សត្វផ្សោត១ក្បាលទម្ងន់ជាង១៦០គីឡូ ប្រទះឃើញស្លា.ប់អណ្តែតទើរជាប់ព្រំប្រទល់ខេត្ត២
- ក្រចេះ
ខេត្តក្រចេះ ៖ សត្វផ្សោតទម្ងន់១៦២គីឡូក្រាម ត្រូវបានប្រជានេសាទប្រទះឃើញ អណ្តែតទឹកទើរនៅ
ខេត្តក្រចេះ ៖ សត្វផ្សោតទម្ងន់១៦២គីឡូក្រាម ត្រូវបានប្រជានេសាទប្រទះឃើញ អណ្តែតទឹកទើរនៅឆ្នេរខ្សាច់មាត់ច្រាំងទន្លេ ជាប់ព្រំប្រទល់ខេត្តក្រចេះនិងខេត្តស្ទឹងត្រែង កាលពីថ្ងៃទី២០ធ្នូ២០២២
។
យោងតាមមន្ត្រីរដ្ឋបាលជលផល និងអង្គការ WWF ប្រចាំនៅខេត្តក្រចេះឲ្យដឹងថាសត្វផ្សោតដែលស្លាប់នោះជាផ្សោតឈ្មោល ហើយមានអាយុចន្លោះពី១៥-២០ឆ្នាំមានប្រវែងពីចុងកន្ទុយដល់ក្បាល ២៣០ សង់ទីម៉ែត្រ និងមានទម្ងន់១៦២គីឡូក្រាម ត្រូវបានប្រជានេសាទប្រទះឃើញអណ្តែតនៅទន្លេមេគង្គលើទៅទើរជាប់ជិតឆ្នេរខ្សាច់មាត់ច្រាំងទន្លេ ក្បែរអន្លង់កោះដំបង ព្រំប្រទល់ខេត្តក្រចេះ និងខេត្តស្ទឹងត្រែង ។
មន្ត្រីអង្គការ WWF បានសំដែងការសោកស្ដាយ ចំពោះការបាត់បង់សត្វផ្សោតទឹកសាបនេះ ដែលធ្វើឱ្យបាត់បង់សត្វផ្សោត ដែលជាប្រភេទសត្វកម្រ ពីទន្លេមេគង្គមួយបន្ថែមទៀត ។
មន្ត្រីជលផលខេត្ត បានបញ្ជាក់ថា តាមការពិនិត្យសាកស.ពសត្វផ្សោតយ៉ាងម៉ត់ចត់ ក្រុមជំនាញស្រាវជ្រាវរបស់រដ្ឋបាលជលផលនិអង្គការ WWF បានធ្វើការសន្និដ្ឋានជាបឋមថា សត្វផ្សោតខាងលើស្លា.ប់ដោយសារការជាប់មងអ្នក នេសាទ ព្រោះមានស្លាកស្នាមនៃសរសៃមងនៅលើកន្ទុយ ដងខ្លួន និងស្នាមរលាត់នៅលើផ្នែក ក គឺអាចស្លាប់រយៈពេល ៣ថ្ងៃមកហើយ។មន្ត្រីដដែលបញ្ជាក់ទៀតថា សត្វផ្សោតដែលស្លា.ប់នៅក្នុងឆ្នាំ២០២២ នេះ សរុបចំនួន៩ក្បាល ហើយរយៈពេល៣ឆ្នាំ ចុងក្រោយនេះ សត្វផ្សោតដែលបានស្លា.ប់មានសរុប ចំនួន ២៧ ក្បាល ចន្លោះពីឆ្នាំ ២០២០ដល់ចុងឆ្នាំ ២០២២ ។
នាយកអង្គការ WWF កម្ពុជា លោក សេង ទៀក អោយអ្នកសារព័ត៌មានដឹងថា ការបាត់បង់សត្វផ្សោតទឹកសាបនីមួយៗ យើងសោកស្ដាយបំផុត គឺនៅពេលសត្វផ្សោតពេញវ័យ ដែលមានសុខភាពល្អ ដូចសត្វផ្សោតមួយក្បាលនាពេលនេះ តែត្រូវបានបាត់បង់ជីវិតទៅវិញ ដែលកត្តានេះបានធ្វើឱ្យប៉ះពាល់លទ្ធភាព នៃការបន្តពូជរបស់សត្វផ្សោតទន្លេមេគង្គ នៅសេសសល់ដ៏តិចតួចនេះ។
គួរបញ្ជាក់ថា សត្វផ្សោតទន្លេមេគង្គ ត្រូវបានចុះក្នុងបញ្ជីក្រហមរបស់អង្គការ IUCN ជាប្រភេទសត្វកំពុងរងគ្រោះថ្នាក់ជិតផុតពូជ ហើយបើតាមការស្រាវជ្រាវរបស់មន្ត្រីជំនាញអង្គការ WWF បានប៉ាន់ស្មានថា សត្វផ្សោតនៅទន្លេមេគង្គលើ មានត្រឹម ៨៩ ក្បាលប៉ុណ្ណោះ នៅទន្លេមេគង្គនៃប្រទេសកម្ពុជា៕
ចែករំលែកព័តមាននេះ