មិនដឹងជិះម៉ូតូប្រញាប់ទៅណា ទៅបុកគូថរថយន្តដួលបែកក្បាលសន្លប់ឈឹង
រាជធានីភ្នំពេញ ៖ បុរសជាសន្តិសុខធនាគារកាណាឌីយ៉ាម្នាក់បានរងរបួសយ៉ាងធ្ងន់ធ្ងរ ដោយបែកក្បាលហូរឈាម និងសន្លប់បាត់ស្មារតី ខណៈដែលជិះម៉ូតូម៉ាកហុងដា
រាជធានីភ្នំពេញ ៖ បុរសជាសន្តិសុខធនាគារកាណាឌីយ៉ាម្នាក់បានរងរបួសយ៉ាងធ្ងន់ធ្ងរ ដោយបែកក្បាលហូរឈាម និងសន្លប់បាត់ស្មារតី ខណៈដែលជិះម៉ូតូម៉ាកហុងដា សេ១២៥មួយគ្រឿងក្នុងល្បឿនលឿន មិនដឹងជាប្រញាប់ទៅណា និងខ្វះការប្រុងប្រយ័ត្នក៏ជ្រុលទៅបុកគូថរថយន្តម៉ាករ៉េវហ្វ័រមួយគ្រឿង។ ករណីគ្រោះថ្នាក់ចរាចរណ៍នេះ បានកើតឡើងកាលពីវេលាម៉ោង ៦ និង១៥នាទីល្ងាច ថ្ងៃទី១៨ ខែមិថុនា ឆ្នាំ ២០១៧ នៅលើបណ្ដោយផ្លូវវេងស្រេង ភូមិជ្រៃកោង ក្នុងសង្កាត់ចោមចៅ ខណ្ឌពោធិសែនជ័យ។
តាមប្រភពព័ត៌មានពីបុរសម្នាក់បានប្រាប់ឱ្យដឹងថា មុនពេលកើតហេតុមានរថយន្តម៉ាករ៉េវហ្វ័រ ពណ៌ស មិនចាំស្លាកលេខមួយគ្រឿង បើកបរក្នុងទិសដៅ ពីលិចទៅកើត ក្នុងល្បឿនមធ្យម លុះមកដល់ចំណុចកើតហេតុ រថយន្តមួយគ្រឿងនោះបង្អង់ល្បឿនជាមួយនឹងរថយន្តខាងមុខក៏បានជាន់ហ្វ្រាំងបង្អង់ល្បឿនដូចគ្នា។ ពេលនោះ ក៏ស្រាប់តែមានម៉ូតូម៉ាកហុងដា សេ១២៥ ពណ៌ខ្មៅ ពាក់ស្លាកលេខបាត់ដំបង១C-៨០៤៦ មួយគ្រឿង បើកបរដោយបុរសម្នាក់ក្នុងល្បឿនយ៉ាងលឿនមកបុកពីក្រោយពេញទំហឹង បណ្តាលឲ្យដួលបោកក្បាលទៅនឹងថ្នល់បែកក្បាលហូរឈាមសន្លប់បាត់ស្មារតីរងរបួសយ៉ាងធ្ងន់ធ្ងរតែម្តង។ តាមប្រភពដដែលបានប្រាប់បន្តទៀតថា រថយន្តម៉ាករ៉េវហ្វ័រមួយគ្រឿងនោះបែកកញ្ចក់ខាងក្រោយ និងបន្តដំណើររត់គេចខ្លួនបាត់ស្រមោលទៅ ដោយបន្សល់ទុកតែជនរងគ្រោះ និងម៉ូតូរបស់ខ្លួននៅនឹងកន្លែងកើតហេតុប៉ុណ្ណោះ។
តាមប្រភពពីស្ត្រីជាសាច់ញាតិម្នាក់បានប្រាប់ឱ្យដឹងថា បុរសរងគ្រោះមានឈ្មោះ រ៉េត រដ្ឋា អាយុ២៦ឆ្នាំ មុខរបរសន្តិសុខធនគារកាណាឌីយ៉ា ស្នាក់នៅផ្ទះជួលក្បែរកន្លែងកើតហេត និងមានស្រុកកំណើតនៅខេត្តបាត់ដំបង ដោយមិនមានអ្នកណាម្នាក់បានដឹងថា គាត់ជិះម៉ូតូមកពីណាឡើយ បានជាជួបគ្រោះថ្នាក់បែបនេះ។ ក្រោយពេលកើតហេតុ បុរសជាសន្តិសុខរងគ្រោះខាងលើ ត្រូវបានរថយន្តសាមុយរបស់អង្គភាព ៧១១ មកដឹកយកទៅសង្គ្រោះ ចំណែកឯម៉ូតូត្រូវបានប្រគល់ឲ្យក្រុមគ្រួសារយកទៅរក្សាទុក៕
ចែករំលែកព័តមាននេះ