ភ្នំពេញ៖ «អបអរសាទរ ក្រុមជម្រើសជាតិកម្ពុជា រកបាន ៣ពិន្ទុពេញ ពីការប្រកួតបើក​ឆាកពានរង្វាន់ AFF Mitsubishi Electric Cup 2022 ពូល A ក្រោយយកឈ្នះក្រុមជម្រើសជាតិ​ហ្វីលីពីន ៣-២ មុននេះបន្ដិច នៅពហុកីឡដ្ឋានជាតិមរតកតេជោ​។ ជូនពរកីឡាករជាតិកម្ពុជា ទទួល​បាននូវ​ភាពជោគជ័យជាបន្តបន្ទាប់ទៀត»។ នេះជាសារ​បង្ហោះ​ក្នុងបណ្តាញសង្គម​ហ្វេសប៊ុក និងតេឡេក្រាមរបស់សម្តេចតេជោ នាយករដ្ឋមន្ត្រី ហ៊ុន សែន នៅយប់ថ្ងៃទី២០ ខែធ្នូ ឆ្នាំ២០២២ អមដោយ​រូបថត​ជាច្រើន​សន្លឹក។

សូមរម្លឹកថា ក្នុងការប្រកួត​បាល់ទាត់ បើកឆាកពូល A នៃពានរង្វាន់ AFF Mitsubishi Electric Cup 2022 កាលពីម៉ោង ៥ល្ងាច ថ្ងៃទី២០ ខែធ្នូ ឆ្នាំ២០២២ នៅពហុកីឡដ្ឋានជាតិ មរតកតេជោ ក្នុងរាជធានីភ្នំពេញ គឺ​ក្រុម​ជម្រើសជាតិបាល់ទាត់កម្ពុជា ទទួលបានជ័យជម្នះ ៣-២ លើក្រុមជម្រើសជាតិបាល់ទាត់ ហ្វីលីពីន។

៣គ្រាប់របស់កម្ពុជា ទាត់​បញ្ចូលទី ដោយកីឡាករ រឹង ប៊ុនហៀង នៅនាទីទី១៦។ អ៊ន ចាន់ប៉ូលីន នៅនាទីទី២០ និង១គ្រាប់ទៀត តែតបញ្ចូល​ទីដោយកីឡាករ រឹង ប៊ុនហៀង នៅនាទីទី៥៩។

ការប្រកួត​ពានរង្វាន់ AFF Mitsubishi Electric Cup 2022 ធ្វើឡើង ចាប់ពីថ្ងៃទី២០ ខែធ្នូ ឆ្នាំ២០២២ ដល់ថ្ងៃទី១៦ ខែមករា ឆ្នាំ ២០២៣។

កម្ពុជា ​ស្ថិត​ក្នុង​ពូល A ដែលរួមមាន៖ កម្ពុជា ​ហ្វីលីពីន ឥណ្ឌូនេស៊ី ប្រ៊ុយណេ និង​ថៃ។ ​ចំណែកពូល B មាន៖ វៀតណាម ម៉ាឡេស៊ី សិង្ហបុរី មីយ៉ាន់ម៉ា និងឡាវ។

តាមកម្មវិធី ដែលបានគ្រោងទុក បន្ទាប់ពីឈ្នះ​ហ្វីលីពីន ​នៅ​ថ្ងៃ​ទី​២០ ខែ​ធ្នូនេះ កម្ពុជា ត្រូវជួប​ឥណ្ឌូណេស៊ី នៅ​ថ្ងៃទី២៣ ខែធ្នូ វេលាម៉ោង ៤:៣០នាទីល្ងាច នៅពហុកីឡដ្ឋាន Gelora Bung Kamo Stadium ទីក្រុង Jakarta។ កម្ពុជា ជួប​ប្រ៊ុយណេ នៅថ្ងៃទី២៩ ខែធ្នូ វេលាម៉ោង ៥:០០នាទីល្ងាច នៅពហុកីឡដ្ឋានជាតិមរកតតេជោ រាជធានីភ្នំពេញ។ កម្ពុជា ជួប ថៃ ថ្ងៃទី០២ ខែមករា វេលាម៉ោង ៧:៣០នាទីយប់ នៅ​ពហុកីឡដ្ឋាន Thammasat Stadium ទីក្រុងបាងកក។

​​​ការប្រកួត​ពានរង្វាន់ AFF Championship ដែលមានប្រទេសអាស៊ាន ទាំង ១០ចូលរួម ត្រូវ​បាន​ធ្វើ​ឡើង​​រៀងរាល់​ពីរ​ឆ្នាំ​ម្តង។ កាលពីលើកមុន ថៃ​ជា​ម្ចាស់​ជើងឯកពានរង្វាន់ AFF Championship៕