ក្នុងអំឡុងពេល៦ខែចុងឆ្នាំ២០២២ នេះ ប្រភពធ្លាយចេញពីសាលាខេត្តកោះកុង បានអោយដឹងថា នៅក្នុងអាណាចក្រដែលដឹកនាំដោយលោកស្រី មិថុនា ភូថង ឃើញថា មានការក្រឡាប់ចក្រ នៃការផ្លាស់ប្តូរមន្ត្រីរាជការជាច្រើនស្ថាប័នយ៉ាងតក់ក្រហល់ និងស្តែងចេញអោយឃើញ
ខេត្តកោះកុង ៖ ក្នុងអំឡុងពេល៦ខែចុងឆ្នាំ២០២២ នេះ ប្រភពធ្លាយចេញពីសាលាខេត្តកោះកុង បានអោយដឹងថា នៅក្នុងអាណាចក្រដែលដឹកនាំដោយលោកស្រី មិថុនា ភូថង ឃើញថា មានការក្រឡាប់ចក្រ នៃការផ្លាស់ប្តូរមន្ត្រីរាជការជាច្រើនស្ថាប័នយ៉ាងតក់ក្រហល់ និងស្តែងចេញអោយឃើញពីភាពរើសអើង សង្ស័យនិយមបក្សពួកយ៉ាងច្បាស់ក្រឡែត។ ហើយការផ្លាស់ប្តូរមន្ត្រីបក្សពួកនោះទៀតសោត បានធ្វើអោយប៉ះពាល់ដល់ក្រមសីលធម៌ ឋានានុក្រម និងលក្ខន្តិកៈមន្ត្រីរាជការចាប់តាំងពីថ្នាក់មូលដ្ឋាន រហូតដល់ថ្នាក់ជាតិ ។
មិនតែប៉ុណ្ណោះ ការឃុបឃិតជិះជាន់កៀបសង្កត់ប្រជាពលរដ្ឋក្រីក្រ ទន់ខ្សោយ បង្កការឈឺចាប់ រងទុក្ខវេទនាដល់ប្រជារាស្ត្រម្ចាស់ឆ្នោតគ្រប់មូលដ្ឋាន។ ក្នុងរយៈពេល៦ខែចុងក្រោយនេះ គេឃើញនៅគ្រប់ស្រុកទូទាំងខេត្ត មានការផ្លាស់ប្តូរតាំងពីមន្ត្រីមូលដ្ឋាន ហូតដល់ចៅហ្វាយស្រុក ចៅហ្វាយខេត្តរង ស្តែងអោយឃើញពីការប្រកាន់បក្សពួកងា.យស្រួលបង្កលក្ខណៈអោយមានការឃុបឃិតជាប្រព័ន្ធ ផុសចេញនូវរូបភាពពុករលួយមិនអាចប្រកែកបានឡើយ។
ជាក់ស្តែងនៅក្នុងខេត្តកោះកុង ស្រុកណាក៏មានការលួចកា.ប់ព្រៃកោងកាង លួចបូមខ្សាច់ចាក់លុបរំលោ.ភយកដីឆ្នេរសមុទ្រ ដីចំណីព្រែក មកធ្វើជាកម្មសិទ្ធិ លួចជីកកកាយដីភ្នំយកអាចម៌ដីលក់ លួចយកទីតាំងដីរដ្ឋធ្វើអាជីកម្មបំរើផលប្រយោជន៍សួនតួ និងដកតួនាទីមន្ត្រីចាស់ៗបញ្ឈរជើងដូចសំរាម។
ជាក់ស្តែងមន្ត្រីភូមិបាលស្រុកមួយរូប ត្រូវបានអាជ្ញាធរស្រុកឃុបឃិតជាមួយអាជ្ញាធរខេត្ត និងមន្ត្រីក្រសួងមុខងារសាធារណៈស្នើសុំដកមុខតំណែងពីប្រធានការិយាល័យភូមិបាលស្រុកបុទុមសាគរ២លើក ដោយគ្មានកំហុស មិនដឹងថា ក្រសួងមុខងារសាធារណៈយល់ឃើញយ៉ាងដូចម្តេច បានជាក្នុងរយៈពេលមិនដល់១ខែផង ក្រសួងចេញលិខិតផ្ទួនៗគ្នា២ដង តែមានខ្លឹមសារផ្ទុយគ្នា គឺលើកទី១ លិខិតលេខ៤៧១.លស ចុះថ្ងៃទី១៧ ខែសីហា ២០២២ របស់អាជ្ញាធរខេត្ត សុំទៅក្រសួងមុខងារសាធារណៈ ដើម្បីផ្លាស់ប្តូរលោក ពៅ ច័ន្ទថន ចេញពីមន្ត្រីភូមិបាលស្រុកបុទុមសាគរ អោយទៅនៅសាលាស្រុកកោះកុង ប៉ុន្តែក្រសួងមុខងារសាធារណៈបានចេញលិខិតលេខ៥១៥៥/២២ មស.តផ ចុះថ្ងៃទី២៧ ខែតុលា ឆ្នាំ២០២២ ជំរាបជូនទៅអាជ្ញាធរខេត្តវិញថា «ស្នើរក្សាស្ថានភាពចាស់ដដែល» ។
ប៉ុន្តែបន្ទាប់ពីក្រសួងស្នើបែបនេះ បានរយៈពេលតែ២០ថ្ងៃ អាជ្ញាធរស្រុកបុទុមសាគរ បានចេញលិខិតលេខ១៦៤/២២លស ចុះថ្ងៃទី១៧ ខែវិច្ឆិកា ឆ្នាំ២០២២ ស្នើទៅក្រសួងសុំផ្លាស់ប្តូរមន្ត្រីឈ្មោះ ពៅ ច័ន្ទថន ម្តងទៀត។ តែម្តងនេះ អ្វីៗបានក្រឡាប់ចាក់លឿនដូចរន្ទះ សំណើររបស់ចៅហ្វាយស្រុក ចូលដល់ក្រសួង មិនបាន៤៨ម៉ោងស្រួលបួលផង ក្រសួងមុខងារបានចេញលិខិតលេខ៥៥៣៥/២២ មស.តផ ចុះថ្ងៃទី១៨ ខែវិច្ឆិកា ឆ្នាំ២០២២ ដកលោក ពៅ ច័ន្ទថន បានសំរេចតាមផែនការ និងទិសដៅពីប្រធានភូមិបាលស្រុកបុទុមសាគរ អោយទៅទាត់ខ្យល់នៅសាលាស្រុកកោះកុងតែមួយប៉ប្រិចភ្នែក (២០ថ្ងៃ) ហើយអាជ្ញាធរស្រុក ក៏បានភ្ជាប់ក្នុងសំណើរតែមួយ ស្ទូចយកបក្សពួករបស់ខ្លួនពីមន្ត្រីរដ្ឋបាល នៃសាលាខណ្ឌដង្កោ រាជធានីភ្នំពេញ មកដាក់ជំនួសតំណែងលោក ពៅ ច័ន្ទថន យ៉ាងត្រជាក់មេជើង។
តាមប្រភពពីក្រុមអ្នកតាមដានព្រឹត្តិការណ៍ក្រឡាប់ចក្ររបស់សាលាខេត្តកោះកុង បានអះអាងថា បច្ចុប្បន្នក្រសួងមហាផ្ទៃបានធ្វើប្រតិភូកម្មអំណាចពីថ្នាក់ខេត្ត ទៅថ្នាក់ស្រុកអស់ហើយ និង អភិបាលគ្រប់ស្រុកសុទ្ធសឹងជាមនុស្សរបស់ចៅហ្វាយខេត្តរៀបចំទៅ ហេតុនេះទើបអភិបាលស្រុកទាំងអស់ក្នុងខេត្ត អាចធ្វើព្យុះធ្វើភ្លៀងបានតាមអំពើចិត្ត ជាក់ស្តែងដូចជាស្រុកកោះកុង គ្មានពលរដ្ឋណាម្នាក់អាចទទួលបានប័ណ្ណកម្មសិទ្ធិដីធ្លីបានឡើយ ដរាបណាគ្មានការបញ្ជាពីអភិបាលស្រុកទៅមន្ត្រីសុរិយោដីអោយចុះវាស់វែង ខុសប្លែកពីស្រុកនានានៅក្នុងខេត្តកោះកុង ក៏ដូចជានៅទូទាំងប្រទេស ដែលអាទិភាពផ្តល់ប័ណ្ណកម្មសិទ្ធិជូនពលរដ្ឋ ស្ថិតតែនៅលើអាជ្ញាធរមូលដ្ឋាន និងមន្ត្រីជំនាញភូមិបាលតែប៉ុណ្ណោះ ។
អស្ចារ្យជាងនេះទៀត អភិបាលស្រុកកោះកុង ហ៊ានផ្អាកការងារមន្ត្រីជំនាញដែលមានឋានៈជាប្រធាន និងអនុប្រធានភូមិបាល មិនអោយធ្វើការងារជំនាញបំរើប្រជាពលរដ្ឋឡើយ ហើយយកមន្ត្រីជាប់កិច្ចសន្យាដែលត្រូវជាកូនក្មួយរបស់ខ្លួនមកធ្វើការជំនួសទៅវិញ។ ថ្មីៗនេះតំណែងស្មៀនឃុំចំនួន៣ឃុំ លោកអភិបាលស្រុកកំពុងស្នើសុំផ្លាស់ប្តូរ ក្រោយការបោះឆ្នោតឃុំសង្កាត់រួច ដែលមន្ត្រីស្មៀនទាំង៣រូបនោះតាមអ្នកភូមិនិយាយថា ពុំធ្លាប់មានកំហុសរដ្ឋបាលសោះ។
ពលរដ្ឋនៅខេត្តកោះកុងជាច្រើនមូលដ្ឋាន បានសម្ដែងការខកចិត្ត ដោយលើកឡើងថា ពួកគាត់ពិតជាមានការឈឺចាប់ និងសោកស្តាយបំផុតពេលដែលឃើញអ្នកជាប់ឆ្នោត មិនបានប្រតិបត្តិតាមការសន្យាថានឹងបំរើសេចក្តីត្រូវការជូនម្ចាស់សន្លឹកឆ្នោតវិញយ៉ាងដូច្នេះ។
ព័ត៌មានពិស្តារនឹងមានផ្សាយជូននៅលើកាសែតកោះសន្តិភាព។
ចែករំលែកព័តមាននេះ