ការប្រកួតកីឡាទោចក្រយានថ្នាក់ជាតិ ធ្វើឱ្យកីឡាករកាន់តែមានភាពរីកចម្រើនត្រៀមឆ្ពោះទៅស៊ីហ្គេម២០២៣
- ភ្នំពេញ
រាជធានីភ្នំពេញ ៖ នាថ្ងៃទី១៩ ខែធ្នូ ឆ្នាំ ២០២២ សហព័ន្ធកីឡាទោចក្រយានកម្ពុជា បានធ្វើសន្និសីទសារព័ត៌មានស្តីពីការរៀបចំការប្រកួតកីឡាទោចក្រយានជ្រើសរើសជើងឯកថ្នាក់ជាតិ ឆ្នាំ២០២២ ដែលនឹងប្រព្រឹត្តទៅនៅខេត្តសៀមរាប នាថ្ងៃទី២៦-២៨ ខែធ្នូ ឆ្នាំ២០២២ ។
លោក នូ ចំរើន អគ្គលេខាធិការសហព័ន្ធកីឡាទោចក្រយានកម្ពុជារំពឹងថា ព្រឹត្តិការណ៍ថ្នាក់ជាតិមួយនេះនឹងធ្វើឲ្យអត្តពលិកកាន់តែមានការរីកចម្រើនទាំងកាយសម្បទា បច្ចេកទេសឆ្ពោះទៅដណ្ដើមមេដាយស៊ីហ្គេមឆ្នាំ២០២៣ដែលកម្ពុជាទទួលធ្វើជាម្ចាស់ផ្ទះ។
លោកអគ្គលេខាធិការរូបនេះបានប្រាប់ឲ្យដឹងថា ការប្រកួតថ្នាក់ជាតិនេះមានប្រតិភូ គ្រូបង្វឹក កីឡាករ-កីឡាការិនីចុះឈ្មោះប្រកួតសរុបមានចំនួន២៥២នាក់ មកពី១៨ ក្លិប សមាគម រាជធានី ខេត្ត ហើយបើបូករួមទាំងមន្ត្រីគណៈកម្មការបច្ចេកទេស និងអ្នកស្ម័គ្រចិត្តទៀតមានចំនួនសរុបចន្លោះពី៥៥០នាក់ ដល់៦០០នាក់ ដើម្បីឲ្យដំណើរការប្រកួតនេះមានភាពរលូនបាន។ ក្រៅពីការប្រកួតក៏មានការរត់កម្សាន្តចម្ងាយ៣គីឡូម៉ែត្រក្នុងនោះមានកីឡាករ និងក្រុមគណៈកម្មការចំនួន៣៥០នាក់ ។
តាមពិតចំនួនក្លិប សមាគមជាសមាជិករបស់សហព័ន្ធមានច្រើនជាងនេះ ប៉ុន្តែដោយសារលទ្ធភាពនៃការរៀបចំ និងបញ្ហាជំងឺ COVID-19 បូកផ្សំផងទៀតនោះ យើងព្យាយាមកាត់បន្ថយចំនួនកីឡាករចូលរួម។ លោកសង្ឃឹមថា ការប្រកួតនាពេលខាងមុខឆាប់ៗនេះ នឹងមានការចូលរួមពីក្លិប សមាគម រាជធានី ខេត្ត ក្រុងច្រើនជាងនេះ ។
ឆ្នាំនេះ ព្រឹត្តិការណ៍នៃការប្រកួតរបស់យើងមានការចូលរួមពីក្លិបម៉ូតូធំ BMW ជួយសម្រួលការប្រកួតវិញ្ញាសាកង់គួកដែលពួកគាត់សុទ្ធតែជាកីឡាករម៉ូតូដែលមានកម្រិតជំនាញខ្លាំង ព្រមទាំងសមត្ថភាព និងបទពិសោធន៍ខ្ពស់ ធ្លាប់ចូលរួមរៀបចំព្រឹត្តិការណ៍ប្រណាំងកង់ពិភពលោក ដែលកម្ពុជាធ្វើជាម្ចាស់ផ្ទះកាលពីដើមឆ្នាំ២០២០ និងការប្រកួតថ្នាក់ជាតិ និងកីឡាជាតិលើកទី៣ ឆ្នាំ២០០២ រួចមកហើយ។
លោក នូ ចំរើន បន្ថែមទៀតថា គោលដៅនៃការរៀបចំព្រឹតិ្តការណ៍ប្រកួតជើងឯកថ្នាក់ជាតិ ឆ្នាំ២០២២ មានចំនួន២ គឺទី១ អនុវត្តតាមផែនការយុទ្ធសាស្ត្ររបស់សហព័ន្ធ ដោយមានការឯកភាព និងណែនាំពីឯកឧត្តម ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម និងជាប្រធានសហព័ន្ធ បានដាក់ចេញឲ្យយើងត្រូវពង្រឹងសមត្ថភាពគណៈកម្មការបច្ចេកទេស និងគណៈកម្មការរៀបចំការប្រកួត ក្នុងដំណើរឈានទៅទទួលរៀបចំធ្វើជាម្ចាស់ផ្ទះ ការប្រកួតកីឡា SEA GAMES លើកទី៣២ ឆ្នាំ២០២៣ ក៏ដូចជាការប្រកួតកីឡាទោចក្រយានលើឆាកអន្តរជាតិផ្សេងៗទៀត នាពេលខាងមុខ។
ទី២ គោលដៅសំខាន់របស់សហព័ន្ធនោះ គឺតាមរយៈការប្រកួតនេះ នឹងមានការចូលរួមពីកីឡាករ-កីឡាការិនីពីគ្រប់រាជធានីខេត្តនៅកម្ពុជា ក៏ដូចជាបានផ្ដល់ឱកាសដល់ពួកគាត់ក្នុងការបង្ហាញនូវ
ទេពកោសល្យ ចំណេះ និងជំនាញ ។ ដូច្នេះការប្រកួតនេះក៏ដូចជាបានបង្ហាញពីការវិវឌ្ឍសមត្ថភាព និងកម្រិតបច្ចេកទេសរបស់ពួកគាត់ផងដែរ។
សម្រាប់សហព័ន្ធខ្មែរកីឡាទោចក្រយានកម្ពុជាយើងកំពុងតែស្វែងរកធនធានកីឡាករ-កីឡាការិនី ដែលមានសមត្ថភាព ដើម្បីបញ្ចូល ក្នុងក្រុមជម្រើសជាតិ ។ ហេតុដូចនេះ មន្ត្រីបច្ចេកទេសរបស់សហព័ន្ធតែងតែសំឡឹងមើលលើទេពកោសល្យរបស់ពួកគាត់ជារៀងរាល់ឆ្នាំតាមរយៈការប្រកួតជើងឯកថ្នាក់ជាតិ ជាព្រឹត្តិការណ៍ប្រកួតកម្រិតជាតិខ្ពស់ និងធំជាងគេប្រចាំឆ្នាំ ដើម្បីត្រៀមបញ្ចូលក្នុងបញ្ជីឈ្មោះកីឡាករត្រូវទៅចូលរួមការប្រកួតកីឡា SEA GAMES លើកទី៣២ ឆ្នាំ២០២៣ នៅកម្ពុជានាពេលឆាប់ៗខាងមុខ ៕
ចែករំលែកព័តមាននេះ