ខេត្តកណ្តាល៖ មន្ទីរសាធារណការ និងដឹកជញ្ជូន ខេត្តកណ្តាល បានប្រកាសហាមឃាត់ មិនឱ្យចរាចរណ៍រថយន្ត​ដឹកទំនិញធុនធ្ងន់ នៅលើកំណាត់​ផ្លូវជាតិលេខ២១ ក្នុងស្រុកស្អាង និងក្រុងតាខ្មៅ ខេត្តកណ្តាល រយៈពេល ៧ថ្ងៃ គិតចាប់ពីថ្ងៃទី២០ ខែមករា ដល់ថ្ងៃទី២៦ ខែមករា ឆ្នាំ២០២៣​។ មូលហេតុ ដោយសារបញ្ហាទឹកជំនន់​កើនឡើងខ្លាំង ដែលធ្វើ​ឱ្យ​មានការជន់លិច​កួច ហូរច្រោះដាច់ដីក្បាលស្ពានព្រែកថី ( ស្ពានលេខ៤ )។

សេចក្តីជូនដំណឹង លើកឡើងថា ចំពោះរថយន្ត​ដឹកទំនិញធុនធ្ងន់ ដែល​មានបំណង​ធ្វើដំណើរទៅកាន់ស្រុកកោះធំ ឬពីស្រុកកោះធំ ទៅក្រុងតាខ្មៅ តម្រូវឱ្យវាង​ធ្វើដំណើរតាមផ្លូវខេត្តលេខ១១០ ដោយ​ឆ្លងស្ពានមិត្តភាពកម្ពុជា-ចិន តាខ្មៅ និងស្ពានមិត្តភាព​កម្ពុជា-ចិន ​កោះធំវិញ។ ចំពោះ​រថយន្តដឹកទំនិញពីស្រុកកោះធំ ទៅខេត្តតាកែវ សូមវាងធ្វើដំណើរតាមផ្លូវខេត្តលេខ១២៩។

សេចក្តីជូនដំណឹងដដែល បញ្ជាក់ថា សម្រាប់រថយន្ត​គ្រួសារ អាចធ្វើចរាចរណ៍បានជាធម្មតា លើកំណាត់​ផ្លូវជាតិលេខ២១ ចន្លោះពីស្រុកកោះធំ និងក្រុងតាខ្មៅ ក្នុងខេត្តកណ្តាល៕