ខេត្តសៀមរាប ៖ តាមការបញ្ជាក់របស់លោក លី វណ្ណៈ នាយករដ្ឋបាលខេត្តសៀមរាប បានឱ្យដឹងនៅចុងសប្តាហ៍នេះថា ដើម្បីអបអរសាទរពិធីបុណ្យឆ្លងឆ្នាំ និងចូលឆ្នាំសកលឆ្នាំ២០២៣ខាងមុខនេះ រដ្ឋបាលខេត្តសៀមរាប…
ខេត្តសៀមរាប ៖ តាមការបញ្ជាក់របស់លោក លី វណ្ណៈ នាយករដ្ឋបាលខេត្តសៀមរាប បានឱ្យដឹងនៅចុងសប្តាហ៍នេះថា ដើម្បីអបអរសាទរពិធីបុណ្យឆ្លងឆ្នាំ និងចូលឆ្នាំសកលឆ្នាំ២០២៣ខាងមុខនេះ រដ្ឋបាលខេត្តសៀមរាប បានសហការជាមួយសហភាពសហព័ន្ធយុវជនកម្ពុជាខេត្តសៀមរាប និងមន្ទីរអង្គរភាពពាក់ព័ន្ធនានា បានរៀបចំកម្មវិធីកម្សាន្តសប្បាយជាច្រើន សម្រាប់ទទួលស្វាគមន៍ភ្ញៀវទេសចរមកកម្សាន្តសប្បាយនៅខេត្ត សៀមរាប ដូចជាកម្មវិធីជិះទូកកម្សាន្តតាមដងស្ទឹងប្រវត្តិសាស្ត្រសៀមរាប ការតាំងពិព័រណ៍ កម្មវិធីផ្សារទឹក កម្មវិធីប្រគំតន្ត្រីនៅសួនព្រះរាជដំណាក់ និងនៅតំបន់ផាប់ស្ត្រីត តន្ត្រីស្គរដៃ មានរៀបចំភ្លើងលម្អតាមដងស្ទឹង និងតាមស្ពាន ចាប់ ពីស្ពានមន្ទីរទេសចរណ៍ចាស់ ដល់ស្ពានថ្មវត្តដំណាក់ និង មានរៀបចំអនាម័យ សណ្តាប់ធ្នាប់ចរាចរណ៍ ។
ក្នុងកម្មវិធីទាំងនេះ នឹងចាប់ផ្តើមលេងកម្សាន្តពីថ្ងៃទី២៥ ខែធ្នូ ឆ្នាំ២០២២ ដល់ថ្ងៃទី១ ខែមករាឆ្នាំ២០២៣ ។ លោក លី វណ្ណៈ បានបន្តទៀតថា ការរៀបចំរហូតមកដល់ថ្ងៃនេះសម្រេចបាន ៣០ ទៅ៤០%ហើយ ហើយទាំងនេះក៏ដោយសារស្ថានភាពេជម្ងឺកូវិដ១៩ មានភាពធូរស្រាល ក្រោយពេលប្រមុខរាជរដ្ឋាភិបាលកម្ពុជា បានធ្វើការ ចាក់ស្រោចវ៉ាក់សាំងជូនប្រជាពលរដ្ឋ ដោយឥតគិតថ្លៃ និងមិនប្រកាន់និន្នាការនយោបាយពូជសាសន៍អ្វីនោះឡើយ ព្រម ទាំងការបើកប្រទេសឡើងវិញផងដែរ។ លោកក៏បានរំពឹងថា នៅក្នុងឱកាសឆ្លងឆ្នាំសកល២០២២ចូល២០២៣នេះ ខេត្ត សៀមរាប នឹងទទួលបានភ្ញៀវទេសចរជា ច្រើន ជាពិសេសភ្ញៀវទេសចរក្នុងស្រុក។
ឱកាសនោះដែរលោក ហ្វី លិបកៅ ប្រធានសមាគមក្លឹបទេសចរណ៍សៀមរាប បានឲ្យដឹងដែរថា ឆ្នាំនេះយើងឃើញថា រដ្ឋបាល ខេត្តសៀមរាប បានតុបតែងលម្អក្រុងបានល្អណាស់ សម្រាប់ទាក់ទាញភ្ញៀវទេសចរ ឲ្យចូលមកកម្សាន្តនៅក្នុងខេត្តសៀមរាបនេះ ។ ប៉ុន្តែសម្រាប់ការសង្គេតឃើញរបស់លោកសន្ទុះនៃការកក់បន្ទប់ស្នាក់នៅហាក់នៅមិនទាន់មានច្រើននៅឡើយទេ ។ ម្យ៉ាងទៀត បន្ទាប់ពីស្ថាន ភាពកូវិដមានការធូរស្រាល យើងទើបតែទទួលបានភ្ញៀវទេសចរមកកម្សាន្តនៅខេត្តសៀមរាបនេះវិញបានប្រមាណជា៣០%ប៉ុណ្ណោះ ។ ប៉ុន្តែទោះជាយ៉ាងនេះក្តីលោកគិតថា ភ្ញៀវទេសចរក្នុងស្រុកភាគ ច្រើន ពួកគាត់មិនសូវចូលចិត្តកក់បន្ទប់ស្នាក់នៅមុនទេ ពួកគាត់មកដល់ទើបជួលបន្ទប់ស្នាក់នៅតែម្តង ។ ដូច្នេះ យើងក៏រងចាំមើលសន្ទុះភ្ញៀវទេសចរនៅថ្ងៃឆ្លងឆ្នាំសកលតែម្តង ៕
ចែករំលែកព័តមាននេះ