គ្រូបង្វឹកថៃថានឹងយកឈ្នះកម្ពុជា ខណៈគ្រូកម្ពុជាថានឹងធ្វើរឿងមួយចំនួនតទល់ម្ចាស់ផ្ទះនៅយប់នេះ
- ភ្នំពេញ
ទីក្រុងបាំងកក ៖ ក្នុងសន្និសីទសារព័ត៌មាននៅកីឡដ្ឋាន Thammasat មុនការប្រកួតចុងក្រោយក្នុង
ទីក្រុងបាំងកក ៖ ក្នុងសន្និសីទសារព័ត៌មាននៅកីឡដ្ឋាន Thammasat មុនការប្រកួតចុងក្រោយក្នុងពូល A ពានរង្វាន់ AFF Mitsubishi Electric Cup រវាងក្រុមជម្រើសជាតិថៃ និងកម្ពុជា ដែលត្រូវជួបគ្នានៅវេលាម៉ោង០៧៖៣០នាទីយប់នេះ គ្រូបង្វឹកក្រុមទាំង២ សុទ្ធសឹងតែមានជំនឿលើក្រុមខ្លួនដើម្បីទទួលបានលទ្ធផលវិជ្ជមានដូចៗគ្នា។
បុរសជនជាតិអាល្លឺម៉ង់-ប្រេស៊ីល លោក Mano Polking គ្រូបង្វឹកក្រុមជម្រើសជាតិថៃ បាននិយាយថា៖ «ការប្រកួតនេះនឹងក្លាយជាការប្រកួតចុងក្រោយនៃវគ្គចែកពូល។ ហើយយើងនឹងលេងនៅចំពោះមុខអ្នកគាំទ្របាល់ទាត់ថៃ ដូច្នេះសម្រាប់យើងគោលដៅគឺដើម្បីឈានទៅវគ្គពាក់កណ្តាលផ្តាច់ព្រ័ត្រ។ ហើយត្រូវតែរក្សាជ័យជំនះ យើងស្ថិតនៅក្នុងកន្លែងដ៏ល្អមួយ។ យើងបានលេងនៅផ្ទះ គ្រប់គ្នាបានត្រៀមខ្លួនជាស្រេចហើយមានទំនុកចិត្តថាពួកគេអាចឈ្នះ។ លោកបន្តថា«កម្ពុជាជាក្រុមដែលមានកីឡាករវ័យក្មេង។ ហើយលេងជាមួយគ្នាយូរ មានវិធីច្បាស់លាស់ក្នុងការលេងវាយលុក។ បង្កើតការលេងពីខាងក្រោយ សម្រាប់ពួកយើង យើងបានរៀបចំផែនការរួចរាល់សម្រាប់ទប់ទល់ហើយយើងមានទំនុកចិត្តថាយើងនឹងធ្វើបានល្អ និងឈ្នះការប្រកួត ឡើងទៅជុំបន្ទាប់»។
ចំណែកឯគ្រូបង្វឹក Ryu Hirose របស់ក្រុមជម្រើសជាតិកម្ពុជាក៏បានលើកឡើងថា៖ «ការប្រកួតនេះពិជាសំខាន់ខ្លាំងសម្រាប់ក្រុមទាំងពីរ។ យើងទៅលេងប្រទេសថៃដោយក្តីសង្ឃឹម ទោះបីជាការប្រកួតនេះក្រុមជម្រើសជាតិថៃនឹងលេងក្នុងផ្ទះក៏ដោយ។ ប៉ុន្តែយើងមិនអនុញ្ញាតឱ្យពួកគេលេងបានយើងដោយងាយទេ»។ បុរសជនជាតិជប៉ុនរូបនេះបន្តថា «បើនិយាយពីចំណាត់ថ្នាក់ និងបទពិសោធន៍ ថៃពិតជាល្អជាងយើង។ ប៉ុន្តែខ្ញុំមិនចង់ឲ្យប្រជាជនកម្ពុជាគិតថា ថៃនឹងមានការប្រកួតងាយស្រួលជាមួយយើងនោះទេ។ ប្រាកដណាស់ យើងនឹងរៀបចំរឿងមួយចំនួនដើម្បីតទល់នឹងពួកគេ»។
បច្ចុប្បន្នក្រុមជម្រើសជាតិថៃ កំពុងនាំមុខក្នុងពូល A ដោយមាន៧ពិន្ទុដូចគ្នាជាមួយឥណ្ឌូនេស៊ី ប៉ុន្តែមានគ្រាប់បាល់ខុសគ្នា ខណៈដែលកម្ពុជាតាមពីក្រោយមួយពិន្ទុប៉ុណ្ណោះ។ ប្រសិនបើកម្ពុជាចង់បង្កើតប្រវត្តិសាស្ត្រថ្មីក្នុងពានរង្វាន់បាល់ទាត់អាស៊ានមួយនេះ ក្រុមគោព្រៃចាំបាច់ត្រូវឈ្នះថៃជាដាច់ខាត់ដោយមិនខ្វល់លទ្ធផល ការប្រកួតរវាងម្ចាស់ផ្ទះហ្វីលីពីន ជាមួយឥណ្ឌូនេស៊ីឡើយ។
នេះជាលើកដំបូងហើយដែលក្រុមជម្រើសជាតិកម្ពុជា ជួបជាមួយក្រុមជម្រើសជាតិថៃ នៅពានរង្វាន់អាស៊ាន AFF Cup ខណៈដែលក្រុមទាំងពីរ ធ្លាប់ជួបគ្នា ៦លើកមកហើយ ដោយកម្ពុជាស្មើ១ និងចាញ់៥លើក រួមមាន៖ ជួបគ្នានៅឆ្នាំ១៩៥៧,៦៣ ក្នុងពានរង្វាន់ Merdeka Tournament ដោយកម្ពុជាចាញ់ ៣-០ និង១-០ និងជួបគ្នា៤លើកនៅស៊ីហ្គេម នៅឆ្នាំ១៩៧១ ស្មើគ្នា ១-១ ជួបគ្នានៅឆ្នាំ១៩៩៥ ថៃឈ្នះកម្ពុជា ៩-០ ជួបគ្នានៅឆ្នាំ១៩៩៧ ថៃឈ្នះកម្ពុជា ៣-០ និងជួបគ្នាចុងក្រោយនៅឆ្នាំ២០០១ ថៃបន្តឈ្នះ ៧-០៕ (ដោយ ៖ ភឿង ភារៈ)
ចែករំលែកព័តមាននេះ