ខេត្តបន្ទាយមានជ័យ ៖ កូនប្រុសចិត្តអប្រិយម្នាក់ដើរផឹកស្រវឹងមកដល់ផ្ទះ ត្រូវឪពុកម្តាយស្តីបន្ទោសបន្តិចបន្តួច តែដោយអំណាចស្រាចូលពោះចិត្តខ្លាំង ក៏ស្ទុះទាញយកកាំបិត មកដេញកាប់ឪពុកម្តាយ ដែលចិញ្ចឹមបីបាច់ថែទាំពីតូចក្រូចឆ្មារមក គ្មានក្តីមេត្តា និងកាប់ទ្រព្យសម្បត្តិក្នុងផ្ទះ សូម្បីតែអ្នកជិតខាងក៏មិនហ៊ានជួយដែរ តែចៃតន្យមានកម្លាំងអាវុធហត្ថជិះម៉ូតូកាត់ទីនោះ ជួយធ្វើអន្តរាគមន៍ឃាត់ខ្លួនជនសង្ស័យបាននៅវេលាម៉ោង០៧យប់ ថ្ងៃទី២១ ខែកក្កដា ឆ្នាំ២០១៧ នៅនឹងផ្ទះ ស្ថិតក្នុងភូមិកំពង់ស្វាយ សង្កាត់កំពង់ស្វាយ ក្រុងសិរីសោភ័ណ ខេត្តបន្ទាយមានជ័យ ។
លោកវរសេនីយ៍ត្រី ភឿក ព្រហ្ម មេបញ្ជាការស្ដីទីមូលដ្ឋានកងរាជអាវុធហត្ថក្រុងសិរីសោភ័ណ បានឲ្យដឹងថា ៖ ជនសង្ស័យមានឈ្មោះ ចាប ទិត្យ ភេទប្រុស អាយុ២៥ឆ្នាំ រស់នៅក្នុងភូមិកំពង់ស្វាយ សង្កាត់កំពង់ស្វាយ ក្រុងសិរីសោភ័ណ ខេត្តបន្ទាយមានជ័យ ។ នៅមុនពេលកើតហេតុ ជនបង្កបានត្រលប់មកពីផឹកស្រានៅផ្ទះមិត្តភក្តិឡើងស្រវឹងជោកជាំ ពេលមកដល់ផ្ទះវិញ ឪពុកបាននិយាយថាអញគ្មានលុយបង់រំលោះម៉ូតូទៀតទេ ហើយម៉ែឯងសព្វថ្ងៃនេះកំពុងឈឺផង គ្រាន់តែនិយាយប៉ុណ្ណឹង ដោយសារតែជាតិសុរាចូលពោះខ្លាំង ធ្វើឲ្យជនសង្ស័យមានកំហឹងពុះកញ្ជ្រោល ក៏ស្ទុះទៅច្របាច់.ក ឪពុក និងដាល់ដើមទ្រូងជាច្រើនដៃ ប្រពន្ធឃើញដូច្នេះ រត់មកជួយ រួចរុញកូនចូលក្នុងផ្ទះ ពេលនោះកូនរបស់គាត់បានទាញកាំបិតដងដែក និងពូថៅកាប់បំផ្លាញម៉ូតូដែលនៅក្នុងផ្ទះខ្ទេចខ្ទីអស់ ថែមទាំងបំផ្លាញទ្រព្យសម្បត្តិក្នុងផ្ទះជាច្រើន ឃើញដូច្នោះឪពុកម្តាយ បានស្រែកឲ្យអ្នកជិតខាងជួយ តែអ្នកជិតខាងមកជួយអន្តរាគមន៍តែគ្មានអ្នកណាហ៊ានចេញមកជួយទេ ព្រោះខ្លាចជនសង្ស័យកាប់ស្លាប់ ។ ព្រោះវាមានកាំបិតនៅនឹងដៃ ស្របពេលនោះ ស្រាប់តែមានកម្លាំងអាវុធហត្ថជិះម៉ូតូល្បាតមកដល់ឃើញសកម្មភាពនោះ ហើយបានធ្វើកាត់ឃាត់ខ្លួនតែម្តង និងបានបញ្ជូនមកទីបញ្ជាករដ្ឋានកងរាជអាវុធហត្ថខេត្តបន្ទាយមានជ័យ ដើម្បីសាកសួរបន្ត ។
លោកវរសេនីយ៍ឯក ស ប៊ុនសឿង មេបញ្ជាការរងកងរាជអាវុធហត្ថខេត្តបន្ទាយមានជ័យ បានប្រាប់ឲ្យដឹងថា ៖ ក្រោយពីសាកសួររួច ជនសង្ស័យបានឆ្លើយសារភាពថា រូបគេពិតជាស្រវឹងស្រាមកដល់ផ្ទះបានបង្កហិង្សាលើឪពុកម្តាយ និងបានយកកាំបិតកាប់ម៉ូតូខ្ទេចអស់ពិតប្រាកដមែន ហើយកន្លងមកខ្លួនបានធ្លាប់ប្រើប្រាស់គ្រឿងញៀនទៀតផង ។ លោកវរសេនីយ៍ឯក ស ប៊ុនសឿង បានបញ្ជាក់ទៀតថា ៖ ក្រោយពីបានចម្លើយសារភាពរបស់ជនបង្ករួចមក កម្លាំងជំនាញបានកសាងសំនុំរឿង ដើម្បីបញ្ជូនទៅតុលាការ ដើម្បីផ្តន្ទាទោសទៅតាមផ្លូវច្បាប់ ៕
ចែករំលែកព័តមាននេះ