ខេត្តកំពង់ស្ពឺ ៖ ប្រធានការិយាល័យត្រួតពិនិត្យនៃសាខាគយ និងរដ្ឋាករខេត្តកំពង់ស្ពឺ លោក ប្រាក់ សុចិត្រា បានពិនិត្យឃើញថា រថយន្តស៊េរីទំនើបមួយគ្រឿងរបស់ឈ្មោះ អ៊ុន…
ខេត្តកំពង់ស្ពឺ ៖ ប្រធានការិយាល័យត្រួតពិនិត្យនៃសាខាគយ និងរដ្ឋាករខេត្តកំពង់ស្ពឺ លោក ប្រាក់ សុចិត្រា បានពិនិត្យឃើញថា រថយន្តស៊េរីទំនើបមួយគ្រឿងរបស់ឈ្មោះ អ៊ុន សុខុម មានឋានន្តរស័ក្តិថ្នាក់វរសេនីយ៍ទោ បម្រើការងារនៅពន្ធនាគារខេត្តកំពង់ស្ពឺ មិនមានពន្ធនាំចូលដែលចតចោលនៅមុខផ្ទះ។ ការរឹបអូសនេះ បានធ្វើឡើងនៅចំណុចមុខផ្ទះក្នុងភូមិត្រស់សាលា សង្កាត់ស្វាយក្រវ៉ាន់ ក្រុងច្បារមន ខេត្តកំពង់ស្ពឺ នៅវេលាម៉ោងប្រមាណជា៨និង២០នាទីព្រឹកថ្ងៃទី៣០ ខែមករា ឆ្នាំ២០២៣នេះ ។
លោក ប្រាក់ សុចិត្រា បានឱ្យដឹងថា ដោយមានការសង្ស័យលើរថយន្តមួយគ្រឿងប្រភេទឡិចស៊ីស400h បំពាក់ស្លាកលេខ(ន.ប)នគរបាល2-5156 ដែលចតចោលនៅមុខផ្ទះ កម្លាំងជំនាញបានចុះទៅពិនិត្យ និងសួរនាំរកឯកសារពាក់ព័ន្ធ។ ក្រោយពិនិត្យនិងយោងតាមចម្លើយសារភាពរបស់ម្ចាស់យានយន្តកម្លាំងជំនាញក៏បាននាំយករថយន្តនោះទៅកាន់សាខាគយ និងរដ្ឋាករខេត្ត ដើម្បីកសាងឯកសារឱ្យម្ចាស់ចូលខ្លួនបំពេញកាតព្វកិច្ចបង់ពន្ធជូនរដ្ឋ។
សូមបញ្ជាក់ថា យោងតាមការឱ្យដឹងពីភរិយារបស់ឈ្មោះ អ៊ុន សុខុម បានបញ្ជាក់ថា រថយន្តនេះ បានទិញមកជិះច្រើនឆ្នាំហើយដោយឃើញវាថោក ហើយស្អាតអាចជិះបំពេញការងារបាន ក៏សម្រេចទិញវាមកជិះ តែមិននឹកស្មានថា ត្រូវគយចាប់ដូច្នេះទេ ។ ទោះជាយ៉ាងនេះក៏ដោយគាត់ថា មិនជំទាស់នឹងការចាប់របស់ក្រុមគយទេ បើគយគិតថា រថយន្តគាត់ជិះមិនស្របច្បាប់គយចាប់ចុះ ហើយបើឱ្យបង់ពន្ធគាត់គ្មានលទ្ធភាពទេ។ ម្យ៉ាងវិញទៀត ប្រសិនបង់ពន្ធក៏គាត់មិនដឹងបង់ធ្វើអ្វីដែរ បើរថយន្តកាត់តជាច្រើនកំណាត់អញ្ចឹងនោះ ។
ពាក់ព័ន្ធនឹងការចាប់រថយន្តស្លាកលេខន.បរបស់មន្ត្រីពន្ធនាគារខាងលើ សាធារណៈជនបាននិយាយថា បច្ចុប្បន្ន ក្នុងខេត្តកំពង់ស្ពឺមានរថយន្តអត់ពន្ធច្រើនដែលបាននិងកំពុងចរាចរណ៍ធ្វើអាជីវកម្មដោយរថយន្តភាគច្រើនជ្រកក្រោមស្លាកលេខសមត្ថកិច្ច ពិសេសគឺ រថយន្តធុនធំធ្វើអាជីវកម្មដឹកដី ដឹកខ្សាច់ នៅតាមការដ្ឋាន ។
ព័ត៌មានលម្អិតនឹងមានផ្សាយជូនបន្តលើកាសែតកោះសន្តិភាព ។
ចែករំលែកព័តមាននេះ