ខេត្តសៀមរាប ៖ កម្លាំងនគរបាលនៃក្រុងសៀមរាបសហការជាមួយកម្លាំងការិយាល័យនគរបាលព្រហ្មទណ្ឌកម្រិតធ្ងន់នៃស្នងការដ្ឋាននគរបាលខេត្តសៀមរាប ចុះស្រាវជ្រាវតាមបណ្ដឹងរបស់ពលរដ្ឋដែលជាអាជីវករលក់ដូររហូតឈានដល់ឃាត់ខ្លួនបានស្ត្រីម្នាក់ ដែលជំនាញដើរឆបោក និងលួចពីពលរដ្ឋ និងអាជីវករនៅក្នុងខេត្តសៀមរាបជាច្រើនលើក ។
ហេតុការណ៍ឃាត់ខ្លួនស្ត្រីម្នាក់ជំនាញខាងលួច និងឆបោកនោះបានធ្វើឡើងនៅរសៀលថ្ងៃទី២០ ខែមករា ឆ្នាំ២០២៣ ស្ថិតនៅក្នុងក្រុងសៀមរាប។ បើតាមប្រសាសន៍របស់លោកឧត្តមសេនីយ៍ត្រី ភឹង ចិន្តារ៉េត ស្នងការរងទទួលផែនព្រហ្មទណ្ឌនៃស្នងការដ្ឋាននគរបាលខេត្តសៀមរាប បានឱ្យដឹងថា កម្លាំងនគរបាលជំនាញនៃក្រុងសៀមរាប និងកម្លាំងនគរបាលព្រហ្មទណ្ឌកម្រិតធ្ងន់នៃស្នងការដ្ឋាននគរបាលខេត្តសៀមរាប បានធ្វើការឃាត់ខ្លួនជនសង្ស័យឈ្មោះ អ៊ិន តារ៉ា ភេទស្រី អាយុ៣៧ឆ្នាំ មុខរបរលក់បន្លែ មានស្រុកកំណើតនៅភូមិកំពង់ រទេស ឃុំកំពង់រទេស ស្រុកស្ទឹងសែន ខេត្តកំពង់ធំ បច្ចុប្បន្នស្នាក់នៅបន្ទប់ជួល ភូមិបឹងដូនប៉ា សង្កាត់ស្លក្រាម ក្រុង/ខេត្តសៀមរាប ពាក់ព័ន្ធនឹងករណីអំពើលួច(បន្លំលួចខោអាវ) និងករណីឆបោក(យកខោអាវ)។
លោកបន្តថា កាលពីថ្ងៃទី២០ ខែមករា ឆ្នាំ២០២៣ សមត្ថកិច្ចយើងបានទទួលព័ត៌មានតាមរយៈប្រព័ន្ធបណ្តាញសង្គមហ្វេសប៊ុកដែលមានឈ្មោះ និមល កាត់ ដេរ ដែលបានសរសេរបង្ហោះថា«បងប្អូនសូមប្រុងប្រយ័ត្នស្ត្រីម្នាក់នេះវាបានមកហាងខ្ញុំ ទិញខោអាវ ពេលច្រករួចហើយវាបានបញ្ឆោតឱ្យបុគ្គលិកខ្ញុំទៅយកបន្ថែមទៀត ហើយឆ្លៀតឱកាសវាក៏បើកម៉ូតូរត់បាត់» ដោយមានភ្ជាប់រូបភាពស្ត្រី ចាប់តាមកាមេរ៉ាដែលជាជនសង្ស័យជិះម៉ូតូម៉ាកហុងដាឌ្រីម ពណ៌ខ្មៅ មានពាក់ផ្លាកលេខសៀមរាប1AM-6355។
ក្រោយពីទទួលបានព័ត៌មាននេះភ្លាមហើយសមត្ថកិច្ចបានសហការជាមួយអធិការនគរក្រុងសៀមរាបចុះស្រាវជ្រាវស្វែងរកជនរងគ្រោះឈ្មោះ ខុន និមល ភេទស្រី អាយុ៣២ឆ្នាំ រស់នៅភូមិវត្តដំណាក់ សង្កាត់សាលាកំរើក ក្រុង/ខេត្តសៀមរាប ដើម្បីឱ្យមកដាក់ពាក្យបណ្តឹង។
លោកបញ្ជាក់ថា តាមការបំភ្លឺរបស់ជនរងគ្រោះបានរៀបរាប់ប្រាប់សមត្ថកិច្ចយើងថា កាលពីថ្ងៃទី០៣ ខែមករា ឆ្នាំ២០២៣ វេលាម៉ោង០៧និង៣០នាទី ព្រឹក នៅតូបរបស់ខ្លួន ក្នុងភូមិវត្តដំណាក់ សង្កាត់សាលាកំរើក ក្រុង/ខេត្តសៀមរាប មានជនសង្ស័យដែលខ្លួនសរសេរក្នុងគណនេយ្យហ្វេសប៊ុក ដែលបានបន្លំលួចខោអាវ ដូចដែលខ្លួនបានរៀបរាប់ក្នុងហ្វេសប៊ុកខាងលើ។ក៏បានឃាត់ខ្លួនជនសង្ស័យខាងលើមកសួរនាំ ក្រោយពីសួរនាំជនសង្ស័យបានឆ្លើយសារភាពថា ខ្លួនបានធ្វើសកម្មភាពបន្លំលួចនឹងបោកសម្លៀកបំពាក់ក្នុងក្រុងសៀមរាបចំនួន០៣លើកមកហើយរួមមាន ៖ លើកទី១ នៅថ្ងៃទី០៩ ខែមិថុនា ឆ្នាំ២០២២ ខ្លួនបានធ្វើសកម្មភាពបោកយកសម្លៀកបំពាក់ ពីជនរងគ្រោះ ដោយប្រាប់ជនរងគ្រោះថា ខ្លួនជាម៉ូយថៅកែធំ ហើយឱ្យជនរងគ្រោះច្រកខោអាវ ដែលមានតម្លៃស្មើ៥០០ដុល្លារ។ពេលខ្លួនបានខោអាវហើយខ្លួនក៏ឱ្យជនរងគ្រោះ ចូលទៅក្នុងតូបច្រកខោអាវបន្ថែមទៀត ឆ្លៀតពេលនោះខ្លួនក៏បើកម៉ូតូគេចខ្លួនបាត់។
ចំពោះលើកទី២ នៅថ្ងៃទី១២ ខែតុលា ឆ្នាំ ២០២២ នៅក្នុងភូមិបន្ទាយជ័យ សង្កាត់សៀមរាប ក្រុង/ខេត្តសៀមរាប ជនសង្ស័យបានបន្លំលួចខោអាវជនរងគ្រោះដោយឱ្យជនរងគ្រោះច្រកខោអាវហើយ រួចជិះម៉ូតូគេចខ្លួន។ចំណែកលើកទី៣ នៅថ្ងៃទី០៣ ខែមករា ឆ្នាំ២០២៣ នៅភូមិវត្តដំណាក់ សង្កាត់សាលាកំរើក ក្រុង/ខេត្តសៀមរាប ខ្លួនបានចូលលួចខោអាវរបស់ជនរងគ្រោះ រួចគេចខ្លួនពិតប្រាកដមែន ដោយខោអាវដែលលួចបានខ្លួនយកដាក់លក់ជជុះក្នុងផ្សារលើ។
លោកបញ្ជាក់ទៀតថា វត្ថុតាងដកហូតបានម៉ូតូជនសង្ស័យចំនួន០១គ្រឿង សម្លៀកបំពាក់ចំនួន០២ កំភ្លេរ។
បច្ចុប្បន្នកម្លាំងនគរបាលជំនាញនៃស្នងការដ្ឋាននគរបាលខេត្តសៀមរាបកំពុងរៀបចំកសាងសំណុំរឿងបញ្ចូនទៅតុលាការ ដើម្បីចាត់ការតាមផ្លូវច្បាប់៕
ចែករំលែកព័តមាននេះ