ខេត្តសៀមរាប ៖ មានករណីទុស្សេខ្សែភ្លើង បណ្តាលឱ្យឆេះតូបលក់ដូរអស់ចំនួន៦តូបទាំងស្រុង ក្នុងផ្សារពួក និងសរុបជាទឹកប្រាក់អស់ប្រមាណជា៨៥.០០០ម៉ឺនដុល្លារ បង្កការភ្ញាក់ផ្អើលពេញខេត្តសៀមរាប។ ហេតុការណ៍ខាងលើនេះបានបង្កការភ្ញាក់ផ្អើលកើតឡើងកាលពីវេលាម៉ោង១២ និង២០នាទីយប់រំលងអធ្រាត្រឈានចូលថ្ងៃទី១២ ខែមករា…
ខេត្តសៀមរាប ៖ មានករណីទុស្សេខ្សែភ្លើង បណ្តាលឱ្យឆេះតូបលក់ដូរអស់ចំនួន៦តូបទាំងស្រុង ក្នុងផ្សារពួក និងសរុបជាទឹកប្រាក់អស់ប្រមាណជា៨៥.០០០ម៉ឺនដុល្លារ បង្កការភ្ញាក់ផ្អើលពេញខេត្តសៀមរាប។
ហេតុការណ៍ខាងលើនេះបានបង្កការភ្ញាក់ផ្អើលកើតឡើងកាលពីវេលាម៉ោង១២ និង២០នាទីយប់រំលងអធ្រាត្រឈានចូលថ្ងៃទី១២ ខែមករា ឆ្នាំ ២០២៣ នៅចំណុចក្នុងផ្សារពួក ស្ថិតក្នុងភូមិចំបក់ហែ ឃុំពួក ស្រុកពួក ខេត្តសៀមរាប ។
បើតាមលោកវរសេនីយ៍ឯក ទេព ពុំសែន អធិការនគរបាលស្រុកពួក បានប្រាប់ឱ្យដឹងកាលពីវេលាម៉ោង៣រសៀលថ្ងៃទី១២ ខែមករា ឆ្នាំ ២០២៣ ម្សិលមិញនេះថា ជនរងគ្រោះដែលជាម្ចាស់កម្មសិទ្ឋិតូបលក់ចំនួន៦តូប សរុបការខូចខាត ស្មើទឹកប្រាក់ប្រហែល៨៥.០០០ដុល្លារ ករណីទុស្សេខ្សែភ្លើងនេះចេញពីតូបលេខ២។
លោកបញ្ជាក់ថា ករណីភ្លើងឆេះតូបលក់ដូរអស់ចំនួន៦តូបនៅផ្សារពួក រួមមាន តូបទី១-ម្ចាស់ឈ្មោះ លឿម ស្រីលឹក ភេទស្រី អាយុ៤២ឆ្នាំ (អ៊ុតសក់និងលក់ចាប់ហួយ) នៅភូមិអូរតាប្រាក់ ឃុំពួក ស្រុកពួក ខេត្តសៀមរាប ការខូចខាតសរុបអស់១ម៉ឺនដុល្លារ តូបទី២ និង តូបទី៣-ម្ចាស់ឈ្មោះ ធឿង ម៉ាឡា ភេទស្រី អាយុ៣៦ឆ្នាំ (លក់ចាប់ហួយ) ការខូចខាតសរុប១៥.០០០ដុល្លារ តូបទី៤-ម្ចាស់ឈ្មោះ ឡុង បឿត ភេទស្រី អាយុ (លក់ចាប់ហួយ) នៅភូមិចំបក់ហែ ឃុំពួក ស្រុកពួក ខេត្តសៀមរាប ការខូចខាត សរុបអស់ ២ម៉ឺនដុល្លារ ។
តូបទី៥-ម្ចាស់ឈ្មោះ និវ គិមសួរ ភេទស្រី អាយុ៣៥ឆ្នាំ (លក់ចាប់ហួយ) នៅភូមិគោកស្រម៉ ឃុំល្វា ស្រុកពួក ខេត្តសៀម រាប ការខូចខាតសរុប១ម៉ឺនដុល្លារ និងតូបទី៦-ម្ចាស់ឈ្មោះ ដាំ សុទ្ឋារស់ ភេទស្រី អាយុ៤៥ឆ្នាំ (លក់ចាប់ហួយនិងបន្លែ) នៅភូមិកំពង់តាយ៉ង ឃុំពួក ស្រុកពួក ខេត្តសៀមរាប ការខូចខាតសរុបអស់៣ម៉ឺនដុល្លារ ។
ករណីឆេះខាងលើនេះបណ្តាលឱ្យឆេះខូចខាតតូបទាំងស្រុងអស់ចំនួន៦តូបជាប់ៗគ្នា ត្រង់ចំណុចទិសខាងជើង-ជ្រុងខាងកើតនៃផ្សារ ។ ខណៈពេលកំពុងកើតហេតុ ប្រជាពលរដ្ឋ និងបុគ្គលិកគ្រប់គ្រងផ្សារពួក បានប្រើប្រាស់ភ្ជាប់ទុយយោទឹកស្អាត ជួយពន្លត់ និងរថយន្តពន្លត់អគ្គីភ័យរបស់ស្រុកពួក បានចេញអន្តរាគមន៍ជួយពន្លត់បានភ្លាមៗ ។ ក្នុងនោះដែរ ប្រើប្រាស់រថយន្តពន្លត់អគ្គីភ័យ សរុប៤គ្រឿង រួមមាន ១-រថយន្តរបស់អធិការដ្ឋាន ស្រុកពួកចំនួ1គ្រឿង ២-រថយន្តរបស់ស្នងការដ្ឋាន-ខេត្ត ចំនួន១ គ្រឿង ៣-រថយន្តកងរាជអាវុធហត្ថខេត្តចំនួន ១ គ្រឿង និង៤-រថយន្តរបស់អធិការដ្ឋាន ស្រុកក្រឡាញ់ ចំនួន១គ្រឿង ។ ប្រើប្រាស់ទឹកអស់៧រថយន្ត ហើយភ្លើងត្រូវបានរលត់អស់ទាំងស្រុងនៅម៉ោង២និង៣០នាទីថ្ងៃខែឆ្នាំដដែល។
លោកបានបញ្ជាក់ទៀតថា ក្នុងហេតុការណ៍អគ្គិភ័យឆេះផ្សារពួកទាំងយប់នោះដែរ លោកបានឱ្យកម្លាំងអធិការដ្ឋាននគរបាលស្រុកពួក និងកម្លាំងការិយាល័យអគ្គីភ័យស្នងការខេត្ត ចុះពិនិត្យស្រាវជ្រាវ និងវាយតម្លៃ សន្និដ្ឋាន បានថា មូលហេតុនៃការឆេះនោះ គឺបណ្ដាលមកពីទុស្សេខ្សែភ្លើងនៅចំណុចតូបសម្គាល់លេខ ២ ៕
ចែករំលែកព័តមាននេះ