ខេត្តកំពង់ចាម៖ អាជីវករ ដែលជាម្ចាស់អាជីវកម្មខ្នាតតូច និងមធ្យម រាប់រយនាក់ បាននាំគ្នា ចូលរួមបង្ហាញពីបទពិសោធន៍ ក្នុងលទ្ធផលការងារ «ចលនាភូមិមួយផលិតផលមួយ» ប្រចាំឆ្នាំ២០២២ និង​លើកទិសដៅការងារ ប្រចាំឆ្នាំ២០២៣។ កិច្ចប្រជុំ​នេះ បានធ្វើឡើង នៅសាលសន្និសីទសាលាខេត្តកំពង់ចាម នាព្រឹកថ្ងៃទី២៦ ខែមករា ឆ្នាំ២០២៣ នេះ​។ នៅខេត្តកំពង់ចាម មានផលិតផល ៣៥មុខ ត្រូវបានទទួលស្គាល់ ក្នុងចលនា «ភូមិ​មួយ ផលិតផលមួយ»​។

លោក អ៊ុន ចាន់ដា អភិបាលខេត្ត បានគូស​បញ្ជាក់ថា គ្រប់ជំនាញពាក់ព័ន្ធ និងអាជ្ញាធរគ្រប់ថ្នាក់ ពិសេសបងប្អូនប្រជាពលរដ្ឋ ត្រូវយកអស់លទ្ធភាព ក្នុងការច្នៃប្រឌិត ឲ្យរស់រវើក។ ប៉ុន្តែក្នុងនោះ ត្រូវគិតគូអំពីប្រសិទ្ធភាពផង។ ពាក់ព័ន្ធនឹងទីផ្សារអាជ្ញាធរខេត្ត តាមរយៈមន្ទីរពាណិជ្ជកម្ម បាន​គិតគូ​យ៉ាងខ្លាំង ដោយមានការលើកទឹកចិត្ត ដល់បងប្អូន ដែលជាសមាជិកចលនាភូមិមួយ​ផលិតផលមួយ ដោយអនុញ្ញាតឱ្យផលិតផលរបស់ខ្លួន យកមកដាក់តាំងលក់ ដោយមិនយក​សេវាតម្លៃស្តង់ឡើយ។

លោកអភិបាលខេត្ត បន្តថា ក្នុងការលើកស្ទួយសង្វាក់ផលិតកម្ម ក៏ដូចជា ការទទួលនូវ​ភាពងាយ​ស្រួលនៃការជួយជ្រោមជ្រែង​ពីភាគីពាក់ព័ន្ធកន្លងមក យើងពិនិត្យឃើញថា បងប្អូន ដែលជាម្ចាស់​ផលិតផល​ ហាក់ដូចជា នៅដាច់ដោយឡែកឆ្ងាយពីគ្នា ដែលជា​ហេតុធ្វើឲ្យថ្នាក់ជាតិ និងថ្នាក់ខេត្ត ពិបាកជួយ។

លោកអភិបាលខេត្ត បានសំណូមពរដល់បងប្អូនប្រជាពលរដ្ឋ និងអាជីវករ ដែលមាន​ផលិតផល​ដូចគ្នា រួមមានដូចជា ចេកឆាប ត្រសក់ចាវ តម្បាញ… គួរផ្លាស់ប្ដូរនូវ​ឥរិយាបថពីលក្ខណៈ​ដាច់ដោយឡែក មកចូលរួម​ជាសហគមន៍។ ការ​ធ្វើសមាហរណ​កម្ម ចូល​​ជា​​សហគមន៍ គឺ​ជាគន្លឹះដ៏សំខាន់មួយ។ ក្រៅពីនោះ ការជំរុញ​អភិវឌ្ឍធនធានមនុស្ស ក៏ជាកត្តាជោគជ័យ​របស់ភូមិមួយផលិតផលមួយ ផងដែរ​។ ដូច្នេះជាការចាំ​បាច់ ត្រូវអភិវឌ្ឍន៍សហគមន៍មួយ ដោយត្រូវឆ្លើយតប ប្រកបដោយ​ច្នៃប្រឌិតរស់រវើក ​ក្នុង​ខណៈ​ពេល​​​ដែល​​មានការប្រឈមមុខ និង​ការលំបាក​ ឬ​ហា​និ​ភ័យ​ផ្សេងៗ​។

លោក​អភិបាលខេត្ត បញ្ជាក់ថា ពាក់ព័ន្ធនឹងគោលការណ៍នេះ សម្រាប់ខេត្តកំពង់ចាម ពិតជាមាន​សក្តា​នុពលគ្រប់គ្រាន់​ ក្នុងការឆ្លើយតប​​ទៅនឹង​គោលនយោបាយជាតិ​ចលនាភូមិមួយ​ផលិតផលមួយ ជាក់ស្ដែង គិតត្រឹមឆ្នាំ២០២៣ នេះ ថ្នាក់ជាតិ​បានទទួលស្គាល់បញ្ចូល​ជាសមាជិកភូមិមួយផលិតផលមួយ បានចំនួន ៣៥​មុខ​ផលិតផល​រួចមកហើយ។ ប៉ុន្តែយើងនៅ​មាន​ផលិតផល ដែលមានសក្តានុពលជាច្រើនទៀត ដែលនឹងត្រូវជ្រើសរើស​ចាត់បញ្ចូលជា​សមាជិក​។ ដូច្នេះហើយប្រសិនបើមូលដ្ឋានយើងមានការគិតគូរផ្លាស់ប្ដូរឥរិយាបថ មានឆន្ទៈ​មោះមុត​​អនុវត្តឱ្យ​​​បាន​តាមគោលការណ៍គ្រឹះសំខាន់ទាំងបី​ខាងលើនោះ មូលដ្ឋានយើង នឹងទទួលបានផលប្រយោជន៍ជាច្រើន ដូចជា ទី១-បានបង្កើនការងារនៅក្នុងសហគមន៍ ហើយធ្វើឱ្យមានការកាត់បន្ថយភាពគ្មានការងារធ្វើ និងការធ្វើចំណាកស្រុក។ ទី២-បង្កើនបរិមាណផលិតផល​ក្នុងស្រុកហើយគុណភាព ត្រូវបានលើកកម្ពស់ និងទទួលបាននូវការជឿទុកចិត្ត៕ ចាន់ថេត