ដេញចាប់បុរសម្នាក់ផ្អើលផ្សារ៧មករា ក្រោយលបចូលការដ្ឋានសំណង់
- ភ្នំពេញ
ជនសង្ស័យម្នាក់ត្រូវបានប្រជាពលរដ្ឋចាប់ខ្លួនប្រគល់ឲ្យទៅសមត្ថកិច្ច បន្ទាប់ពីធ្វើសកម្មភាពចូលទៅលួចប៉ុសផ្សាដែក នៅក្នុងការដ្ឋាន
ជនសង្ស័យម្នាក់ត្រូវបានប្រជាពលរដ្ឋចាប់ខ្លួនប្រគល់ឲ្យទៅសមត្ថកិច្ច បន្ទាប់ពីធ្វើសកម្មភាពចូលទៅលួចប៉ុសផ្សាដែក នៅក្នុងការដ្ឋាន
រាជធានីភ្នំពេញ ៖ បើតាមសេចក្តីរាយការណ៍បានឱ្យដឹងថា ជនសង្ស័យម្នាក់ត្រូវបានប្រជាពលរដ្ឋចាប់ខ្លួនប្រគល់ឲ្យទៅសមត្ថកិច្ច បន្ទាប់ពីធ្វើសកម្មភាពចូលទៅលួចប៉ុសផ្សាដែក នៅក្នុងការដ្ឋានសំណង់មិនបានសម្រេច បង្កឱ្យមានការភ្ញាក់ផ្អើលកាលពីវេលាម៉ោង១០និង៤០នាទីយប់ ថ្ងៃទី២០ ខែធ្នូ ឆ្នាំ២០២២ នៅត្រង់ចំណុចការដ្ឋានសំណង់ ទល់មុខទីស្ដីការក្រសួងសុខាភិបាល តាមបណ្ដោយផ្លូវ២៨៩ ស្ថិតក្នុងសង្កាត់បឹងកក់ទី២ ខណ្ឌទួលគោក។
សេចក្តីរាយការណ៍បន្តថា ជនសង្ស័យដែលត្រូវឃាត់ខ្លួនបានខាងលើនេះ មានឈ្មោះ ជូ ភេទប្រុស អាយុ១៩ឆ្នាំ មុខរបរ និងស្នាក់នៅមិនពិតប្រាកដ។
បើតាមប្រភពព័ត៌មានពីមេជាងដែលស្នាក់នៅកន្លែងកើតហេតុ បានឲ្យដឹងថា នៅការដ្ឋានសំណង់កើតហេតុ គឺមានកម្មករប្រុសស្រីប្រមាណ៣០នាក់ធ្វើការ និងស្នាក់នៅខាងក្នុង ហើយកន្លងមក ការដ្ឋានដែលគាត់ធ្វើការក៏ធ្លាប់មានជនសង្ស័យចូលទៅលួចសម្ភារៈប៉ុន្មានដងមកហើយ។
មេជាងខាងលើបន្តថា ហើយនៅយប់កើតហេតុនេះ ខណៈពេលដែលបញ្ចប់ពីការងារ កម្មករទាំងអស់ក៏បានសំរាកតាមកន្លែងរៀងៗខ្លួនដូចសព្វដង លុះដល់វេលាកើតហេតុ ក៏ស្រាប់តែលេចមុខជនសង្ស័យបានដើរចូលមកក្នុងការដ្ឋាន រួចក៏បានធ្វើសកម្មភាពលួចប៉ុសផ្សាដែក បន្ទាប់មកបំរុងរត់គេចខ្លួន តែខណៈពេលនោះ ក៏មានស្ត្រីជាកម្មករសំណង់ម្នាក់បានភ្ញាក់ដឹងខ្លួន និងឃើញជនសង្ស័យទាន់ក៏ស្រែកឆោឡោ បង្កឲ្យមានការភ្ញាក់ផ្អើលដល់កម្មករផ្សេងទៀតតែម្តង។
មេជាងខាងលើបន្តទៀតថា ភ្លាមៗនោះ ជនសង្ស័យក៏បានទម្លាក់ប៉ុសផ្សារដែកនោះចុះ រួចព្យាយាមរត់គេចខ្លួនចេញពីកន្លែងកើតហេតុ តែត្រូវបានកម្មករប៉ុន្មាននាក់រត់ដេញតាមពីក្រោយនិងស្រែកថា «ចោរៗ» រហូតអាចស្ទាក់ចាប់បាននៅផ្សារ៧មករាភ្លាមៗ និងមានប្រជាពលរដ្ឋក្បែរនោះបានចេញមកជួយស្វាគមន៍ម្នាក់មួយដៃមួយជើងឡើងទ្រោមខ្លួនតែម្តងទៅ។
បច្ចុប្បន្ន ជនសង្ស័យ រួមទាំងវត្ថុតាង ត្រូវបានសមត្ថកិច្ចនាំខ្លួនយកទៅប៉ុស្តិ៍នរគបាលរដ្ឋបាលបឹងកក់ទី២ ដើម្បីធ្វើការសាកសួរ និងចាត់ការទៅតាមនីតិវិធីច្បាប់៕
ចែករំលែកព័តមាននេះ