ត្រឹមមួយប៉ប្រិចភ្នែក! អគ្គិភ័យលេបត្របាក់ផ្ទះ១ខ្នងអស់ទាំងស្រុង
- ភ្នំពេញ
រាជធានីភ្នំពេញ ៖ សង្ស័យឆ្លងចរន្តអគ្គិសនីបង្កជាអណ្ដាតភ្លើង បណ្ដាលឲ្យឆាបឆេះផ្ទះឈើលើថ្ម
រាជធានីភ្នំពេញ ៖ សង្ស័យឆ្លងចរន្តអគ្គិសនីបង្កជាអណ្ដាតភ្លើង បណ្ដាលឲ្យឆាបឆេះផ្ទះឈើលើថ្មក្រោមប្រក់ស័ង្កសី១ខ្នង រួមទាំងទ្រព្យសម្បត្តិក្នុងនោះអស់ទាំងស្រុង បើទោះបីជាមានការអន្តរាគមន៍ពីសំណាក់រថយន្តពន្លត់អគ្គិភ័យ និងអ្នកភូមិជួយពន្លត់យ៉ាងណាក៏មិនឈ្នះដែរ ។ដោយសារតែផ្ទះនោះគឺជាផ្ទះឈើ ដូច្នេះល្បឿននៃការឆាបឆេះនោះលឿនខ្លាំងណាស់តែមួយសន្ទុះប៉ុណ្ណោះឆេះអស់តែម្តង ហើយកម្ដៅភ្លើងបានភាយចេញបង្កការប៉ះពាល់ដល់ផ្ទះថ្មស្ថិតនៅក្បែរនះបែកកញ្ចក់បង្អួចផងដែរ។
ហេតុការណ៍ខាងលើនេះបានបង្កការភ្ញាក់ផ្អើលកើតឡើងកាលពីវេលាម៉ោង១និង២០នាទីរសៀលថ្ងៃទី១៨ ខែមករា ឆ្នាំ២០២៣ នៅក្នុងភូមិតាឡី សង្កាត់ដង្កោ ខណ្ឌដង្កោ រាជធានីភ្នំពេញ ។
តាមប្រភពពីកន្លែងកើតហេតុបានប្រាប់ឲ្យដឹងថា ម្ចាស់ផ្ទះឈ្មោះញ៉ែម សុខនាង ភេទប្រុស អាយុ៤៥ឆាំ្ន ផ្ទះនេះជាប្រភេទសំណង់ ឈើប្រក់ស័ង្កសី ទំហំ៥ម៉ែត្រគុណ៧ម៉ែត្រ និងមានបន្ទប់ថ្មក្រោម ហើយបានជួលឲ្យកម្មកររោងចក្រស្នាក់នៅ ។ ដោយឡែកពេលកើតមានអគ្គិភ័យនេះឡើង កម្មរទាំងនោះបានបិទទ្វារចាក់សោរចោលរួចចេញទៅធ្វើការបាត់អស់ពុំមានអ្នកនៅឡើយ ។ រហូតដល់វេលាម៉ោងកើតហេតុខាងលើ ក៏ស្រាប់តែមានភ្លើងឆាបឆេះយ៉ាងសន្ធោសន្ធៅពេញបន្ទុកបាត់ទៅហើយ ទើបត្រូវអ្នកជិតខាងដឹងមានការភ្ញាក់ផ្អើល ។
តាមប្រភពដដែលបានប្រាប់ឲ្យដឹងបន្តទៀតថា ខណៈនោះអ្នកជិតខាងបាននាំគ្នាជួយពន្លត់ដែរ ប៉ុន្តែពុំអាចពន្លត់ឈ្នះទេ ម្យ៉ាងទៀតក៏ពុំអាចចូលទៅជិតបានដែរ ភ្លើងឆេះខ្លាំងកម្ដៅក៏ខ្លាំង ។ចំណែកអាជ្ញាធរនិងសមត្ថកិច្ចខណ្ឌដង្កោបានចេញទៅកាន់ទីនោះ ហើយរថយន្តពន្លត់អគ្គិភ័យក៏បានទៅច្រើនគ្រឿងដែរ ។ ប៉ុន្តែពុំអាចពន្លត់ភ្លើងរលត់ភ្លាមៗបានឡើយ ផ្ទះមូលត្រូវបានភ្លើងបានឆេះទាំងស្រុងនិងពុំបានរាលដល់ផ្ទះផ្សេងទេ តែកម្ដៅភ្លើងបានបណ្ដាលឲ្យបែកកញ្ចក់បង្អួចផ្ទះថ្មនៅជិតនោះផងដែរ ៕
ចែករំលែកព័តមាននេះ