ខេត្តកណ្តាល ៖ គ្រោះធម្មជាតិបាក់ច្រាំងទន្លេមេគង្គក្រោមបានវាយលុកមួយឆ្នាំបន្តិចៗបង្កឲ្យដីស្រែចម្ការនិងដីលំនៅឋានរាប់ហិកតារបស់បងប្អូនពលរដ្ឋបានបាក់ចូលទៅក្នុងបាតទន្លេរួមជាមួយផ្ទះរាប់រយខ្នងត្រូវបង្ខំចិត្តរុះរើជាបន្តបន្ទាប់ ហើយរាតល្បាតរហូតដល់បានកាត់ផ្លូវកៅស៊ូលេខ១៤ ចូលទៅកាន់ច្រកទ្វារអន្តរជាតិក្អមសំណ ចំណុចភូមិបឹងលើ ឃុំខ្ពប់អាទាវ ស្រុកលើកដែក ខេត្តកណ្តាល រយៈពេលជិត៥ឆ្នាំហើយមិនទាន់ដោះស្រាយជូនពលរដ្ឋបានផង ឥឡូវគ្រោះបាក់ច្រាំងទន្លេបានកាត់ផ្តាច់ផ្លូវកៅស៊ូនេះមួយកន្លែងទៀតនៅចំណុចភូមិព្រែកបាក់ ឃុំព្រែកទន្លាប់ ស្រុកលើកដែក ខេត្តកណ្តាល។ លោក ងី សារី ជំទប់ទី២ឃុំព្រែកទន្លាប់បានប្រាប់ឲ្យភ្នាក់ងារកោះសន្តិភាពដឹងថា ពាក់ពន្ធ័ការបាក់ច្រាំងទន្លេនៅចំណុចភូមិព្រែកបាក់នេះបានបាក់ម្តងបន្តិចៗរយៈពេលជិត៥ឆ្នាំដែរហើយធ្វើឲ្យពលរដ្ឋបាត់បង់ដីចម្ការ និងដីលំនៅឋានរាប់ហិកតាបាក់ចូលទៅក្នុងបាតទន្លេរួមជាមួយផ្ទះពលរដ្ឋជាច្រើនខ្នងត្រូវបង្ខំចិត្តរុះរើ។
កាលនោះរូបលោកនៅជាមេឃុំតែងតែចុះផ្សព្វផ្សាយប្រាប់ដល់ពលរដ្ឋឲ្យមានការប្រុងប្រយត្ន័ជានិច្ចខ្លាចមានគ្រោះថ្នាក់ដល់អាយុជីវិតមនុស្ស ហើយបានធ្វើរបាយការណ៍ជូនទៅថ្នាក់លើជាបន្តបន្ទាប់ផងដែរ។ ការបាក់ច្រាំងទន្លេកាត់ផ្តាច់ផ្លូវកៅស៊ូលេខ១៤ នៅចំណុចភូមិព្រែកបាក់ ឃុំព្រែកទន្លាប់នេះគឺបានចាប់ផ្តើមបាក់តាំងពីថ្ងៃទី១៧ ខែកក្កដា ឆ្នាំ២០១៧ វេលាម៉ោង៥ល្ងាចរហូតមកដល់រសៀលថ្ងៃទី១៨ កក្កដា ប្រវែង៨០ម៉ែត្រ និងជម្រៅចូលដល់ថ្នល់កៅស៊ូប្រហែល៣ម៉ែត្រផងដែរ។ ប្រជាពលរដ្ឋរស់នៅក្បែរតំបន់បាក់ច្រាំងទន្លេនោះមានការព្រួយបារម្ភយ៉ាងខ្លាំង ខ្លាចគ្រោះបាក់ច្រាំងទន្លេនេះបាក់ដាច់ផ្លូវហើយរាលដាលដល់ផ្ទះពួកគាត់បន្តទៀត។
ដូច្នេះពួកគាត់សូមសំណូមពរដល់អាជ្ញាធរ និងមន្ត្រីជំនាញជាពិសេសប្រមុខរាជរដ្ឋាភិបាលកម្ពុជាមេត្តាជួយចាត់វិធានការទប់ស្កាត់កុំឲ្យបាក់បន្តទៀត និងជួយសិក្សាធ្វើផ្លូវវាងឲ្យបានលឿនដើម្បីឲ្យប្រជាកសិករងាយស្រួលដឹកជញ្ជូនកសិផលយកទៅលក់នៅប្រទេសជិតខាងបានចំណេញប្រាក់បន្តិចបន្តួចចិញ្ចឹមជីវភាពគ្រួសារព្រោះឥឡូវនេះគ្រោះបាក់ច្រាំងទន្លេបានកាត់ផ្តាច់ផ្លូវកៅស៊ូលេខ១៤ចូលទៅកាន់ច្រកទ្វារអន្តរជាតិក្អមសំណ២កន្លែង ហើយនៅចំណុចឃុំខ្ពប់អាវ និងឃុំព្រែកទន្លាប់កាន់តែធ្វើឲ្យច្រកទ្វារអន្តរជាតិមួយនេះស្ងប់ស្ងាត់សេដ្ឋកិច្ចបាត់បង់ថវិកាជាតិយ៉ាងធ្ងន់ធ្ងរ៕
ចែករំលែកព័តមាននេះ