ក្រសួងអប់រំ៖ លទ្ធផលបាក់ឌុបជាចំណុចចាប់ផ្តើមថ្មីមួយសម្រាប់អ្នកសិក្សាគ្រប់រូប និងមិនមែនជាការបញ្ចប់នៃការសិក្សាទេ
- ភ្នំពេញ
រាជធានីភ្នំពេញ៖ អ្នកនាំពាក្យក្រសួងអប់រំយុវជន និងកីឡាបានបញ្ជាក់ថាលទ្ធផល នៃ ការប្រឡង
រាជធានីភ្នំពេញ៖ អ្នកនាំពាក្យក្រសួងអប់រំយុវជន និងកីឡាបានបញ្ជាក់ថាលទ្ធផល នៃ ការប្រឡងសញ្ញាបត្រមធ្យមសិក្សាទុតិយភូមិ(បាក់ឌុប)ជាចំណុចចាប់ផ្តើមមួយសម្រាប់អ្នកសិក្សាគ្រប់រូប និងមិនមែនជាការបញ្ចប់នៃការសិក្សានោះទេ។
លោក រស់ សុវាចាអ្នកនាំពាក្យក្រសួងអប់រំ យុវជន និងកីឡាបានបញ្ជាក់ប្រាប់កោះ ស្តិភាពនៅថ្ងៃទី២៣ធ្នូយ៉ាងដូច្នេះថា៖« លទ្ធផលបាក់ឌុប ជាចំណុចចាប់ផ្ដើមថ្មីមួយ សម្រាប់អ្នកសិក្សាគ្រប់រូបហើយ លទ្ធផលបាក់ឌុប មិនគួរជាទីបញ្ចប់នៃការសិក្សាទេ។ ការសិក្សាជាដំណើរប្រព្រឹត្តទៅពេញមួយជីវិត។ អ្នកសិក្សាគ្រប់រូប ត្រូវបន្តមានក្តីសង្ឃឹមដើម្បីសម្រេចគោលបំណងជីវិត។ ខ្ញុំយល់ច្បាស់ពីមនោសញ្ចេតនារបស់មាតាបិតាដែលមានសម្រាប់កូនៗ»។
អ្នកនាំពាក្យបានបញ្ជាក់ទៀតថា៖«ខ្ញុំសូមលើកទឹកចិត្តដល់សិស្សានុសិស្សឲ្យយល់ថានៅក្នុងជីវិតរបស់យើងតែងជួបជោគជ័យ និងបទពិសោធន៍ផ្សេងៗ។ យើងត្រូវយក បទពិសោធ ន៍ទាំងឡាយ ជាមេរៀន ជីវិតដើម្បីកសាងអនាគត។ យើងមិនអាចកែប្រែ អតីតកាលបានទេ។ អ្វីដែលសំខាន់គឺយើងត្រូវប្រឹងប្រែងឲ្យអស់ពីលទ្ធភាពហើយហ៊ានទទួលយកលទ្ធផលក្រោយការព្យាយាមអស់ពីចិត្តដើម្បីរៀបចំអនាគតឱ្យរឹតតែប្រសើរ។ ធ្វើដូចនេះទើបយើងគ្មានវិប្បដិ សារី»។
អ្នកនាំពាក្យក៏បានលើកឡើងថាការសម្រេចចិត្តរបស់មនុស្សយើងត្រូវឈរលើគោលបំណងជីវិតបុគ្គល។ យើងត្រូវដឹងថាយើងចង់បានអ្វីនៅក្នុងជីវិតរបស់យើង។ ការរៀនជំនាញ មិនគួរជាជម្រើសទីពីរ របស់មនុស្សទេ។ មានន័យថា មនុស្សគ្រប់រូបអាចជ្រើស រើសរៀនជំនាញទោះជាប្រឡងបាក់ឌុបជាប់ ឬធ្លាក់ក៏ដោយ។ ប្រសិនបើបុគ្គលម្នាក់ស្រឡាញ់ ជំនាញណាមួយគាត់អាចជ្រើសរើសរៀនជំនាញនោះបានក្រោយប្រឡងបាក់ឌុបជាប់។ អ្នកជាប់បាក់ឌុបក៏អាចជ្រើសរើសរៀនបន្តនៅកម្រិតឧត្ដមសិក្សាទៅតាមគោលបំណងជីវិត និងឧបនិស្ស័យរៀងៗខ្លួន។
ជាមួយគ្នានោះដែរអ្នកនាំពាក្យក្រសួងអប់រំក៏បានលើកឡើងថាសម្រាប់ប្អូនៗដែលប្រឡងបាក់ឌុបធ្លាក់គួររៀនថ្នាក់ទី១២ម្តងទៀត រឺគួររៀនជំនាញ គឺអាស្រ័យលើគោលបំណងនិ ងឧបនិស្ស័យរៀងៗខ្លួន។
លោកថាសង្កត់ធ្ងន់ថា៖«ជារួម ខ្ញុំសូមផ្ដាំទៅប្អូនៗថា យើងត្រូវដឹងពីត ម្រូវការនិ ងអាទិភាពជីវិតរបស់យើងឲ្យច្បាស់។ យើងត្រូវដឹងថាយើងចង់បានអ្វីនៅក្នុងជីវិត។
ម្យ៉ាងវិញទៀត គុណភាពអប់រំជាផលិតផលនៃកត្តាធម្មជាតិ និងកត្តាសង្គម។ កត្តាធម្មជា តិសំដៅដល់កំណើតកើតជារបស់បុគ្គល។ កតា្តសង្គមសំដៅដល់សង្គមសាលារៀន សង្គមគ្រួសារ សង្គមមិត្តភក្តិជាដើម។ ដូចនេះ គុណភាពអប់រំអាស្រ័យ លើការចូលរួម ពីអ្នកសិក្សាផ្ទាល់ និងគ្រប់ភាគីពាក់ព័ន្ធ»។
អ្នកនាំពាក្យក៏បានលើកឡើងថា ក្រសួងអប់រំ យុវជន និងកីឡា ជាសេនាធិការរបស់ រាជរដ្ឋាភិបាលក្នុងការលើកកម្ពស់គុណភាពអប់រំតាមរយ:គ្រប់រូបភាព អមដោយកិច្ចសហ ការវិជ្ជមានជាមួយក្រសួង ស្ថាប័ន ដៃគូរអភិវឌ្ឍន៍ វិស័យឯកជន និងគ្រប់តួអង្គពាក់ព័ន្ធ។ ដោយឡែក សង្គមគ្រួសារមានតួនាទីសំខាន់មួយក្នុងការជួយពង្រឹងការរៀនសូត្រ មុននិងក្នុងបរិការណ៍កូវីដ-១៩។
ការជ្រើសរើសមុខវិជ្ជាសម្រាប់រៀនសូត្រនៅកម្រិតឧត្តមសិក្សា និងជំនាញ គឺជាជម្រើសបុគ្គលនិងគ្រួសារដោយផ្សារភ្ជាប់រវាងចំណង់ចំណូលចិត្តនិងឧបនិស្ស័យផ្ទាល់ខ្លួននិងទីផ្សារការងារ។ និយាយជារួម កត្តារៀនសូត្របន្ត អាស្រ័យលើការពិចា រណារប ស់សាម៉ីខ្លួនដោយឈរលើមូលដ្ឋានចំនួន៤៖
១-ការយល់ដឹងច្បាស់ពីមុខជំនាញ
២-ឧបនិស្ស័យបុគ្គល
៣-ការពិនិត្យមើលលទ្ធភាពផ្ទាល់ខ្លួន និង
៤-តម្រូវការទីផ្សារការងារ។
អ្នកនាំពាក្យក្រសួងអប់រំក៏បានឲ្យដឹងថានាយកដ្ឋានជំនាញរបស់ក្រសួងអប់រំ យុវជន និងកីឡាចំនួនបី (នាយកដ្ឋានឧត្តមសិក្សា, នាយកដ្ឋានតម្រង់ទិសវិជ្ជាជីវៈ និងនាយកដ្ឋានយុ វជន ដោយមានការរួមចំណែកពីក្រុមប្រឹក្សាយុវជនកម្ពុជា) បានចុះយុទ្ធនាការក្នុងការពន្យល់ តម្រង់ទិសមុខជំនាញដល់សិស្សថ្នាក់ទី១២ នៅទូទាំងប្រទេស ដើម្បីបង្កើនការយល់ដឹងក្នុងការចាប់យកមុខជំនាញ អភិវឌ្ឍសង្គមសេដ្ឋកិច្ច។
សូមជម្រាបថាកាលពីថ្ងៃទី២២ធ្នូក្រសួងអប់រំ យុវជន និងកីឡា នៅរសៀលថ្ងៃទី២២ ខែធ្នូ ឆ្នាំ២០២២នេះ បានចេញសេចក្តីប្រកាសព័ត៌មាន ស្តីពីលទ្ធផល នៃការប្រឡងសញ្ញាបត្រ មធ្យមសិ ក្សាទុតិយភូមិ (បាក់ឌុប) សម័យប្រឡង៖ ៥ ធ្នូ ២០២២ ដោយសិស្សសិស្សជាប់៩០៩៥០នាក់ស្មើ នឹង៧២.៣៣% និទ្ទេស A ចំនួន១០៤៩នាក់, និទ្ទេស B ចំនួន៧២៣២នាក់, និទ្ទេស C ចំនួន១៩០៥៣នាក់, និទ្ទេស D ចំនួន៣១១៦៦នាក់ និងនិទ្ទេស E ចំនួន៣២៤៥០នាក់។
ដំណើរការសំណេរនៃការប្រឡងសញ្ញាបត្រមធ្យមសិក្សាទុតិយភូមិ បានប្រព្រឹត្តទៅរយៈពេល២ថ្ងៃ គឺថ្ងៃទី៥ និងទី៦ ខែធ្នូ ឆ្នាំ២០២២ មានបេក្ខជនចុះឈ្មោះប្រឡងសរុបចំនួន ១២៨ ១៣៥នាក់ ស្រី៦៨ ៧៧១នាក់, មណ្ឌលប្រឡង២២១ និងត្រូវជា ៥១៧៤បន្ទប់ ៕
ចែករំលែកព័តមាននេះ