ទីបំផុតបុរសម្នាក់ដែលមានឈ្មោះថា «ភេ អ៊ីម» អតីតអភិបាលស្រុកស៊ីធរកណ្តាល និងជាអតីតសមាជិកក្រុមប្រឹក្សាខេត្តព្រៃវែង ត្រូវបានសាលាដំបូងរាជធានីភ្នំពេញ សម្រេចឃុំខ្លួនក្នុងពន្ធនាគារព្រៃ.សហើយ ក្រោយពីតុលាការ និងអាជ្ញាធរមានសមត្ថកិច្ចបានស៊ើបអង្កេតរកឃើញថា
រាជធានីភ្នំពេញ ៖ ទីបំផុតបុរសម្នាក់ដែលមានឈ្មោះថា «ភេ អ៊ីម» អតីតអភិបាលស្រុកស៊ីធរកណ្តាល និងជាអតីតសមាជិកក្រុមប្រឹក្សាខេត្តព្រៃវែង ត្រូវបានសាលាដំបូងរាជធានីភ្នំពេញ សម្រេចឃុំខ្លួនក្នុងពន្ធនាគារព្រៃ.សហើយ ក្រោយពីតុលាការ និងអាជ្ញាធរមានសមត្ថកិច្ចបានស៊ើបអង្កេតរកឃើញថា បុរសរូបនេះបានក្លែងលិខិត និងឯកសារជាច្រើន ដើម្បីបង្ខូចកេរ្តិ៍ឈ្មោះឯកឧត្តម ប្រាក់ សុវណ្ណ ប្រធានក្រុមប្រឹក្សាខេត្តព្រះវិហារ និងលោកជំទាវ ស ចេង ថាបានស៊ីដាច់ដីរបស់ខ្លួន ។
ការចាប់ខ្លួន និងឃុំខ្លួនបុរសឈ្មោះ ភេ អ៊ីម ដាក់ពន្ធនាគារព្រៃ.ស បានឆ្លុះបញ្ចាំងឱ្យឃើញថា ឯកឧត្តម ប្រាក់ សុវណ្ណ និងលោកជំទាវ ស ចេង ជាមនុស្សស្អាតស្អំ និងមិនបានពាក់ព័ន្ធលើដីចំនួន២ទីតាំង ដែលបុគ្គល ភេ អ៊ីម ចោទប្រកាន់នោះទេ ។ ដីចំនួន ២ ទីតាំង ដែលបុគ្គលឈ្មោះ ភេ អ៊ីម បានក្លែងឯកសារនោះ គឺទីតាំងទី១ មានទំហំដី ៧៥០ ម៉ែត្រ x ៨០០ ម៉ែត្រ ស្មើនឹង ៦០ ហិកតា នៅចំណុចស្វាបៀក ភូមិវាលស្មាច់ ឃុំក្របៅ ស្រុកកំចាយមារ ខេត្តព្រៃវែង និងដីមួយកន្លែងទៀត មានទំហំដី ៣០០ ម៉ែត្រ x ៨០០ ម៉ែត្រ ស្មើនឹង ២៤ ហិកតា ស្ថិតនៅចំណុចត្រពាំងគូ ភូមិត្បូងវត្ត ឃុំក្របៅ ស្រុកកំចាយមារ ខេត្តព្រៃវែង នោះ ការពិតដីនោះជាកម្មសិទ្ធិប្រជាពលរដ្ឋ និងមានប្រជាពលរដ្ឋ ដែលជាម្ចាស់ដីគេអាស្រ័យផលលើដីចម្ការគេរាល់ថ្ងៃ ។
សូមបញ្ជាក់ថា ដីទាំង ២ ទីតាំងខាងលើនេះ កន្លងមក មានបុគ្គលឈ្មោះ ភេ អ៊ីម ដែលជាអតីតអភិបាលរងស្រុកកំចាយមារ និងជាអតីតសមាជិកក្រុមប្រឹក្សាខេត្តព្រៃវែង បានក្លែងលិខិត និងឯកសារសាធារណៈជាច្រើនដាក់ជូនសម្តេចក្រឡាហោម ស ខេង រដ្ឋមន្ត្រីក្រសួងមហាផ្ទៃថា រូបលោកកាលពីឆ្នាំ ១៩៩៨ បានឱ្យឯកឧត្តម ប្រាក់ សុវណ្ណ លោក សៅ សុវណ្ណ លោក ចាប អេង ប៊ុន ដួង លោក គង់ ម៉ាឡេត លោក ឥន ភឿន រៀបចំដីឱ្យរូបខ្លួន ។
សូមបញ្ជាក់ទៀតថា បុគ្គល ឈ្មោះ ភេ អ៊ឹម តាមរយៈលិខិតិស្នើសុំអន្តរាគមន៍ ជូនសម្តេចក្រឡាហោម ស ខេង ចុះថ្ងៃទី ៣ ខែតុលា ឆ្នាំ ២០២២ បានចោទប្រកាន់គ្មានការពិតថា ឯកឧត្តម ប្រាក់ សុវណ្ណ និងលោកជំទាវ ស ចេង បានធ្វើលិខិតកាន់កាប់ដីទាំងពីរទីតាំងនោះ ដែលមានចុះហត្ថលេខាភូមិ-ឃុំ ។
យ៉ាងណាមិញ ជុំវិញការចោទប្រកាន់របស់បុគ្គលឈ្មោះ ភេ អ៊ឹម ត្រូវបានលាតត្រដាងការពិតហើយ ក្រោយពីអាជ្ញាធរមានសមត្ថកិច្ចបានចុះស្រាវជ្រាវដល់ទីតាំង និងអ្នកពាក់ព័ន្ធ ហើយជាលទ្ធផលបានបង្ហាញថា ឯកឧត្តម ប្រាក់ សុវណ្ណ និងលោកជំទាវ ស ចេង មិនបានប្រព្រឹត្តដូចការចោទប្រកាន់របស់បុគ្គលឈ្មោះ ភេ អ៊ឹម នោះទេ ព្រោះរូបឯកឧត្តម ប្រាក់ សុវណ្ណ និងលោកជំទាវ ស ចេង មិនមានដី ឬកាន់កាប់ដី ដូចការចោទប្រកាន់ឡើយ ។ ពោលគឺគ្មានដី ៦០ ហិតតា នៅចំណុចស្វាបៀក ភូមិវាលស្មាច់ ឃុំក្របៅ ស្រុកកំចាយមារ ខេត្តព្រៃវែង ពាក់ព័ន្ធឯកឧត្តម ប្រាក់ សុវណ្ណ និងលោកជំទាវ ស ចេង ទេ ។
សំខាន់ជាងនេះទៅទៀត ដីនៅទាំង ២ ទីតាំងខាងលើ គឺមានម្ចាស់ដីទាំងអស់គេអាស្រ័យផលលើដីរបស់គេ ដោយមិនបានចាកចេញទៅណាទេ ហើយឯកឧត្តម ប្រាក់ សុវណ្ណ និងលោកជំទាវ ស ចេង ក៏មិនដែលបានទិញដីពីបងប្អូនប្រជាពលរដ្ឋនៅទីតាំងនោះទេ ។
ប្រភពព័ត៌មានទទួលបានឱ្យដឹងថា ចំពោះឯកសារដែលបុគ្គល ភេ អ៊ីម ថាមានស្នាមមេដៃប្រជាពលរដ្ឋ ២៤ គ្រួសារលក់ដីឱ្យខ្លួននោះ ក៏ជាឯកសារក្លែងដែរ។ ព្រោះប្រជាពលរដ្ឋ ២៤ គ្រួសារ ដែលបុគ្គលឈ្មោះ ភេ អ៊ីម បានក្លែងឈ្មោះ និងស្នាមមេដៃផងនោះ គឺជាប្រជាពលរដ្ឋដែលពុំមានដីនៅទីតាំងដែលបុគ្គល ភេ អ៊ីម បានលើកឡើងនោះទេ។ ជាងនេះទៅទៀត អត្តសញ្ញាណប្រជាពលរដ្ឋ២៤ គ្រួសារដែលបុគ្គល ភេ អ៊ីម ក្លែងឈ្មោះ និងស្នាមេដៃក្នុងឯកសារថា បានលក់ដីឱ្យរូបខ្លួននោះ គឺជាប្រជាពលរដ្ឋរស់នៅ និងអាស្រ័យផលលើដីរបស់ពួកគេនៅស្រុករបស់ពួកគេ ព្រោះខ្លះជាប្រជាពលរដ្ឋរស់នៅខេត្តស្វាយរៀង ខ្លះរស់នៅព្រំប្រទល់នឹងខេត្តកំពង់ចាម និងខ្លះមកពីស្រុកផ្សេងៗទៀត។
ប្រជាពលរដ្ឋ២៤ គ្រួសារដែលបុគ្គល ភេ អ៊ីម បានលើកឡើងនោះ បានចូលឆ្លើយនៅចំពោះមុខសមត្ថកិច្ច និងនៅសាលាដំបូងរាជធានីភ្នំពេញថា ពួកគាត់មិនដែលស្គាល់ឈ្មោះ និងស្គាល់មុខលោក ភេ អ៊ីម នោះទេ ហើយប្រជាពលរដ្ឋក៏បានអះអាងថា ពួកគាត់មិនដែលបានលក់ដីឱ្យបុគ្គល ភេ អ៊ីម ។ ចំណែកអាជ្ញាធរមូលដ្ឋានភូមិ-ឃុំ ក៏បានឱ្យដឹងថា ពួកគាត់ក៏មិនបានដឹងលឺរឿងថា ភេ អ៊ីម បានទិញដីពីប្រជាពលរដ្ឋទេ ។ ជាសរុបរាល់ឯកសារទាំងអស់ពាក់ព័ន្ធដីខាងលើ គឺបុគ្គលឈ្មោះ ភេ អ៊ីម ជាអ្នកក្លែងទាំងអស់ ។
ក្រោយការស៊ើបអង្កេត បុគ្គលឈ្មោះ ភេ អ៊ីម ត្រូវតុលាការរកឃើញថា បានក្លែងលិខិត និងឯកសារជាច្រើន ដើម្បីបង្ខូចកេរ្តិ៍ឈ្មោះឯកឧត្តម ប្រាក់ សុវណ្ណ និងលោកជំទាវ ស ចេង ។ តែទីបំផុតបុគ្គលឈ្មោះ ភេ អ៊ីម ត្រូវបានតុលាការឃុំខ្លួននៅពន្ធនាគារព្រៃ.ស ពីបទក្លែងលិខិតសាធារណៈ ។
ជាមួយគ្នានោះផងដែរ លោកជំទាវ ស ចេង បានថ្លែងប្រាប់សារព័ត៌មានកោះសន្តិភាពថា ការផ្សាយរបស់សារព័ត៌មានកន្លងមក តាមសម្តីរបស់បុគ្គលឈ្មោះ ភេ អ៊ីម គឺមិនពិតនោះទេ ព្រោះជាសម្តីតែម្ខាង ព្រោះក្រុមគ្រួសាររបស់លោកជំទាវ គឺជាមនុស្សស្អាតស្អំ មិនបានប្រព្រឹត្តដូចការចោទប្រកាន់របស់បុគ្គលឈ្មោះ ភេ អ៊ឹម នោះទេ ។ ហេតុដូច្នេះហើយ បានជាពេលសមត្ថកិច្ចចុះធ្វើការស្រាវជ្រាវលើការចោទប្រកាន់នេះ បានរកឃើញភាពស្អាតស្អំរបស់ស្វាមីលោកជំទាវ គឺឯកឧត្តម ប្រាក់ សុវណ្ណ និងរូបលោកជំទាវផ្ទាល់ ទទួលបាននូវភាពយុត្តិធម៌ ព្រោះមិនបានស៊ីដាច់ដី ឬរំលោ.ភយកដីរបស់បុគ្គលណា ដូចការចោទប្រកាន់របស់បុគ្គលឈ្មោះ ភេ អ៊ីម ទេ ។
ជាក់ស្តែង បុគ្គលដែលចោទប្រកាន់ និងបង្ខូចកេរ្តិ៍ឈ្មោះ ឯកឧត្តម ប្រាក់ សុវណ្ណ និងលោកជំទាវ ក៏ត្រូវបានតុលាការឃុំខ្លួននៅពន្ធនាគារពីបទ «ក្លែងឯកសារជាសាធារណៈ» រឿងដីទាំងពីរទីតាំងខាងលើ ៕
ចែករំលែកព័តមាននេះ