រាជធានីភ្នំពេញ ៖ ករណីអគ្គិភ័យឆេះយ៉ាងសន្ធោសន្ធៅនៅវេលាថ្ងៃត្រង់ថ្ងៃទី២០ មិថុនា ហើយត្រូវសង្ស័យបង្កឡើងដោយជនរងគ្រោះជាប្តីប្រពន្ធនេះឈ្លោះគ្នា ត្រូវបានសមត្ថកិច្ចឱ្យដឹងបន្តថា ស្ត្រីជាប្រពន្ធឈ្មោះអានាថ អាយុ៣១ឆ្នាំ មុខរបរនៅផ្ទះ និងប្តីឈ្មោះឡូរ៉ែន អាយុ៥១ឆ្នាំ ជាជនជាតិចិន បម្រើការនៅក្នុងក្រុមហ៊ុន ពួកគេបានជួលបន្ទប់ខាងលើស្នាក់នៅ ដែលមានផ្ទះលេខ៣៧ ផ្លូវលេខ៣០០ ក្នុងសង្កាត់បឹងកេងកងទី២ ខណ្ឌចំការមន រាជធានីភ្នំពេញ ។
ស្ត្រីប្រពន្ធខ្មែររូបនេះ មិនដឹងជាមានទំនាស់អ្វីជាមួយប្តីទេ ដោយទៅទិញសាំងជាច្រើនដប មុនពេលមានហេតុការណ៍ភ្លើងឆេះនេះ ។ប្រជាពលរដ្ឋជាច្រើននាក់ បានឃើញស្ត្រីរូបនេះជិះម៉ូតូរ៉ឺម៉កកង់បីមួយគ្រឿង ចុះនៅខាងមុខផ្ទះប្តូរលុយមួយកន្លែង ស្ថិតត្រង់ផ្លូវលេខ ១៤៣ កែងនិងផ្លូវលេខ៣០០ (ក្បែរផ្ទះរបស់ខ្លួន) ។ បន្ទាប់ឃើញឡើងទៅលើបន្ទប់ផ្ទះជួលរបស់ខ្លួនបាត់ ព្រមទាំងយួរថង់ ដែលមានដបសាំងឡើងទៅលើបន្ទប់ជួលជាមួយផង ។
ក្រោយមក ស្រាប់តែឮសំឡេងស្រែក និងផ្ទុះហ្គាសកើតឡើង ទើបបង្កភ្ញាក់ផ្អើលពលរដ្ឋនៅក្បែរខាង និងខាងក្រោមរត់ឡើងទៅមើល ក៏ស្រាប់តែបានឃើញអណ្តាតភ្លើងឆាបឆេះយ៉ាងសន្ធោសន្ធៅចេញពីក្នុងបន្ទប់ជួលនោះ ដោយទ្វារដដាក់គន្លឹះជាប់ ខណៈពួកគេនៅខាងក្នុង ។ ភ្លាមៗនោះ មានបងប្អូនពលរដ្ឋជាច្រើននាក់ រួមទាំងកម្លាំងអាជ្ញាធរមូលដ្ឋានផងដែរ ក៏បាននាំគ្នាវាយបំបែកកញ្ចក់ទ្វារ បង្អួច ដើម្បីយកបំពង់ពន្លត់អគ្គិភ័យ និងទឹកទៅធ្វើការបាញ់ពន្លត់ និងជួយសង្គ្រោះទាំងពីរនាក់ប្តី ប្រពន្ធចេញពីក្នុងអណ្តាតភ្លើងចេញមកក្រៅ ដែលត្រូវភ្លើងឆេះរលាកពេញខ្លួនទៅហើយនោះ ។
អណ្តាតភ្លើងបានធ្វើការឆាបឆេះយ៉ាងខ្លាំង មិនអាចនាំគ្នាពន្លត់បាន កម្លាំងមានសម្ថកិច្ចមូលដ្ឋាន ក៏បានហៅរថយន្តពន្លត់អគ្គិភ័យរបស់ស្នងការនគរបាលរាជធានីភ្នំពេញ ដែលមានទីតាំងនៅក្បែរនោះចំនួន៤គ្រឿងចុះធ្វើអន្តរាគមន៍បាញ់ពន្លត់បាញ់ពន្លត់បានទាន់ពេលវេលា ។
ចែករំលែកព័តមាននេះ