ខេត្តព្រះសីហនុ ៖ លោកវរៈសេនីយ៍ត្រី ភុល ភស្តារ អធិការនគរបាលក្រុងព្រះសីហនុ បានឲ្យដឹងកាលពីព្រឹកថ្ងៃទី២៤ ខែកក្កដា ឆ្នាំ២០១៧ ថា នៅវេលាម៉ោង១៨និង៣០នាទីយប់ ថ្ងៃទី២៣ ខែកក្កដា ឆ្នាំ២០១៧ កម្លាំងនគរបាលប៉ុស្តិ៍រដ្ឋបាលសង្កាត់លេខ៤ សហការណ៍ជាមួយកម្លាំងនគរបាលអធិការក្រុងព្រះសីហនុ បានចុះបង្ក្រាប និងឃាត់ខ្លួនជនបង្កម្នាក់ ដែលបានធ្វើសកម្មភាពយកដុំថ្មវាយទៅលើកញ្ចក់រថយន្តផ្នែកខាងក្រោយ ដែលកំពុងចតស្ងៀមនៅខាងមុខផ្ទះម្ចាស់រថយន្ត បណ្តាលឲ្យរងការខូចខាតទាំងស្រុង ។
លោកអធិការនគរបាលក្រុងព្រះសីហនុបានបន្តឲ្យដឹងទៀតថា ជនបង្កដែលសមត្ថកិច្ចបានឃាត់ខ្លួនមានឈ្មោះ នុប ចាន់លី ហៅឃ្លី ភេទប្រុស អាយុ២៩ឆ្នាំ មុខរបរជាកម្មករសំណង់ មានទីលំនៅក្រុម១ ភូមិ១ សង្កាត់៤ ក្រុង ព្រះសីហនុ ខេត្តព្រះសីហនុ ។
ដោយឡែកជនរងគ្រោះជាម្ចាស់រថយន្ត ឈ្មោះ គ្រឿង ស្រីណែត អាយុ៣០ឆ្នាំ មុខរបរអ៊ុតសក់ និងម៉ាស្សា មានទីតាំងស្ថិតនៅខាងមុខក្លឹបកម្សាន្ត LV ក្រុម២ ភូមិ៤ សង្កាត់៤ ក្រុងព្រះសីហនុ ខេត្តព្រះសីហនុ ។ តាមការរៀបរាប់របស់ស្ត្រីរងគ្រោះជាម្ចាស់រថយន្តបានឲ្យដឹងថា រថយន្តរបស់គាត់ម៉ាកឡិចស៊ីស៣៥០ ពណ៌ស ។ ប្រភពខាងលើបានបន្តឲ្យដឹងទៀតថា មុនកើតហេតុ គាត់បានចតរថយន្តរបស់គាត់ នៅខាងមុខផ្ទះ ស្រាប់តែនៅពេលវេលាខាងលើនោះ ក៏ឮសម្លេងលាន់សូរនៅលើរថយន្តយ៉ាងខ្លាំង ក៏ភ្ញាក់ផ្អើលនាំគ្នារត់មកមើល ក៏ឃើញកញ្ចក់រថយន្តផ្នែកខាងក្រោយបែកខ្ទេចអស់ទៅហើយ និងមានជនម្នាក់កាន់ដុំថ្មមួយផ្ទាំង នៅជាប់ដៃបម្រុងធ្វើសកម្មភាពវាយកម្ទេចរថយន្តបន្ថែមទៀត ឃើញដូចនេះ គាត់ក៏ប្តឹងទៅនគរបាលប៉ុស្តិ៍រដ្ឋបាល និងកម្លាំងនគរបាលអធិការដ្ឋានក្រុងព្រះសីហនុ បានចុះមកជួយអន្តរាគមន៍ឃាត់ខ្លួនបានភ្លាមៗតែម្តង ។
លោក ភុល ភស្តារ អធិការនគរបាលក្រុងព្រះសីហនុ បានបញ្ជាក់បន្ថែមទៀតថា កន្លងមកដោយមានការណែនាំចង្អុលបង្ហាញ ក៏ដូចជាការអនុវត្តទៅតាមបទបញ្ជាដ៏ម៉ឺងម៉ាត់របស់លោកឧត្តមសេនីយ៍ទោ ជួន ណារិន្ទ ស្នងការនគរបាលខេត្តព្រះសីហនុ ក្នុងការការពារសន្តិសុខ សណ្តាប់ធ្នាប់សាធារណៈ ជាពិសេសការអនុវត្តគោលនយោបាយភូមិឃុំមានសុវត្ថិភាព ជូនដល់បងប្អូនប្រជាពលរដ្ឋ ភ្ញៀវទេសចរណ៍ជាតិ អន្តរជាតិ ។ បានឆ្វើការឃាត់ខ្លួនជនខាងលើបានភ្លាមៗផងដែរ ។
ក្រោយពេលឃាត់ខ្លួន ជនបង្ក ត្រូវបាននគរបាលអធិការដ្ឋានក្រុងព្រះសីហនុ ធ្វើការសាកសួរ និងកសាងសំណុំរឿងបញ្ជូនទៅស្នងការដ្ឋាននគរបាលខេត្តព្រះសីហនុ ដើម្បីចាត់ការបន្តទៅតាមនីតិវិធី ។
ចែករំលែកព័តមាននេះ