ខេត្តតាកែវ ៖ បុរសម្នាក់រស់នៅស្រុកអង្គរបូរី និងបក្សពួកមួយក្រុមមិនស្គាល់អត្តសញ្ញាណ ដែលតាំងខ្លួនជាខ្សែឧបនាយករដ្ឋមន្ត្រី បាននាំគ្នាទៅរុះរើម៉ាស៊ីនស្ថានីយបូមទឹកប្រជាពលរដ្ឋ ដែលកំពុងបម្រើការស្រោចស្រពស្រូវប្រាំងរាប់សិបហិកតា ស្ថិតនៅភូមិទួលសាំងក ឃុំអង្គរបូរី ស្រុកអង្គរបូរី ខេត្តតាកែវ ត្រូវបានម្ចាស់ស្ថានីយដាក់ពាក្យប្តឹងទៅកងរាជអាវុធហត្ថខេត្តតាកែវ ក្នុងបទបំផ្លិចបំផ្លាញដោយចេតនាទ្រព្យសម្បត្តិអ្នកដទៃ ។
បុគ្គលឈ្មោះ ផាន់ ដា និងបក្សពួកមួយក្រុមមិនស្គាល់អត្តសញ្ញាណតាំងខ្លួនជាខ្សែអ្នកធំ ខ្សែឧបនាយករដ្ឋមន្ត្រី បានទៅគំរាមកំហែងម្ចាស់ស្ថានីយបូមទឹក និងបានរុះរើបំផ្លិចបំផ្លាញម៉ាស៊ីនប៉ូបទឹកចេញយកម៉ាស៊ីនខ្លួនទៅដាក់ជំនួសវិញ ត្រូវបានប្រជាពលរដ្ឋដាក់ពាក្យប្តឹងទៅកម្លាំងកងរាជអាវុធហត្ថខេត្តតាកែវ ស្រាវជ្រាវបុគ្គលមួយក្រុមខាងលើយកមកសួរនាំ ។
ពលរដ្ឋបានបង្ហើបថា ឈ្មោះ ផាន់ ដា កាន់លិខិតមួយច្បាប់ ដែលមានចុះហត្ថលេខា ដោយលោកមេឃុំអង្គរបូរី និងលោក រស់ ប៊ុនធឿន ចៅហ្វាយស្រុកអង្គរបូរី ទៅគំរាមកំហែងពួកគាត់ ឲ្យរើម៉ាស៊ីបូមទឹកចេញទាំងដែលកំពុងបូមទឹកដាក់ស្រែសុខៗ ។ ដោយឡែក មានប្រភពផ្សេងមួយបញ្ជាក់ថា លោក រស់ ប៊ុនធឿន ចៅហ្វាយស្រុកអង្គរបូរី បានទទួលលុយពីឈ្មោះ ផាន់ ដា មិនតិចពាន់ដុល្លានោះទេក្នុងរឿងនេះ។
ក្រោយផ្ទុះរឿងរុះរើម៉ាស៊ីនប៉ូមទឹកដាក់ស្រែប្រជាពលរដ្ឋនេះ ងាកមកមើលមន្ទីរជំនាញពាក់ព័ន្ធ មានលោក ញ៉ឹម ស្រ៊ន ប្រធានមន្ទីរកសិកម្ម និង លោក ប៉ុន ហ៊ួ ប្រធានមន្ទីរធនធានទឹកនិងឧតុនិយមវិញ សំងំយកសុខរៀងៗខ្លួន ដោយមិនមានវិធានការណ៍ដោះស្រាយសោះ សូម្បីទៅអើតមើលក៏មិនទៅក្បែរផង ។
ក្រុមប្រជាពលរដ្ឋដែលប្រើប្រាស់ទឹកក្នុងស្ថានីយខាងលើ សុំសំណូមពទៅលោក អ៊ូច ភា អភិបាលនៃគណៈអភិបាលខេត្តតាកែវ មេត្តាមានវិធានការណ៍ដោះស្រាយរកយុត្តិធម៌ជូនពួកគាត់ផង ពិសេស សុំពិនិត្យមើលការងារ លោក រស់ ប៊ុនធឿន ចៅហ្វាយស្រុកអង្គរបូរី ដែលលក់ទឹកប្រឡាយឱ្យឈ្មោះផាន់ ដា បានជាឈ្មួញទឹកមិនឱ្យអ្នកណាមកបូមដាក់ស្រែ ។
សូមរំលឹកផងដែរថា លោក រស់ ប៊ុនធឿន ចៅហ្វាយស្រុកអង្គរបូរី ដែលគេមើលឃើញថា ចូល
ចិត្តដើរច្រៀងខារ៉ាអូខេ ផឹកស៊ី សឹងតែរាល់ថ្ងៃកំពុងបង្កើតរឿងអាស្រូវពេញស្រុក បង្កើតបក្សពួកប្រព្រឹត្តអំពើពុករលួយ ដូចជាករណីកាយថ្មភ្នំបូរីដែលជាភ្នំប្រវត្តិសាស្ត្រលក់ បញ្ជាមន្ត្រីក្រោមឳវាទចុះទៅវាស់វែងដីមានទំនាស់តាមភាគីម្ខាងបញ្ជាទាំងទទឹងទិសខុសទៅនិងនីតិវិធីទៀត លើសពីនេះ កាលពីប៉ុន្មានថ្ងៃមុននេះ បានដឹកនាំមន្ត្រីទាំងប្រុស ទាំងស្រី ក្នុងសាលាស្រុកចូលច្រៀងខារ៉ាអូខេទាំងថ្ងៃក្នុងម៉ោងធ្វើការទៀតផង ។
ព័ត៌មានលម្អិតនឹងមានផ្សាយជូនលើកាសែតកោះសន្តិភាព ។
ចែករំលែកព័តមាននេះ