ខេត្ដស្វាយរៀង ៖ លោកយោធាម្នាក់យកគ្រឿងចក្រជីកចំណីព្រែកសាធារណៈយកអាចម៌ដីទៅលុបព្រែកយកធ្វើជាកម្មសិទ្ធិ បង្កឲ្យមហាជនខឹងសម្បារប្តឹងឲ្យអាជ្ញាធរបង្ក្រាប ។ ករណីនេះបានកើតឡើងនៅវេលាម៉ោង៨និង២០នាទីព្រឹកថ្ងៃទី១៩ មករា ២០២៣ នៅចំណុចតាមបណ្តោយផ្លូវជាតិលេខ១៣ ក្នុងភូមិត្រពាំងដំរី ឃុំកំពង់អំពឹល ស្រុករំដួល ។
បើតាមមន្ត្រីនគបាលប៉ុស្តិ៍រដ្ឋបាលឃុំកំពង់អំពឹលបានឲ្យដឹងថា ក្រោយពីទទួលពាក្យបណ្តឹងពីប្រជាពលរដ្ឋ អាជ្ញាធរស្រុករំដួល ដឹកនាំដោយលោកហែម ស៊ីណា អភិបាលស្រុកបានចុះផ្អាកសកម្មភាពគ្រឿងចក្រជីដី និងរថយន្ដដឹកដីមួយកន្លែងរបស់ឈ្មោះហុក សុខា ដែលជាម្ចាស់គ្រឿងចក្របានកាយដីចំណីព្រែក ដែលជាកម្មសិទ្ធិរបស់រដ្ឋទៅចាក់លុបព្រែកសាធារណៈរំលោភយកធ្វើជាកម្មសិទ្ធិ។
ប្រភពបន្តទៀតថា ហើយម្ចាស់គ្រឿងចក្រនេះ គឺគ្មានច្បាប់អនុញ្ញាតទេ ដូច្នេះ លោកហែម ស៊ីណា អភិបាលស្រុករំដួលបានបញ្ជាឲ្យឈ្មោះហុក សុខា ម្ចាស់គ្រឿងចក្រកាយដី ដែលលុបចូលព្រែកនោះឡើងវិញ រួចហើយបានដកហូតគ្រឿងចក្ររក្សាទុកបណ្តោះអាសន្ន រង់ចាំដោះស្រាយនៅពេលក្រោយ។ លោកហែម ស៊ីណា អភិបាលស្រុករំដួលបានប្រាប់ឲ្យដឹងថា បើតាមប្រជាពលរដ្ឋបានរាយការណ៍ថា ឈ្មោះហុក សុខា បានយកគ្រឿងចក្រអេស្ការវ័រទ័រធ្វើសកម្មភាពជីកដីចំណីព្រែកយកអាចម៌ដី ដឹកតាមរថយន្តទៅចាក់លុបព្រែក ត្រពាំងដំរី ដែលជាព្រែកធម្មជាតិធ្វើជាកម្មសិទ្ធិ ។
កាលពីថ្ងៃទី១៨ ខែមករា ឆ្នាំ២០២៣ លោកបានចាត់ឱ្យលោក នួន ឧត្ដម អភិបាលរងស្រុក ដឹកនាំមន្ត្រីជំនាញរបស់សាលាស្រុក កម្លាំងសមត្ថកិច្ច និងអាជ្ញាធរភូមិ-ឃុំ ចុះពិនិត្យជាក់ស្តែងឃើញថា មានការជីកដីព្រែកនិងចាក់ដីលប់ចូលដីព្រែកពិតប្រាកដមែន។ ដោយក្រុមម្ចាស់គ្រឿងចក្រឈ្មោះហុកសុខា ពុំបានសុំច្បាប់អនុញ្ញាតធ្វើអាជីវកម្ម ឲ្យបានត្រឹមត្រូវនោះទេ ដូច្នេះកម្លាំងអាជ្ញាធរស្រុករំដួលក៍បានឲ្យគ្រឿងចក្រផ្អាកសកម្មភាពបណ្តោះអាសន្ន។ក៏ប៉ុន្តែនូវពេលយប់ម្ចាស់គ្រឿងចក្រ បន្តសកម្មភាពជីកដីដឹកអាចម៌ដីទៅចក្រលប់ចូលព្រែកផ្គើនអាជ្ញាធរ។
លោកអភិបាលស្រុកបានបន្ដទៀតថា នៅថ្ងែទី១៩ ខែមករា ឆ្នាំ២០២៣ វេលាម៉ោង៨និង២០នាទីព្រឹក លោកបានដឹកនាំកម្លាំងគណៈបញ្ជាការឯកភាពស្រុករំដួល ចុះទៅពិនិត្យមើលដោយផ្ទាល់ ហើយបានដកហូតគ្រឿងចក្រយកមករក្សាទុករង់ចាំការដោះស្រាយគ្នាតាមផ្លូវច្បាប់ ចំណែកឯដីចាក់ចូលដីព្រែកត្រូវកាយដីឡើងវិញហើយ បានរាយការណ៍ជូនឯកឧត្តមអភិបាលខេត្តស្វាយរៀងជ្រាបជារបាយការណ៍ ដូច្នេះ រង់ចាំចំណាត់ការរបស់ថ្នាក់លើដោះស្រាយ ។
ចំពោះការចុះផ្អាកសកម្មភាព និងដករហូតគ្រឿងចក្រនេះ ទី១-ព្រោះថាគ្រឿងចក្រគ្មានច្បាប់អនុញ្ញាតធ្វើអាជីវកម្ម ទី២-ហើយជីកដីចំណីព្រែក និងទី៣-ចាក់ដីចូលព្រែក លប់ដីព្រែកសាធារណៈ ទី៤-ផ្គើនមិនគោរពតាមអាជ្ញាធរមានសមត្ថកិច្ចក្នុងមូលដ្ឋានភូមិ ឃុំនិងស្រុក ។ លោកហែម ស៊ីណា បានបញ្ចាក់ថា ការកាយដីចេញវិញនេះមិនមែនបញ្ចប់រឿងនោះទេ គឺអាស្រ័យទៅលើថ្នាក់ដឹកនាំលោកជាអ្នកសម្រេច ។
លោកបានបញ្ជាក់ទៀតថា នាពេលចុះផ្អាកនោះ គឺបានដកហូតគ្រឿងចក្រផ្អាកសម្មភាពបញ្ជូនមករក្សាទុកនៅប៉ុស្តិ៍នគបាលរដ្ឋបាល ឃុំកំពង់អំពឹល ហើយឱ្យម្ចាស់គ្រឿងចក្រទៅសុំច្បាប់ធ្វើអាជីវកម្មនិងឲ្យម្ចាស់ដី ឈ្មោះទិត្យ ស៊ីថា ហៅសោម មន្ត្រីយោធាថ្នាក់វរសេនីយ៍ យកឯកសារពាក់ព័ន្ធចូលទៅសាលាស្រុករំដួល ដើម្បីពិនិត្យជាក់ស្តែងសិន ចំណែករឿងកាយដីព្រែក និងចាក់ដីលុបចូលព្រែក រំលោភយកធ្វើកម្មសិទ្ធិ ត្រូវរង់ចាំថ្នាក់លើលោកជាអ្នកសម្រេច។
មហាជនកំពុងតាមដានរឿងមន្ត្រីយោធាថ្នាក់វរៈសេនីយ៍ម្នាក់នេះ ថាតើអាជ្ញាធរខេត្តមានចំណាត់ការផ្លូវច្បាប់ ឬយ៉ាងណា? ឬចាប់ម្ចាស់គ្រឿងចក្រអ្នកស៊ីឈ្នួល? គួរចាប់ទាំងពីរ បើគិតតាមនីតិវិធីនៃក្រមព្រហ្មទណ្ឌ ។ ទាក់ទិនករណីនេះដែរ មិនអាចសុំការបំភ្លឺពីលោក ទិត្យ ស៊ីថា មន្ត្រីយោធា ដែលជាម្ចាស់ដីបានទេ ដោយទូរព្ទ័ចូលហើយគ្មានមនុស្សទទួល ។
ព័ត៌មានបន្ថែម កោះសន្តិភាពនឹងមានផ្សាយជូនបន្ត ។
ចែករំលែកព័តមាននេះ