រាជធានីភ្នំពេញ៖ លោក លាប ប៊ុនណ្ណារិទ្ធ ប្រធានគណ:កម្មការផ្សារជម្ពូវ័ន្ត បានប្រាប់អ្នកកាសែតកោះសន្តិភាពថា នៅថ្ងៃទី៦ ខែមករា ឆ្នាំ២០២៣ នេះ…
រាជធានីភ្នំពេញ៖ លោក លាប ប៊ុនណ្ណារិទ្ធ ប្រធានគណ:កម្មការផ្សារជម្ពូវ័ន្ត បានប្រាប់អ្នកកាសែតកោះសន្តិភាពថា នៅថ្ងៃទី៦ ខែមករា ឆ្នាំ២០២៣ នេះ បងប្អូនអាជីវករ មកបើកតូបលក់ដូរ មានចំនួនប្រហែល ៨០% និងអតិថិជនចេញចូលមកទិញទំនិញ មានប្រហែល ៧០%។ ក្នុងនោះ អាជីវករ និងអតិថិជន ឈប់ពាក់ម៉ាស់ ចំនួនប្រហែល ៧០% និងបន្តពាក់ម៉ាស់ចំនួនប្រហែល ៣០%។
លោកបន្តថា មកដល់ពេលនេះ គណ:កម្មការផ្សារ នៅតែបន្តណែនាំអោយបងប្អូនអាជីវករ និងអតិថិជន អោយអនុវត្តន៍វិធានការ ៣កុំ ៣ការពារ ជានិច្ច។ ចំពោះបញ្ហាទំនិញ ដែលជាតម្រូវការចាំបាច់ប្រចាំថ្ងៃ មិនមានការឡើងថ្លៃទេ។
លោក លាប ប៊ុនណ្ណារិទ្ធ បានឱ្យដឹងទៀតថា គណ:កម្មការផ្សារ តែងតែផ្សព្វផ្សាយដល់អាជីវករផ្សារ ត្រូវប្រុងប្រយ័ត្ន បិទប៉ារ៉ែតភ្លើង និងពន្លត់ភ្លើងទាន ធូប ជាមុនសិន មុនចាកចេញពីតូបត្រលប់ទៅផ្ទះវិញ។ ក្រុមការងារ គណៈកម្មការផ្សារធ្វើអនាម័យ និងចុះល្បាតជុំវិញផ្សារជាប្រចាំ ដើម្បីបង្កាទប់ស្កាត់បទល្មើស និងបរិស្ថានល្អ និងសម្រួលចរាចរណ៍ កុំអោយមានចត ឬឈប់មុខបរិវេណផ្សារ នាំអោយមានការកកស្ទះចរាចរណ៍។
លោកបន្តថា គណៈកម្មការផ្សារ ក៏នៅតែបន្តដាក់អាល់កុលលាងសម្អាតដៃ នៅមុខក្លោងទ្វារទីស្នាក់ការផ្សារ ទុកសម្រាប់បងប្អូនអាជីវករផ្សារ និងអតិថិជន លាងសម្អាតដៃ សម្លាប់មេរោគ និងបានចុះពិនិត្យ និងដើរល្បាតជុំវិញបរិវេណផ្សារ ដោយពុំអនុញ្ញាតឱ្យមានការកត់កន្ទុយលេខ និងលេងល្បែងស៊ីសងខុសច្បាប់ឡើយ៕
ចែករំលែកព័តមាននេះ