលកន្លងមកនេះ មានករណីមួយបានកើតឡើង បុរសម្នាក់រស់នៅស្រុកអង្គរបូរី និងបក្ខពួកមួយក្រុមមិនស្គាល់អត្តសញ្ញាណដែលតាំងខ្លួនជាខ្សែឧបនាយករដ្ឋមន្ត្រី បាននាំគ្នាទៅរុះរើម៉ាស៊ីស្ថានីយបូមទឹកប្រជាពលរដ្ឋដែលកំពុងបម្រើការស្រោចស្រពស្រូវប្រាំងរាប់សិបហិចតា ស្ថិតនៅភូមិទួលសាំងក ឃុំអង្គរបូរី ស្រុកអង្គរបូរី ខេត្តតាកែវ ត្រូវបានម្ចាស់ស្ថានីយដាក់ពាក្យប្តឹងទៅកងរាជអាវុធហត្ថខេត្តតាកែវ ក្នុងបទបំផ្លិចបំផ្លាញដោយចេតនា ទ្រព្យសម្បត្តិអ្នកដទៃ ។
បុគ្គលឈ្មោះ ផាន់ ដា និងបក្សពួកមួយក្រុមមិនស្គាល់អត្តសញ្ញាណតាំងខ្លួនជាខ្សែអ្នកធំ ខ្សែឧបនាយករដ្ឋមន្ត្រី បានទៅគំរាមកំហែង ម្ចាស់ស្ថានីយបូមទឹក និងបានរុះរើបំផ្លិចបំផ្លាញម៉ាស៊ីនបូមទឹកចេញ យកម៉ាស៊ីនខ្លួនទៅដាក់ជុំនួសវិញ ត្រូវបានប្រជាពលរដ្ឋដាក់ពាក្យប្តឹងទៅកម្លាំងកងរាជអាវុធហត្ថខេត្តតាកែវ ស្រាវជ្រាវបុគ្គលមួយក្រុមខាងលើយកមកសួរនាំ ។ ពលរដ្ឋបានបង្ហើបថា ឈ្មោះ ផាន់ ដា កាន់លិខិតមួយច្បាប់ ដែលមានចុះហត្ថលេខា ដោយលោក មេឃុំអង្គរបូរី និងលោក រស់ ប៊ុនធឿន ចៅហ្វាយស្រុកអង្គរបូរី ទៅគម្រាមកំហែងពួកគាត់ ឲ្យរើម៉ាស៊ីបូមទឹកចេញទាំងដែលកំពុងបូមទឹកដាក់ស្រែសុខៗ។
ក្រោយផ្ទុះរឿងរុះរើម៉ាស៊ីនប៉ូមទឹកដាក់ស្រែប្រជាពលរដ្ឋនេះ ងាកមកមើលមន្ទីរជំនាញពាក់ព័ន្ធ មានលោក ញ៉ឹម ស្រ៊ន ប្រធានមន្ទីរកសិកម្ម និងលោក ប៉ុន ហ៊ួ ប្រធានមន្ទីរធនធានទឹក និងឧតុនិយមវិញ សំងំយកសុខរៀងៗខ្លួន ដោយមិនមានវិធានការណ៍ដោះស្រាយសោះ សូម្បីទៅអើតមើលក៏មិនទៅក្បែរផង ។ ក្រុមប្រជាពលរដ្ឋដែលប្រើប្រាស់ទឹកក្នុងស្ថានីយខាងលើ សុំសំណូមពទៅលោក អ៊ូច ភា អភិបាលនៃគណៈអភិបាលខេត្តតាកែវ មេត្តាមានវិធានការណ៍ដោះស្រាយរកយុត្តិធម៌ជូនពួកគាត់ផង ពិសេស សុំពិនិត្យមើលការងារ លោក រស់ ប៊ុនធឿន ចៅហ្វាយស្រុកអង្គរបូរី ។
សូមរំលឹកផងដែរថា លោក រស់ ប៊ុនធឿន ចៅហ្វាយស្រុកអង្គរបូរី ដែលគេមើលឃើញថា ចូលចិត្តដើរច្រៀងខារ៉ាអូខេ ផឹកស៊ី សឹងតែរាល់ថ្ងៃកំពុងបង្កើតរឿងអាស្រូវពេញស្រុក បង្កើតបក្ខពួកប្រព្រឹត្តអំពើពុករលួយ ដូចជាករណីកាយថ្មភ្នំបូរីដែលជាភ្នំប្រវត្តិសាស្ត្រលក់ បញ្ជាមន្ត្រីក្រោមឳវាទចុះទៅវាស់វែងដីមានទំនាស់តាមភាគីម្ខាងបញ្ជាទាំងទទឹងទិសខុសទៅនិងនីតិវិធីទៀត ។ លើសពីនេះ កាលពីប៉ុន្មានថ្ងៃមុននេះ បានដឹកនាំមន្ត្រីទាំងប្រុស ទាំងស្រី ក្នុងសាលាស្រុកចូលច្រៀងខារ៉ាអូខេទាំងថ្ងៃក្នុងម៉ោងធ្វើការទៀតផង ។
ព័ត៌មានលម្អិតនឹងមានផ្សាយជូនលើកាសែតកោះសន្តិភាព។
ចែករំលែកព័តមាននេះ