គ្រូបង្រៀន១រូបស្ម័គ្រចិត្តឈរសម្រួលចរាចរណ៍ដល់សិស្សរាល់ព្រឹក កំពុងទទួលបានការកោតសរសើរ
- កំពង់ឆ្នាំង
ខេត្តកំពង់ឆ្នាំង ៖ លោកពៅ រឿន ជាគ្រូបង្រៀនមួយរូប ដែលធ្វើការនៅទីចាត់ការនៃវិទ្យាល័យក្រុង
ខេត្តកំពង់ឆ្នាំង ៖ លោកពៅ រឿន ជាគ្រូបង្រៀនមួយរូប ដែលធ្វើការនៅទីចាត់ការនៃវិទ្យាល័យក្រុងកំពង់ឆ្នាំងមានទីតាំងនៅភូមិទី ៨ សង្កាត់ខ្សាម ក្រុងកំពង់ឆ្នាំង ដែលបានគិតគូរពីសុវត្ថិភាព ចរាចរណ៍ដល់សិស្សនៃវិទ្យាល័យរបស់លោក ។ ហេតុនេះហើយ គេតែងតែឃើញរូបលោក បានឈរបញ្ជា ចរាចរណ៍ចាប់តាំងពីមុនម៉ោង៧ រហូតដល់ម៉ោង៧ព្រឹក ជារាងរាល់ថ្ងៃ គឺពេលសិស្សចូលអស់ ទើបលោកឈប់ ហើយទៅបំពេញការងាររបស់លោកនៅក្នុងសាលា។
ដោយហេតុនេះហើយ ទើបធ្វើឲ្យលោកគ្រូ អ្នកគ្រូ នាយកសាលា និងអាណាព្យាបាលសិស្ស មានការពេញចិត្តនិងគាំទ្ររូបលោកជាខ្លាំង។
ផ្ដល់បទសម្ភាសន៍ជាមួយអ្នកសារព័ត៌មានកោះសន្តិភាព លោក ពៅ រឿន ដែលមានអាយុ៥៣ឆ្នាំ បានឲ្យដឹងថា លោកបានស្ម័គចិត្តឈរបញ្ជាចរាចរណ៍នៅមុខវិទ្យាល័យក្រុងកំពង់ឆ្នាំងចាប់ពីឆ្នាំ២០១៤ រហូតដល់បច្ចុប្បន្ន ។ ចំពោះឧបករណ៍មានដូចជា សុជី និងស្លាកសញ្ញាចរាចរណ៍ជាដើម គឺបានបន្សល់ពីជំនួយរបស់ជប៉ុនកាលដែលមកជួយការងារនៅសាលាវិទ្យាល័យក្រុង។
ក្នុងការឈរធ្វើចរាចរណ៍ចាប់ពីម៉ោងជាង៥ រហូតដល់ម៉ោង៧ព្រឹកជារៀងរាល់ថ្ងៃ គឺពុំមានទទួលបានប្រាក់កម្រៃអ្វីទាំងអស់ គឺធ្វើដោយស្ម័គ្រចិត្ត ព្រោះតែលោកចង់ឱ្យសិស្សមានសុវត្ថិភាពពេលមកសាលារៀន ។ ចាប់តាំងពីលោកឈរសម្រួលចរារណ៍ឱ្យសិស្សចូលរៀន គឺពុំដែលមានគ្រោះថ្នាក់ចរាចរណ៍ដល់សិស្សមួយពេលណាឡើយ ជាងនេះទៅទៀតធ្វើឱ្យសិស្សមានទំនុកចិត្តក្នុងការឆ្លងថ្នល់ចូលទៅក្នុងសាលារៀន។
ចំណែកលោក ម៉ែន ចិត្តវង្ស នាយកសាលាវិទ្យាល័យក្រុងកំពង់ឆ្នាំងក៏បានបញ្ជាក់ផងដែរថា លោក ពៅរឿន គឺធ្វើការងារក្រៅម៉ោង សម្រួលចរាចរណ៍ដល់សិស្សចូលរៀនជាការស្ម័គ្រចិត្ត ដោយពុំមានប្រាក់ខែអ្វីក្រៅតែពីប្រាក់ខែគ្រូធម្មតានោះទេ។ ក្នុងនាមលោកជានាយកសាលាជំនួសមុខឱ្យមាតាបិតា សិស្ស និងសិស្ស ក៏សូមថ្លែងអំណរគុណដល់លោក ពៅ រឿន ដែលបានស្មគ្រចិត្តធ្វើការងារមួយនេះ ។
សូមបញ្ជាក់ផងដែរថា វិទ្យាល័យក្រុងកំពង់ឆ្នាំង មានសិស្សរៀនចំនួន ១៥៩៥នាក់ និងមាន ៣៦ ថ្នាក់ ។ ក្នុងកាលប្រឡងសញ្ញាបត្រ័ទុតិយភូមិ មានសិស្សចំនួនជាង៥៧%ដែលបានប្រឡងជាប់៕
ចែករំលែកព័តមាននេះ