តើមានរឿងអ្វី? បុរសម្នាក់លោ.តចុះពីលើផ្ទះ រួចឡើងរថយន្តទៅបាត់ បន្សល់ទុកដំណក់ឈា.មមុខផ្ទះ(វីដេអូ)
- បាត់ដំបង
មានការភ្ញាក់ផ្អើលទាំងព្រឹក ក្រោយពីមានសេចក្ដីរាយការណ៍ថា មានបុរសជនជាតិចិនម្នាក់បាន
មានការភ្ញាក់ផ្អើលទាំងព្រឹក ក្រោយពីមានសេចក្ដីរាយការណ៍ថា មានបុរសជនជាតិចិនម្នាក់បាន
ខេត្តបាត់ដំបង ៖ មានការភ្ញាក់ផ្អើលទាំងព្រឹក ក្រោយពីមានសេចក្ដីរាយការណ៍ថា មានបុរសជនជាតិចិនម្នាក់បានលោ.តចុះពីលើផ្ទះល្វែងជាន់ទី១ នៅក្នុង «បុរីរំចេក» ស្ថិតនៅភូមិរំចេក៤ សង្កាត់រតនៈ ក្រុងបាត់ដំបង នៅវេលាយប់រំលងអធ្រាត្រឈានចូលថ្ងៃទី១៣ ខែមករា ឆ្នាំ២០២៣ នឹងមានរថយន្តមួយគ្រឿងបានទៅដឹកជម្លៀសបុរសរូបនោះចេញភ្លាមៗពីកន្លែងកើតហេតុ ដោយបន្សល់ទុកតែស្លាកស្នាមឈា.មប៉ុន្មានដំណក់នៅលើការ៉ូ និងបក្សពួកចំនួន០៥នាក់ រាប់ទាំងស្ត្រីអ្នកបកប្រែម្នាក់ផង ត្រូវបានមន្ត្រីការិយាល័យអន្តោប្រវេសន៍ នាំយកទៅកាន់ស្នងការខេត្ត ដើម្បីសួរនាំ។
តាមប្រភពព័ត៌មានបានឲ្យដឹងថា ហេតុការណ៍ខាងលើនេះ ពុំមានសមត្ថកិច្ចដឹងភ្លាមៗក្រោយពេលកើតហេតុនោះទេ បើទោះបីជាកន្លែងកើតហេតុ ស្ថិតនៅខាងកើតស្នងការដ្ឋានខេត្ត ចម្ងាយប្រមាណ៣០០ម៉ែត្រក្ដី។ លុះនៅថ្ងៃទី១៣ ខែមករា ទើបមានការភ្ញាក់ផ្អើល និងជ្រាបព័ត៌មាននេះដល់សមត្ថកិច្ច ក្រោយពីមានការខ្សិបខ្សៀវសួរនាំតៗគ្នា។
ក្រោយពីទទួលបានដំណឹងនេះ គេឃើញកម្លាំងការិយាល័យនគរបាលអន្តោប្រវេសន៍ និងកម្លាំងកងរាជអាវុធហត្ថប៉ុន្មាននាក់ បានចុះទៅកាន់កន្លែងកើតហេតុ ដើម្បីសួរនាំព័ត៌មាន តែគេពុំឃើញវត្តមានកម្លាំងនគរបាលព្រហ្មទណ្ឌ នៃស្នងការខេត្តចុះទៅកាន់ទីនោះទេ។ ហើយនៅកន្លែងកើតហេតុ ពុំមានប្រភពណាជាក់លាក់ទេ តែគេឃើញមានស្លាកស្នាមឈា.មប៉ុន្មានដំណក់បន្សល់ទុកលើឥដ្ឋការ៉ូខាងមុខផ្ទះល្វែង ដែលពួកចិនជួលស្នាក់នៅ (កន្លែងកើតហេតុ)។
បើតាមប្រភពព័ត៌មាននៅទីនោះ ដែលមានមន្ត្រីអន្តោប្រវេសន៍កំពុងសួរនាំបឋមផង គេបាននិយាយថា នៅវេលាម៉ោងប្រហែល២រំលងអធ្រាត្រឈានចូលថ្ងៃទី១៣ ខែមករា គេបានឃើញបុរសជនជាតិចិនម្នាក់លោ.តចុះពីលើផ្ទះល្វែងជាន់ទី១។ ប៉ុន្តែគេមិនដឹងថា តើជនជាតិចិនម្នាក់នោះមានរឿងអ្វីកើតឡើងទេ? ខណៈបក្សពួកគេប៉ុន្មាននាក់ទៀត បាននិងកំពុងស្នាក់នៅក្នុងផ្ទះនោះដែរ។ គេមិនបានដឹងថា តើជននោះរងរបួសបែបណា? ស្រាប់តែបន្តិចក្រោយមក គេឃើញមានរថយន្តមួយគ្រឿងដែលគេមិនចាំម៉ាក បានមកដឹកបុរសរូបនោះចាកចេញពីកន្លែងកើតហេតុភ្លាមៗផងដែរ។
ប្រភពដដែលបានបញ្ជាក់ថា ជនជាតិចិនមួយក្រុមនោះ មានទាំងស្ត្រីជាអ្នកបកប្រែម្នាក់ផង បានជួលផ្ទះនោះស្នាក់នៅ និងជិះសុទ្ធតែរថយន្តទំនើបៗចេញចូលយ៉ាងស្ងាត់ស្ងៀមពុំដែលមានប្រាស្រ័យទាក់ទងជាមួយអ្នកក្បែរខាងឡើយ។ ហើយនៅកន្លែងកើតហេតុ ពេលមន្ត្រីការិយាល័យនគរបាលអន្តោប្រវេសន៍ចុះទៅដល់ ក្រុមចិនទាំងនោះកំពុងសម្ងំនៅក្នុងផ្ទះ ហើយត្រូវបានសមត្ថកិច្ចហៅឲ្យចេញក្រៅ ដើម្បីសួរនាំ។
ជាក់ស្ដែងពួកគេមានគ្នាចំនួន០៥នាក់ រាប់ទាំងស្ត្រីជនជាតិខ្មែរម្នាក់ជាអ្នកបកប្រែផង តែបើរាប់ទាំងជនម្នាក់ដែលលោ.តចុះពីលើផ្ទះទៀត គឺពួកគេមានគ្នាចំនួន០៦នាក់។ ហើយនៅខាងមុខផ្ទះគេឃើញមានរថយន្តស៊េរីទំនើបមួយគ្រឿងដែលក្រុមចិននេះជិះ គឺរថយន្តម៉ាកTOYOTA ALPHARD ពណ៌ស ពាក់ស្លាកលេខ ភ្នំពេញ 2-BP-6613 តែពុំមាននរណាបានដឹងថា តើជនជាតិកឺកឺមួយក្រុមនេះ ធ្វើការងារអ្វី មានមុខរបរអ្វីទេ?។
ជុំវិញករណីខាងលើនេះ បើតាមមន្ត្រីអន្តោប្រវេសន៍ បាននិយាយថា គេបានត្រួតពិនិត្យជាបឋមទៅលើក្រុមជនជាតិចិននោះ ពាក់ព័ន្ធនឹងឯកសារ ឬលិខិតស្នាមនានា តែពួកគេហាក់ពុំមានឯកសារអ្វីត្រឹមត្រូវទេ។ ដោយឡែកបើនិយាយពីម្ចាស់ផ្ទះជួលវិញ ទំនងក៏មិនបានផ្ដល់ព័ត៌មានទៅកាន់សមត្ថកិច្ចមូលដ្ឋានឲ្យបានដឹងតាមច្បាប់ទម្លាប់ដែរ នៅពេលជួលផ្ទះឲ្យក្រុមជនជាតិចិននេះស្នាក់នៅ លុះពេលមានបញ្ហាកើតឡើង ទើបមានការភ្ញាក់ផ្អើល។
ប៉ុន្តែទោះបីជាយ៉ាងណាក្ដី ក្រោយពីត្រួតពិនិត្យ និងសាកសួរព័ត៌មានបឋមនៅកន្លែងកើតហេតុ លោកស្នងការបានបញ្ជាឲ្យមន្ត្រីការិយាល័យអន្តោប្រវេសន៍ នាំខ្លួនក្រុមជនជាតិចិនចំនួន០៤នាក់ និងស្ត្រីអ្នកបកប្រែម្នាក់ រួមទាំងរថយន្តមួយគ្រឿងផង យកទៅកាន់ស្នងការខេត្ត ដើម្បីសួរនាំ និងធ្វើការស្រាវជ្រាវបន្ត។ ប៉ុន្តែគេមិនឃើញមានមន្ត្រីជំនាញព្រហ្មទណ្ឌ នាំគ្នាចុះទៅពិនិត្យដំណក់ឈា.ម ឬស្លាកស្នាមផ្សេងៗនៅកន្លែងកើតហេតុ ឬក៏ត្រួតពិនិត្យក្នុងផ្ទះស្នាក់នៅរបស់ក្រុមជនជាតិចិននោះទេ ដើម្បីស្វែងរកមូលហេតុដែលជនជាតិចិនម្នាក់លោ.តចុះពីលើផ្ទះ រួចរត់គេចខ្លួនបាត់តាមរយៈរថយន្តមួយគ្រឿងទៅដឹកជម្លៀសចេញទាំងកណ្ដាលអធ្រាត្រ៕
ចែករំលែកព័តមាននេះ