E-Sportsត្រៀមបញ្ជូនក្រុមBurn X Flashតំណាងឱ្យកម្ពុជាទៅចូលរួមប្រកួតក្នុងកម្មវិធីលំដាប់ថ្នាក់ពិភពលោកនាដើមឆ្នាំ២០២៣
- ភ្នំពេញ
រាជធានីភ្នំពេញ ៖ ក្រុមកីឡាអេឡិចត្រូនិកតំណាងកម្ពុជា Burn X Flash នឹងទៅចូលរួមប្រកួតកីឡាអេឡិចត្រូនិកកម្រិតពិភពលោក M4 World Championship ហៅកាត់ M4 សម្រាប់វិញ្ញាសា Mobile Legends: Bang Bang ដែលរៀបចំឡើងនៅប្រទេសឥណ្ឌូណេស៊ី។
ការប្រកួតក្នុងព្រឹត្តិការណ៍លំដាប់ពិភពលោកនេះត្រូវបានបែងចែកជាពីរដំណាក់កាលគឺវគ្គ
សន្សំពិន្ទុក្នុងពូល ចាប់ពីថ្ងៃទី១ ដល់ទី៤ ខែមករា និងវគ្គចាញ់ធ្លាក់ ឈ្នះឡើងរហូតដល់វគ្គផ្តាច់
ព្រ័ត្រ ចាប់ពីថ្ងៃទី៧ ដល់ទី១៧ ខែមករា ឆ្នាំ២០២៣ ។ ព្រឹត្តិការណ៍អន្តរជាតិនេះមានក្រុមចំនួន១៦មកពីប្រទេសផ្សេងៗទូទាំងពិភពលោក និងត្រូវបានបែងចែកជា៤ពូល ហើយក្នុង១ពូលមាន៤ក្រុម។ ដោយឡែកសម្រាប់ក្រុមកម្ពុជា Burn X Flash ស្ថិតនៅក្នុង A ដែលមានក្រុមខ្លាំងៗដូចជា Blacklist International របស់ប្រទេសហ្វីលីពីន ជាក្រុមការពារតំណែងជើងឯកឆ្នាំចាស់ ក្រុម Falcon Esports ជាជើងខ្លាំងរបស់ប្រទេសមីយ៉ាន់ម៉ា និងក្រុម Incendio Supremacy របស់តួកគី។
សម្រាប់ព្រឹត្តិការណ៍នេះ មានប្រាក់រង្វាន់សរុបចំនួន៨០ម៉ឺនដុល្លារអាមេរិក ដែលមានការបែង
ចែកប្រាក់រង្វាន់ទាំងនេះទៅតាមចំណាត់ថ្នាក់ចាប់ពីលេខ១ ដល់លេខ១៦។
វគ្គសន្សំពិន្ទុក្នុងពូល
-ពូល A៖ Blacklist International (ហ្វីលីពីន), Burn X Flash (កម្ពុជា), Falcon Esports (មីយ៉ាន់ម៉ា) និង Incendio Supremacy (តួកគី)។
-ពូល B៖ Malvinas Games (អាហ្សង់ទីន), MDH Esports (វៀតណាម), ONIC Esports (ឥណ្ឌូណេស៊ី) និង TODAK (ម៉ាឡេស៊ី)។
-ពូល C៖ ECHO (ហ្វីលីពីន), Occupy Thrones (អេហ្ស៊ីប), RRQ Hoshi (ឥណ្ឌូណេស៊ី), និង RSG Singapore (សិង្ហបុរី)។
-ពូល D៖ RRQ Akira (ប្រេស៊ីល), S11 Gaming Angentina (បូឡាវី), Team HAQ (ម៉ាឡេស៊ី), និង The Valley (អាមេរិកខាងជើង)។
កាលពីឆ្នាំ២០២១ ដែលជាព្រឹត្តិការណ៍ M3 ឆ្នាំ២០២១ រៀបចំការប្រកួតនៅប្រទេសសិង្ហបុរី ក្រុមកម្ពុជា See You Soon ធ្វើបានល្អដែរ ដោយទទួលបានចំណាត់ថ្នាក់លេខ៩ ក្នុងចំណោម១៦ក្រុម ដោយទទួលបានប្រាក់រង្វាន់១៥០០០ដុល្លារអាមេរិក ។ ដូច្នេះសម្រាប់ការទៅចូលរួមលើកនេះសង្ឃឹមថា ក្រុមកីឡាអេឡិចត្រូនិកកម្ពុជានឹងធ្វើបានល្អ ក្រោយពីទទួលបានជ័យជម្នះនៅលើឆាកអន្តរជាតិជាបន្តបន្ទាប់កាលពីពេលថ្មីៗមកនេះ ៕
ចែករំលែកព័តមាននេះ