ស្វីស ៖ ព្រឹត្តិការណ៍ FIFA World Cup 2022 ដែលប្រទេសកាតា ទទួលធ្វើជាម្ចាស់ផ្ទះ បានបញ្ចប់ជាស្ថាពរ និងជោគជ័យ បន្ទាប់ពីចំណាយពេល២៩ថ្ងៃ ពោលគឺចាប់ថ្ងៃទី២០ ខែវិច្ឆិកា រហូតដល់ថ្ងៃទី១៨ ខែធ្នូ កន្លងទៅ ដោយបន្សល់ទុករូបភាព និងការចងចាំដ៏អស្ចារ្យជាច្រើន សម្រាប់អ្នកគាំទ្រនៅទូទាំងពិភពលោក។
ជាលទ្ធផល ក្រុមមេឃខៀវអាហ្សង់ទីន បានយកឈ្នះលើក្រុមមាន់គកបារាំង ដែលជាក្រុមការពារតំណែងជើងឯក នៅវគ្គផ្តាច់ព្រ័ត្រ តាមរយៈការទាត់បាល់ប៉េណាល់ទីកាត់សេចក្តី នៅក្នុងលទ្ធផល ៤-២ បន្ទាប់ពីបញ្ចប់ការប្រកួត ១២០នាទី បានត្រឹមស្មើគ្នា ៣-៣ ដើម្បីក្លាយជាម្ចាស់ជើងឯកនៃព្រឹត្តិការណ៍ ដែលចាយលុយរៀបចំច្រើនជាងគេបំផុត នៅក្នុងប្រវត្តិសាស្ត្រ World Cup មួយនេះ ពោលគឺរហូតដល់ ២២០ពាន់លានដុល្លារអាមេរិក។
បើទោះបីជាព្រឹត្តិការណ៍ World Cup 2022 ត្រូវបានអ្នកគ្រប់គ្នា ចាត់ទុកថាជាការប្រកួតដ៏អស្ចារ្យក្នុងប្រវត្តិសាស្ត្រក៏ពិតមែន ប៉ុន្តែសហព័ន្ធបាល់ទាត់ពិភពលោក ហៅកាត់ថា FIFA បានអះអាងថា ព្រឹត្តិការណ៍ World Cup 2026 នឹងកាន់តែពិសេស និងអស្ចារ្យថែមទៀត ហើយមិនធ្លាប់មានពីមុនមកក្នុងប្រវត្តិសាស្ត្រ ដើម្បីបម្រើខ្សែចក្ខុអ្នកគាំទ្រ នៅជុំវិញពិភពលោក។
លោក Gianni Infantino ប្រធាន FIFA បានលើកឡើងថា ព្រឹត្តិការណ៍ World Cup 2026 គឺជាការប្រកួតដ៏ពិសេស និងអស្ចារ្យបំផុតក្នុងប្រវត្តិសាស្ត្រ ជាមួយនឹងការផ្លាស់ប្តូរទម្រង់ថ្មី ដោយមានរហូតដល់៤៨ក្រុម ធ្វើការប្រកួតប្រជែងគ្នា។
ព្រឹត្តិការណ៍ World Cup 2026 ក្លាយជាការប្រកួតដំបូងបំផុតក្នុងប្រវត្តិសាស្ត្រ ដែលមាន៣ប្រទេសធ្វើជាសហម្ចាស់ផ្ទះគឺ កាណាដា ម៉ិកស៊ិក និងសហរដ្ឋអាមេរិក ខណៈដែលរយៈពេល៩២ឆ្នាំកន្លងមកនេះ មានតែការប្រកួតនៅក្នុងឆ្នាំ ២០០២ ប៉ុណ្ណោះ ដែលប្រទេសជប៉ុន និងកូរ៉េខាងត្បូង ធ្វើជាម្ចាស់ផ្ទះរួមគ្នា។
ព្រឹត្តិការណ៍ World Cup 2026 នឹងត្រូវរៀបចំរួមគ្នាដោយទីក្រុងចំនួន១៦ នៅក្នុងប្រទេសនៃតំបន់ CONCACAF កាណាដា ម៉ិកស៊ិក និងសហរដ្ឋអាមេរិក ដោយនៅក្នុងនោះ សហរដ្ឋអាមេរិកនឹងធ្វើជាម្ចាស់ផ្ទះចំនួន ៦០ប្រកួត ហើយកាណាដា និងម៉ិកស៊ិក នឹងធ្វើជាម្ចាស់ផ្ទះចំនួន ១០ប្រកួតដូចគ្នា។
ការប្រកួតនៅឆ្នាំ ២០២៦ គឺជាការប្រកួតដំបូងបំផុតក្នុងប្រវត្តិសាស្ត្រ ដែលមានរហូតដល់៤៨ក្រុម ដែលខុសពីទម្រង់ចាស់ ដែលមានត្រឹម៣២ក្រុមតែប៉ុណ្ណោះ។ ដោយទាំង៤៨ក្រុម នឹងត្រូវបែងចែកជា១៦ពូល ក្នុង១ពូល មាន៣ក្រុម ហើយក្រុមចំណាត់ថ្នាក់លេខ១ និង២ នៃពូលនិមួយៗ និងបន្តឡើងទៅវគ្គ៣២ក្រុមចុងក្រោយ។
ដោយសារមានដល់៤៨ក្រុម ដូច្នេះការប្រកួតនឹងត្រូវមានរហូតដល់៨០ប្រកួត ខុសពីព្រឹត្តិការណ៍មុនៗ ដែលមានត្រឹមតែ ៦៤ប្រកួតតែប៉ុណ្ណោះ។ ការជ្រើសរើសយកប្រទេស កាណាដា ម៉ិកស៊ិក និងសហរដ្ឋអាមេរិកធ្វើជាម្ចាស់ផ្ទះរួមគ្នា ត្រូវបានមើលឃើញថាជារឿងដ៏ត្រឹមត្រូវបំផុត ជាមួយនឹងបទពិសោធន៍ និងជាពិសេសដើម្បីកាត់បន្ថយការធ្វើដំណើរ ជាមួយនឹងការបន្ថែមចំនួននៃការប្រកួត។
ខាងក្រោមនេះ គឺជាទីក្រុងទាំង១៦ ដែលត្រូវបានជ្រើសរើសធ្វើជាម្ចាស់ផ្ទះការប្រកួត World Cup 2026 ដែលនឹងចាប់ផ្តើមដំណើរការប្រកួតពីថ្ងៃទី០៨ ខែមិថុនា រហូតដល់ថ្ងៃទី៣ ខែកក្កដា រួមមាន ៖
សហរដ្ឋអាមេរិក ៖ ទីក្រុង Atlanta (កីឡដ្ឋាន Mercedes-Benz), Boston (កីឡដ្ឋាន Gillette), Dallas (កីឡដ្ឋាន AT&T), Houston (កីឡដ្ឋាន NRG), Kansas City (កីឡដ្ឋាន Arrowhead), Los Angeles (កីឡដ្ឋាន SoFi), Miami (កីឡដ្ឋាន Hard Rock), New York/New Jersey (កីឡដ្ឋាន MetLife), Philadelphia (កីឡដ្ឋាន Lincoln Financial Field), San Francisco Bay Area (កីឡដ្ឋាន Levi’s) និង Seattle (កីឡដ្ឋាន Lumen Field)
ប្រទេសម៉ិកស៊ិក ៖ ទីក្រុង Guadalajara (កីឡដ្ឋាន Akron), Mexico City (កីឡដ្ឋាន Azteca) និង Monterrey (កីឡដ្ឋាន BBVA)
ប្រទេសកាណាដា ៖ ទីក្រុង Toronto (កីឡដ្ឋាន BMO Field) និង Vancouver (កីឡដ្ឋាន BC Place) ៕ (ដកស្រង់ចេញពី FIFA និង NBC Sports)
ចែករំលែកព័តមាននេះ