រាជធានីភ្នំពេញ ៖ សម្តេច ហេង សំរិន ប្រធានរដ្ឋសភាកម្ពុជាបានផ្តាំផ្ញើ និងជំរុញឲ្យ ឯកអគ្គរាជទូតវិសាមញ្ញ និងពេញសមត្ថភាពនៃព្រះរាជាណាចក្រកម្ពុជាទើបតែងតាំងថ្មីចំនួន១០រូបប្រចាំនៅបណ្តាប្រទេសជាមិត្តនានាខិតខំក្តាប់ស្ថានភាពការណ៍ដែលកើតឡើងលើ សកលលោក…
រាជធានីភ្នំពេញ ៖ សម្តេច ហេង សំរិន ប្រធានរដ្ឋសភាកម្ពុជាបានផ្តាំផ្ញើ និងជំរុញឲ្យ ឯកអគ្គរាជទូតវិសាមញ្ញ និងពេញសមត្ថភាពនៃព្រះរាជាណាចក្រកម្ពុជាទើបតែងតាំងថ្មីចំនួន១០រូបប្រចាំនៅបណ្តាប្រទេសជាមិត្តនានាខិតខំក្តាប់ស្ថានភាពការណ៍ដែលកើតឡើងលើ សកលលោក រួចធ្វើការឆ្លើយតបឲ្យទាន់ពេលវេលា ដើម្បីបុព្វហេតុប្រទេសជាតិ។
ការជំរុញនេះ ខណៈសម្តេចអគ្គមហាពញាចក្រី ហេង សំរិន ប្រធានរដ្ឋសភានៃព្រះរាជាណាចក្រកម្ពុជាបានអនុញ្ញាតឱ្យឯកអគ្គរាជទូតវិសាមញ្ញ និងពេញសមត្ថភាពនៃព្រះរាជាណាចក្រកម្ពុជាទើបតែងតាំងថ្មីចំនួន១០រូបប្រចាំនៅបណ្តាប្រទេសជាមិត្តនានាចូលជួបសម្តែងការគួរសម និងទទួលអនុសាសន៍នៅមុនពេលអញ្ជើញចេញទៅបំពេញបេសកកម្មការទូតនៅក្រៅប្រទេស នាព្រឹកថ្ងៃទី២៥ ខែមករា ឆ្នាំ២០២៣ នៅវិមានរដ្ឋសភា។
ឯកឧត្តម កុយ គួង តំណាងទូតដែលបានចូលជួបសម្តែងការគួរសម និងជម្រាបសម្តេច ហេង សំរិន ប្រធានរដ្ឋសភានាព្រឹក ថ្ងៃទី២៥ ខែមករា ឆ្នាំ២០២៣ បានលើកឡើងថា ក្នុងជំនួបសម្តេចប្រធានសភាបានជំរុញឲ្យតំណាងស្ថានទូតដែលបានចូលជួបនៅថ្ងៃនេះ គឺធ្វើយ៉ាងណា គឺលើកកម្កល់ផលប្រយោជន៍ជាតិជាធំ ទោះបីស្ថិតក្នុងតម្លៃណាក៏ដោយ។ត្រូវខិតខំអនុវត្តនគោលនយោបាយបរទេសដែលមានលក្ខខណៈបត់បែនឈ្លៀសវៃ ដើម្បីធ្វើយ៉ាងណាពង្រឹង និងពង្រីកកិច្ចសហប្រតិបត្តិការលើកគ្រប់វិស័យជាមួយបណ្តាប្រទេសជាមិត្ត។មិនត្រឹមតែខិតខំពង្រឹងពង្រីកជាមួយមិត្តដែលតាំងលំនៅនោះទេត្រូវតែធ្វើយ៉ាងណាពង្រឹងពង្រីកជាអង្គទូតផងដែរ។
បើតាមឯកឧត្តមកុយ គួងបានលើកឡើងថា ក្នុងជំនួបសម្តេចប្រធានរដ្ឋសភាក៏បានផ្តាំផ្ញើដល់អង្គទូតទាំងអស់ត្រូវខិតខំធ្វើយ៉ាងណារក្សាអត្តសញ្ញាណជាតិឲ្យបានល្អជាងនេះត្រូវខិតខំជួយពន្យល់ដល់ស្ថាប័នជាតិ និងអន្តរជាតិបានយល់ពីការអនុវត្តលទ្ធិប្រជាធិបតេយ្យការ គោរពសិទ្ធិមនុស្សនៅកម្ពុជានៅឲ្យច្បាស់លាស់ ដើម្បីទប់ទល់នូវព័ត៌មានអគតិនានាដែលតែងតែលាបព័ណ៌កម្ពុជាឲ្យឃើញកម្ពុជាជាប្រទេសមួយមិនល្អ។
ឯកឧត្តមបញ្ជាក់ថា ៖«ដូច្នេះតួនាទីយើងតំណាងយើងឲ្យ គឺទៅដើម្បីបង្ហាញឲ្យគេស្គាល់កម្ពុជាកាន់តែច្បាស់ថា ភាពពិតរបស់កម្ពុជាវាខុសពីកម្ពុជាលើបណ្តាញសារព័ត៌មានរបស់បណ្តាអគតិមួយចំនួនដែលបណ្តុះបង្អាប់យើង។ អីញ្ចឹងយើងត្រូវខិតខំធ្វើយ៉ាងណាឲ្យពលរដ្ឋយើង និងជនបរទេសឲ្យស្គាល់ពីប្រពៃណីទំនាមទម្លាប់យើងមានដ៏យូរមកហើយ»។ជាងនេះទៅទៀត ឯកឧត្តមបានលើកឡើងថា ក្នុងជំនួបសម្តេចប្រធានរដ្ឋសភាក៏បានឲ្យតំណាងអង្គទូតទាំងអស់ត្រូវសកម្មភាពដោយក្តាប់ឲ្យពីស្ថានភាពការណ៍ដែលកើតឡើង ដើម្បីឆ្លើយតបនឹងសភាពការណ៍ទាំងអស់នោះទេ។
ក្នុងជំនួបនោះដែរ សម្តេចប្រធានរដ្ឋសភាក៏បានផ្តាំផ្ញើឲ្យតំណាងស្ថានទូតទាំងអស់ ត្រូវធ្វើយ៉ាងណាជួយសម្រួលសេវានានាដល់ប្រជាពលរដ្ឋកម្ពុជាដែលកំពុងរស់នៅសិក្សានៅក្រៅប្រទេសឲ្យបានស្រួល និងឆាប់រហ័ស គឺបង្កលក្ខណៈឲ្យបានងាយស្រួល។ជាងនេះត្រូវចុះសួរសុខទុកពួកគាត់ឲ្យបានជិតស្និត ដើម្បីដឹងថា ពួកគាត់ចង់បានអ្វីហើយត្រូវជួយគាត់ភ្លាមទៅតាមអ្វីដែលអាចធ្វើទៅបាន។
ឯកឧត្តមកុយ គួង ក៏បានលើកឡើងថា ក្នុងជំនួបសម្តេចប្រធានសង្ឃឹមថា ឯកអគ្គរដ្ឋទូតនឹងធ្វើកិច្ចការទាំងអស់នោះ ទទួលបានជោគជ័យ ដើម្បីប្រយោជន៍ជាតិ និងប្រជាជននៅពេលខាងមុខនេះផងដែរ។ឯកឧត្តមក៏បានបន្ថែមថា តាមប្រសាសន៍របស់សម្តេចហេង សំរិន ស្របនឹងការងារស្នូលរបស់ក្រសួងការបរទេស និងសហប្រតិបត្តិការអន្តរជាតិចំនួន៥រួមមាន ៖ ១.ការពារឯករាជ្យភាពបូរណភាពទឹកដី។ ២.ការអនុវត្តគោលនយោបាយការបរទេសប្រកបដោយបត់បែនវៀងវៃតបនឹងសំពាធភូមិសាស្ត្រនយោបាយ និងការប្រកួតប្រជជែងរបស់ប្រទេសមហាអំណាច ។
៣.ការងារការទូតសេដ្ឋកិច្ច និងវប្បធម៌លើកកម្ពស់សេដ្ឋកិច្ចជាតិ ។៤. ការចូលរួមកាន់តែសកម្មភាពថែមទៀតដល់បុព្វហេតុសន្តិភាព ស្ថេរភាព និងការប្រយុទ្ធនឹងការប្រឈមនានាដែលកំពុងកើតឡើងនៅលើសកលលោក។និងទី៥.កំណែទម្រង់ស្ថាប័នក្នុងក្រសួងដើម្បីរៀបចំអ្នកការទូតកាន់តែមានសម្ថភាពខ្លាំងឡើងៗ ។
សូមជម្រាបថា ឯកអគ្គរាជទូតថ្មីទាំង១០រូប ដែលបានចូលជួបទទួលអនុសាសន៍ និងជម្រាបលាសម្តេចប្រធានរដ្ឋសភា នាឱកាសនេះមាន ឯកឧត្តម កុយ គួង ឯកអគ្គរាជទូតប្រចាំនៅប្រទេសឥណ្ឌា ឯកឧត្តម ស្មាន ម៉ាណាន ឯកអគ្គរាជទូតប្រចាំប្រទេសគូវ៉ែត ឯកឧត្តម ហ៊ុន សារឿន ឯកអគ្គរាជទូត ប្រចាំនៅប្រទេសថៃឡង់ដ៏ ឯកឧត្តម ជឺនបូរាណ ច័ន្ទបុរី ឯកអគ្គរាជទូតប្រចាំនៅប្រទេសអូស្ត្រាលី ឯកឧត្តម ជា ធីរៈ ឯកអគ្គរាជទូតប្រចាំប្រទេសគុយបា ឯកឧត្តម ពេជ្រឃុន បញ្ញា ឯកអគ្គរាជទូតប្រចាំប្រទេសរុស្ស៊ី ឯកឧត្តម អ៊ិន តារា ឯកអគ្គរាជទូតប្រចាំប្រទេសស្វីស ឯកឧត្តម ជុំ អង្គវិចិត្រ ឯកអគ្គរាជទូត ប្រចាំនៅប្រទេសមីយ៉ាន់ម៉ា ឯកឧត្តម លឹម ហុកសេង ឯកអគ្គរាជទូតប្រចាំនៅប្រទេសប្រ៊ុយណេ ឯកឧត្តម អ៊ុក ចាន់ដារ៉ា ឯកអគ្គរាជទូត ប្រចាំនៅប្រទេសម៉ាឡេស៊ី៕
ចែករំលែកព័តមាននេះ