រាជធានីភ្នំពេញ ៖ យ៉ាងហោចណាស់មានមនុស្សរងរបួសធ្ងន់ស្រាល៣នាក់ បង្កឡើងដោយបុរសម្នាក់ស្រវឹងស្រា បើករថយន្តថយក្រោយ ជ្រុលទៅបុកអ្នកលក់នំប៉ាវចៀន កំពុងតែឈរចៀននំប៉ាវរងរបួសធ្ងន់ម្នាក់ និងស្រាល២នាក់ បង្កឲ្យមានការភ្ញាក់ផ្អើលកាលវេលាម៉ោង០៣ទៀបភ្លឺ ថ្ងៃទី១៧ ខែកក្កដា ឆ្នាំ២០១៧ ស្ថិតនៅភូមិត្រពាំងថ្លឹង សង្កាត់ចោមចៅ ខណ្ឌពោធិ៍សែនជ័យ ។
ជនរងគ្រោះរងរបួសធ្ងន់ទី១.ឈ្មោះ ចាន់ ផល្លា ភេទស្រី អាយុ៤៧ឆ្នាំ មុខរបរលក់នំប៉ាវចៀន រស់នៅផ្ទះកើតហេតុ ភូមិត្រពាំងថ្លឹង សង្កាត់ចោមចៅ ខណ្ឌពោធិ៍សែនជ័យ និងអ្នករបួសស្រាល២នាក់ប្តីប្រពន្ធ ។ ប្តីឈ្មោះ អ៊ុត សំអូន អាយុ៣៧ឆ្នាំ មុខរបរលក់នំប៉ាវចៀន និងប្រពន្ធឈ្មោះ ចាន់ កុម្ភៈ ភេទស្រី អាយុ៣៥ឆ្នាំ មុខរបរលក់នំប៉ាវចៀន ។ ជនបង្កឈ្មោះ ទន់ មករា ភេទប្រុស អាយុ២៦ឆ្នាំ មុខរបរបើករថយន្ត រស់នៅសង្កាត់កាកាប ខណ្ឌពោធិ៍សែនជ័យ ។
តាមប្រភពព័ត៌មានពីជនរងគ្រោះបាននិយាយថា នៅមុនពេលកើតហេតុ ជនរងគ្រោះឈ្មោះ ចាន់ កុម្ភៈ ត្រូវជាប្អូនស្រីជនរងគ្រោះរបួសធ្ងន់ បាននិយាយថា ខណៈពេលពួកគាត់កំពុងតែចៀននំប៉ាវលក់ ស្រាប់តែឃើញរថយន្តមួយគ្រឿង ពណ៌ស ពាក់ស្លាកលេខ ភ្នំពេញ ២AN-៥២៥៣ បើកបរដោយបុរសម្នាក់ក្នុងសភាពស្រវឹង បើកត្រលប់ក្រោយពីជើងទៅត្បូង ដោយមានអ្នកស៊ីញ៉ូម្នាក់ ដែលកំពង់ស៊ីញ៉ូៗ បោយដៃទៅវិញទៅមក ស្រាប់តែរថយន្តបង្កបត់រថយន្តមិនទាន់ត្រង់ផង ស្រាប់តែរថយន្តខាងលើជាន់ហ្គារហោះស្ទុយទៅលើបុកខ្ទះខ្លាញ់ចៀននំប៉ាវ ដែលដាក់ជាជួរ បណ្តាលឲ្យខ្លាញ់ខ្ទាតទៅលើអ្នកឈរចៀននំប៉ាវរងរបួសធ្ងន់បងស្រីគាត់យ៉ាងធ្ងន់ធ្ងរ ចំពោះគាត់ និងប្តី រងរបួសស្រាល ។
ប្រភពបានបន្តទៀតថា ភ្លាមនោះៗ ពួកគាត់បានប្រញាប់ប្រញាល់ទៅមន្ទីពេទ្យឯកជននៅជិតកន្លែងកើតហេតុ ហើយបានព្យាបាលបឋម ដោយបងស្រីរបស់គាត់រងរបួសធ្ងន់ ត្រូវរថយន្តដឹកទៅមន្ទីពេទព្រះកុសមះ ដើម្បីព្យាបាលបន្ត ។
ក្រោយពេលកើតហេតុ សមត្ថកិច្ចប៉ុស្តិ៍បានឃាត់ជនបង្កខាងលើ ហើយបានប្រគល់ឲ្យជំនាញខណ្ឌពោធិ៍សែនជ័យ យកអ្នកបើកបរ និងរថយន្តបង្កខាងលើយកទៅរក្សាទុក និងរងចាំការដោះស្រាយតាមនីតិវិធី ៕
ចែករំលែកព័តមាននេះ