ខេត្តកំពង់ចាម៖ ដើម្បីជួយសម្រួលដល់ប្រជាកសិករ ក្នុងការដឹកកសិផលពីជនបទ ទៅកាន់ទីផ្សារ ឱ្យ​កាន់​តែមានភាពងាយស្រួល ក្រោមការយកចិត្តទុកដាក់របស់អាជ្ញាធរ និងអង្គភាពពាក់ព័ន្ធ បាន​ស្ថាបនាផ្លូវក្រាលកៅស៊ូ ប្រភេទDBST និងផ្លូវបេតុងចំនួនពីរខ្សែ ដែលមានប្រវែងជាង ១៤​គីឡូម៉ែត្រ ត្រូវបានបើកការដ្ឋានសាងសង់ នាព្រឹកថ្ងៃទី២៥ ខែមករា ឆ្នាំ២០២៣។ ផ្លូវក្រាលកៅស៊ូ និងផ្លូវបេតុង​ទាំងនេះ ស្ថិតក្នុង​ឃុំតាអុង ស្រុកចំការលើ ឆ្ពោះទៅ​ឃុំសូភាស និង​ឃុំមេសរជ្រៃ ស្រុកស្ទឹងត្រង់​។

លោក អ៊ឹង  វិសុទ្ធ ​ប្រធានមន្ទីរអភិវឌ្ឍន៍ជនបទខេត្តកំពង់ចាម បានលើកឡើងថា​ គម្រោងស្ថាប័ន​ផ្លូវ ពីផ្លូវដី ទៅជាផ្លូវកា្រលកៅស៊ូ និងផ្លូវ​បេតុងនេះ ស្ថិតក្នុងក្របខណ្ឌគម្រោងខ្សែច្រវាក់ផលិតកម្ម ដោយភាតរៈភាពបរិស្ថាន (CFAVC) របស់ក្រសួងអភិវឌ្ឍន៍ជនបទ នៅក្នុងខេត្តកំពង់ចាម​។

ប្រធានមន្ទីរអភិវឌ្ឍន៍ជនបទខេត្ត បន្តថា ​ផ្លូវមួយខ្សែនេះ គឺចាប់ពីទួលប្រាក់ ក្នុងឃុំតាអុង ស្រុក​ចំការលើ ដល់ភូមិសូភាស ឃុំសូភាស ស្រុកស្ទឹងត្រង់ មានប្រវែង ៩,៨៨២ គ.ម ទទឹង ៥ម ដោយ​ក្រាលកៅស៊ូពីរជាន់ មានចិញ្ចើមសងខាង ០,៥ម និងសាងសង់លូប្រអប់មុខពីរ ចំនួន០១កន្លែង លូប្រអប់មុខមួយ ចំនួន ០១កន្លែង និងលូមូល ចំនួន ៣១កន្លែង។ ចំណែកផ្ឡូវមួយខ្សែទៀត មាន​ប្រវែង ៤,៧២១ គ.ម ដោយមានពីរកំណាត់ គឺ​កំណាត់ទីមួយ ចាប់ពីភូមិសូភាស ឃុំសូភាស ទៅ​ដល់​ភូមិបុសពោធិ៍ ឃុំមេសរជ្រៃ ស្រុកស្ទឹងត្រង់ មាន​ប្រវែងសរុប ៣,៦៨១ គ.ម។ ក្នុងនោះ មាន​ក្រាល​កៅស៊ូពីរជាន់ ប្រវែង ៣,០០ គ.ម ទទឹង ៥ម ចិញ្ចើមសងខាង ០,៥ម និងក្រាលបេតុង ប្រវែង ០,៦៨១ គ.ម ទទឹង ៤ម   ចិញ្ចើមសងខាង ០,៥ម និងកំណាត់ទីពីរ ផ្លូវចូលសហគមន៍កសិកម្ម ចាប់ពីអង្កោល ឃុំសូភាស ដល់ភូមិសូភាស ឃុំសូភាស ស្រុកស្ទឹងត្រង់ មាន​សរុប ១,០៤០ គ.ម ក្នុងនោះ មានក្រាលកៅស៊ូពីរជាន់ ប្រវែង ០,៤៣៥គ.ម ទទឹង ៥ម ចិញ្ចើមសងខាង ០,៥ម ក្រាល​បេតុងប្រវែង ០,៦០៥ គ.ម ទទឹង ៤ម ចិញ្ចើម​សងខាង ០,៥ម និងសាងសងលូមូល សរុបចំនួន ១៣កន្លែង។

គម្រោងខ្សែច្រវាក់ផលិតកម្ម ដោយភាតរៈ​​បរិស្ថាន មាន​​ក្រសួង​ចំនួន ៣ សម្រាប់អនុវត្តន៍​គម្រោង គឺក្រសួងកសិកម្ម រុក្ខាប្រមាញ់ និងនេសាទ ជាអង្គភាពដឹកនាំគម្រោង ក្រសួងធនធានទឹក និងឧតុនិយម ជាអង្គភាពអនុវត្តន៍គម្រោង និងក្រសួងអភិវឌ្ឍន៍ជនបទ ជាអង្គភាពអនុវត្តន៍ គម្រោង ដោយផ្តោតសំខាន់ ទៅលើតែការកែលម្អផ្លូវជនបទ ដោយក្រាលកៅស៊ូ​ពីរជាន់ និងក្រាលបេតុង នៅក្នុងសហគមន៍កសិកម្ម ដែលមាន​​សក្តា​នុ​ពល​ខ្ពស់។

លោក​ អ៊ុន ចាន់ដា​ អភិបាលខេត្តកំពង់ចាម បាន​មាន​ប្រសាសន៍​ថា រដ្ឋបាល​ខេត្ត​កំពង់​ចាម បានខិតខំអភិវឌ្ឍន៍ ឲ្យមានការស្ថាបនាផ្លូវ ដូចខាងលើ គឺក្នុងគោលបំណង ធ្វើឲ្យប្រជាពលរដ្ឋ មានលក្ខណៈប្រសើរឡើង ដល់ការធ្វើដំណើររស់នៅងាយស្រួល ដូចជាការធ្វើដំណើរ​ទៅកាន់ទីផ្សារ និងសហគមន៍កសិកម្ម និងងាយស្វែងរកការងារធ្វើ ការទទួលបានសេវាសង្គម ផ្តោតផងដែរទៅលើសុវត្តិភាពសង្គម ភាពធន់ ការប្រែលប្រួលអាកាសធាតុ និងប្រសិទ្ធិភាព លើការចំណាយរបស់ប្រពលរដ្ឋ ក្នុងការធ្វើដំណើរលើបណ្តាញផ្លូវជនបទ ដែលបានកែលម្អរួច អាចឲ្យប្រជាពលរដ្ឋធ្វើដំណើរបានគ្រប់រដូវកាល ពិសេ​ស​ក្នុងតំបន់ ដែលមានសក្តានុពល លើវិស័យកសិកម្មខ្ពស់​នៃខេត្តកំពង់ចាម​របស់​យើង។ គម្រោងខាងលើនោះ បានចុះកិច្ចសន្យា ជាមួយក្រុមហ៊ុន MTA Construction Co., Ltd ក្នុងការសាងសង់ផ្លូវប្រវែង ១៤,៦០៣ គ.ម នៅក្នុងសហគមន៍​​ដ៏មានសក្តានុពលកសិកម្មខ្ពស់ មកកាន់ទីផ្សារ មានលក្ខណៈ​ងាយ​ស្រួល៕