ខេត្តមណ្ឌលគិរី ៖ ប្រជាពលរដ្ឋរស់នៅឃុំចុងផ្លាស់ជាង១០០នាក់បានប្រមូលផ្តុំគ្នានៅមុខសាលាឃុំកាលពីល្ងាចថ្ងៃទី១៩ ខែកក្កដា ឆ្នាំ២០១៧ ដើម្បីស្នើដល់សម្តេចតេជោ ហ៊ុន សែន
ខេត្តមណ្ឌលគិរី ៖ ប្រជាពលរដ្ឋរស់នៅឃុំចុងផ្លាស់ជាង១០០នាក់បានប្រមូលផ្តុំគ្នានៅមុខសាលាឃុំកាលពីល្ងាចថ្ងៃទី១៩ ខែកក្កដា ឆ្នាំ២០១៧ ដើម្បីស្នើដល់សម្តេចតេជោ ហ៊ុន សែន ជួយធ្វើអន្តរាគមន៏ដោះស្រាយបញ្ហាប្រឈមដែលពួកគាត់កំពុងមានជម្លោះជាមួយក្រុមហ៊ុនរ៉ែមាសរបស់ចិនឈ្មោះ រ៉ុង ឆេង ដែលកំពុងធ្វើសកម្មភាពបំពានលើដីសហគមន៏សិប្បកររ៉ែចុងផ្លាស់ ។
តំណាងប្រជាសហគមន៏លោក ពៅ សាវ៉ាត បានឲ្យដឹងថា ប្រជាពលរដ្ឋរស់នៅឃុំចុងផ្លាស់ស្ទើរទាំងស្រុងបានពឹងផ្អែកទៅលើមុខរបររករ៉ែមាសលក្ខណៈគ្រួសារតាំងពីដើមរៀងមក ហើយការធ្វើសកម្មភាពជីករករ៉ែមាសរបស់អ្នកភូមិក៏រកបានកាន់តែខ្សត់ពីមួយថ្ងៃទៅមួយថ្ងៃត្បិតពួកគាត់មិនមានប្រើប្រាស់សម្ភារសម័យទំនើបនោះទេ ។ តំណាងប្រជាពលរដ្ឋបានបន្តថា កាលពីឆ្នាំ២០០០មានក្រុមហ៊ុនមួយឈ្មោះ រ៉ុង ឆេង បានចូលទៅសិក្សាស្វែងរកតំបន់រ៉ែមាសក្នុងឃុំចុងផ្លាស់ដែលមានប្រជាពលរដ្ឋកំពុងប្រកបរបរនេះប្រចាំថ្ងៃ ។ ដើម្បីចៀសវាងបញ្ហាទៅថ្ងៃក្រោយក្រុមមន្ត្រីជំនាញរ៉ែក៏សម្រេចកាត់ដីទំហំ៤៣ហិកតាទុកជាសម្បត្តិរួមរបស់សហគមន៏ដោយក្រុមហ៊ុនបានទទួលសិទ្ឋសិក្សារុករករ៉ែមាសលើផ្ទៃដីទំហំជាង២.០០០ហិចកតា ។
ចំណែកប្រជាពលរដ្ឋដែលបានចូលរួមក្នុងសកម្មភាពស្នើសុំឲ្យប្រមុខរាជរដ្ឋាភិបាលកម្ពុជាជួយអន្តរាគមន៏បញ្ចប់ជម្លោះរបស់អ្នកភូមិនឹងក្រុមហ៊ុន បានសំនូមពរដល់សម្តេចជួយអនុញ្ញាតដល់ពួកគាត់អាចធ្វើទៅតាមលទ្ឋិភាពលើការជីករណ្តៅរ៉ែ ព្រោះក្នុងច្បាប់របស់សហគមន៏អនុញ្ញាតឲ្យម្ចាស់រណ្តៅរ៉ែទាំងអស់អាចជីករករ៉ែត្រឹមជម្រៅ២០ម៉ែត្រប៉ុណ្ណោះ ។ តែសព្វថ្ងៃជម្រៅប៉ុណ្ណឹងគឺជីកមិនទាន់ដល់ថ្មរ៉ែនោះទេមូលហេតុនេះហើយបានជាពួកគាត់ស្នើដល់សម្តេចតេជោជួយឲ្យពួកគាត់ធ្វើទៅតាមលទ្ឋិភាពដែលប្រជាពលរដ្ឋអាចធ្វើបាន ។ មន្ត្រីជំនាញរ៉ែ និងថាមពលបានថ្លែងថា ដើម្បីចៀសវាងសកម្មភាពជីករ៉ែបែបអនាធិបតេយ្យទើបក្រសួងសម្រេចបង្កើតជាសហគមន៏សិប្បកររ៉ែមាសដើម្បីឲ្យប្រជាពលរដ្ឋអាចប្រកបរបរចិញ្ចឹមជីវិតដោយស្របច្បាប់ ។ មន្ត្រីក្រសួងរ៉ែក៏បានបញ្ជាក់ថា តាមច្បាប់របស់ក្រសួងគឺសហគមន៏រ៉ែមាសមិនអាចជីកលើសពីជម្រៅ២០ម៉ែត្រនោះទេ ។ យ៉ាងណាក៏ដោយគេនៅមិនទាន់អាចសុំការបំភ្លឺពីតំណាងក្រុមហ៊ុន រ៉ុង ឆេង បាននៅឡើយកាលពីព្រឹកថ្ងៃទី២០ ខែកក្កដា ឆ្នាំ២០១៧ នេះ ៕
ចែករំលែកព័តមាននេះ