កម្លាំងនគរបាលនៃក្រុងសៀមរាប សហការជាមួយកម្លាំងការិយាល័យនគរបាលព្រហ្មទណ្ឌកម្រិតធ្ងន់ នៃស្នងការដ្ឋាននគរបាលខេត្តសៀមរាប បានចុះស្រាវជ្រាវតាមបណ្ដឹងរបស់ប្រជាពលរដ្ឋ ដែលជាអាជីវករលក់ដូរ រហូតឈានដល់ឃាត់ខ្លួនបានស្ត្រីម្នាក់ដែលជំនាញដើរ
ខេត្តសៀមរាប ៖ កម្លាំងនគរបាលនៃក្រុងសៀមរាប សហការជាមួយកម្លាំងការិយាល័យនគរបាលព្រហ្មទណ្ឌកម្រិតធ្ងន់ នៃស្នងការដ្ឋាននគរបាលខេត្តសៀមរាប បានចុះស្រាវជ្រាវតាមបណ្ដឹងរបស់ប្រជាពលរដ្ឋ ដែលជាអាជីវករលក់ដូរ រហូតឈានដល់ឃាត់ខ្លួនបានស្ត្រីម្នាក់ដែលជំនាញដើរឆបោ.ក និងលួចពលរដ្ឋ ព្រមទាំងអាជីវករនៅក្នុងខេត្តសៀមរាបបានជាច្រើនលើក នាំយកមកនៅអធិការនគរបាលក្រុងសៀមរាប រួចរៀបចំកសាងសំណុំរឿងបញ្ជូនទៅកាន់ការិយាល័យជំនាញ ដើម្បីរៀបចំកសាងសំណុំបន្តទៅកាន់តុលាការចាត់ការតាមនីតិវិធីច្បាប់។ ហេតុការណ៍ឃាត់ខ្លួនស្ត្រីម្នាក់ជំនាញខាងលួច និងឆបោ.កនោះ បានធ្វើឡើងនៅរសៀលថ្ងៃទី២០ ខែមករា ឆ្នាំ២០២៣ ស្ថិតនៅក្នុងក្រុងសៀមរាប។
បើតាមប្រសាសន៍របស់លោកឧត្តមសេនីយ៍ត្រី ភឹង ចិន្តារ៉េត ស្នងការរងទទួលផែនព្រហ្មទណ្ឌនៃស្នងការដ្ឋាននគរបាលខេត្តសៀមរាប បានឱ្យដឹងថា កម្លាំងនគរបាលជំនាញនៃក្រុងសៀមរាប និងកម្លាំងនគរបាលព្រហ្មទណ្ឌកម្រិតធ្ងន់ នៃស្នងការដ្ឋាននគរបាលខេត្តសៀមរាប បាន ធ្វើការឃាត់ខ្លួនជនសង្ស័យម្នាក់ដែលមានឈ្មោះ អ៊ិន តារ៉ា ភេទស្រី អាយុ៣៧ឆ្នាំ មុខរបរលក់បន្លែ មានស្រុកកំណើតនៅភូមិកំពង់រទេស ឃុំកំពង់រទេស ស្រុកស្ទឹងសែន ខេត្តកំពង់ធំ បច្ចុប្បន្នស្នាក់នៅបន្ទប់ជួល ស្ថិតក្នុងភូមិបឹងដូនប៉ា សង្កាត់ស្លក្រាម ក្រុង/ខេត្តសៀមរាប ពាក់ព័ន្ធនឹងករណីអំពើលួច (បន្លំលួចខោអាវ) និងករណីឆបោ.ក (យកខោអាវ )។
លោកបន្តថា កាលពីថ្ងៃទី២០ ខែមករា ឆ្នាំ២០២៣ សមត្ថកិច្ចយើងបានទទួលព័ត៌មានតាមរយៈប្រព័ន្ធបណ្តាញសង្គមហ្វេសប៊ុកដែលមានឈ្មោះ និមល កាត់ដេរ ដែលបានសរសេរបង្ហោះថា «បងប្អូនសូមប្រុងប្រយ័ត្ន ស្ត្រីម្នាក់នេះ វាបានមកហាងខ្ញុំទិញខោអាវ ពេលច្រករួចហើយ វាបានបញ្ឆោតឱ្យបុគ្គលិកខ្ញុំទៅយកបន្ថែមទៀត ហើយឆ្លៀតឱកាសនោះ វាក៏បើកម៉ូតូរត់បាត់» ដោយមានភ្ជាប់រូបភាពស្ត្រីចាប់តាមកាមេរ៉ា ដែលជាជនសង្ស័យជិះម៉ូតូម៉ាកហុងដាឌ្រីម ពណ៌ខ្មៅ មានពាក់ផ្លាកលេខ សៀមរាប1AM-6355 ។
ក្រោយពីទទួលបានព័ត៌មាននេះភ្លាមហើយ សមត្ថកិច្ចបានសហការជាមួយអធិការនគរក្រុងសៀមរាប ចុះស្រាវជ្រាវស្វែងរកជនរងគ្រោះដែលមានឈ្មោះ ខុន និមល ភេទស្រី អាយុ៣២ឆ្នាំ រស់នៅភូមិវត្តដំណាក់ សង្កាត់សាលាកំរើក ក្រុង-ខេត្តសៀមរាប ដើម្បីឱ្យមកដាក់ពាក្យបណ្តឹង។
លោកបញ្ជាក់ថា តាមការបំភ្លឺរបស់ជនរងគ្រោះបានរៀបរាប់ប្រាប់សមត្ថកិច្ចយើងដឹងថា កាលពីថ្ងៃទី០៣ ខែមករា ឆ្នាំ២០២៣ វេលាម៉ោង០៧និង៣០នាទីព្រឹក នៅតូបរបស់ខ្លួន ស្ថិតក្នុងភូមិវត្តដំណាក់ សង្កាត់សាលាកំរើក ក្រុង-ខេត្តសៀមរាប មានជនសង្ស័យដែលខ្លួនសរសេរក្នុងគណនីហ្វេសប៊ុក ដែលបានបន្លំលួចខោអាវ ដូចដែលខ្លួនបានរៀបរាប់ក្នុងហ្វេសប៊ុកខាងលើ។
លោកបញ្ជាក់ទៀតថា ក្រោយពីបានឃាត់ខ្លួនជនសង្ស័យខាងលើមកសួរនាំ ជនសង្ស័យរូបនេះ បានឆ្លើយសារភាពថា «ខ្លួនបានធ្វើសកម្មភាពបន្លំលួច និងបោ.កយកសម្លៀកបំពាក់ក្នុងក្រុងសៀមរាបចំនួន០៣លើក រួមមាន ៖ – លើកទី១ នៅថ្ងៃទី០៩ ខែមិថុនា ឆ្នាំ២០២២ ខ្លួនបានធ្វើសកម្មភាពបោ.កយកសម្លៀកបំពាក់ពីជនរងគ្រោះ ដោយប្រាប់ជនរងគ្រោះថា ខ្លួនជាម៉ូយថៅកែធំ ហើយឱ្យជនរងគ្រោះច្រកខោអាវដែលមានតម្លៃស្មើ ៥០០ដុល្លារ។ ពេលខ្លួនបានខោអាវរួចហើយ ខ្លួនក៏ឱ្យជនរងគ្រោះចូលទៅក្នុងតូបច្រកខោអាវបន្ថែមទៀត ឆ្លៀតពេលនោះខ្លួនក៏បើកម៉ូតូគេចខ្លួនបាត់។ – លើកទី២ នៅថ្ងៃទី១២ ខែតុលា ឆ្នាំ២០២២ នៅក្នុងភូមិបន្ទាយជ័យ សង្កាត់សៀមរាប ក្រុង-ខេត្តសៀមរាប ជនសង្ស័យបានបន្លំលួចខោអាវជនរងគ្រោះ ដោយឱ្យជនរងគ្រោះច្រកខោអាវហើយរួចជិះម៉ូតូគេចខ្លួន។ – លើកទី៣ នៅថ្ងៃទី០៣ ខែមករា ឆ្នាំ២០២៣ នៅភូមិវត្តដំណាក់ សង្កាត់សាលាកំរើក ក្រុង-ខេត្តសៀមរាប ខ្លួនបានចូលលួចខោអាវរបស់ជនរងគ្រោះ រួចរត់គេចខ្លួនពិតប្រាកដមែន ដោយខោអាវដែលលួចបាន ខ្លួនយកដាក់លក់ជជុះក្នុងផ្សារលើ។
លោកបញ្ជាក់ទៀតថា ចំពោះវត្ថុតាងដកហូតបានមាន ម៉ូតូជនសង្ស័យចំនួន១គ្រឿង និងសម្លៀកបំពាក់ចំនួន២កំប្លេផងដែរ។ បច្ចុប្បន្ន កម្លាំងនគរបាលជំនាញនៃស្នងការដ្ឋាននគរបាលខេត្តសៀមរាប កំពុងរៀបចំកសាងសំណុំរឿងបញ្ជូនទៅកាន់តុលាការ ដើម្បីចាត់ការតាមផ្លូវច្បាប់៕
ចែករំលែកព័តមាននេះ