ខេត្តប៉ៃលិន ៖ គ្រាន់តែស្តាប់សម្តីស្ត្រីក្រីក្រវ័យក្មេងម្នាក់រៀបរាប់ស្ទើរខ្លោចចិត្ត ខណ:នាងមានការហួសចិត្តយ៉ាងខ្លាំងនឹងខាងពន្ធនាគារខេត្តប៉ៃលិន ដោយប្តីនាងតែងតែពោលប្រាប់ថា ស្ពឹកដៃជើង ឈឺចុកចាប់ក្នុងក្រពះពោះវៀន ដើរលែងរួចត្រូវគេទុកឱ្យនៅឈឺនៅក្នុងកន្លែងពន្ធនាគាររហូតដល់ប្តីនាងឈឺធ្ងន់ទើបគេបញ្ជូនទៅសង្គ្រោះនៅមន្ទីរពេទ្យបង្អែកខេត្ត ហើយក្រោយពេលប្តីស្លា.ប់ទើបគេទៅប្រាប់ឱ្យយកស.ពប្តីធ្វើបុណ្យតែម្តង។
ហេតុការណ៍ស្ត្រីវ័យក្មេងក្រីក្រម្នាក់រៀបរាប់ពីបញ្ហាប្តីខ្លួនស្លា.ប់ ដោយមិនទាន់ដង្ហើមនេះបានកើតឡើង នៅព្រឹកថ្ងៃទី១៧ ខែធ្នូ ឆ្នាំ២០២២ ស្ថិតនៅក្នុងទីធ្លាវត្តពោធិ៍មារាម ហៅវត្តប៉ាហ៊ី ក្នុងភូមិប៉ាហ៊ីត្បូង សង្កាត់ប៉ៃលិន ក្រុងប៉ៃលិន ខេត្តប៉ៃលិន ជាកន្លែងតម្កល់ស.ពប្តីរបស់នាងបណ្តោះអាសន្នមុនបូជា។
បើតាមប្រភពព័ត៌មានបានឱ្យដឹងថា ៖ ស.ពបុរសរងគ្រោះដែលស្លា.ប់ក្នុងមន្ទីរពេទ្យបង្អែកខេត្តប៉ៃលិនមានឈ្មោះ រ៉េត ណារ៉ាត់ ភេទប្រុស អាយុ២៩ឆ្នាំ ជាទណ្ឌិត មានប្រពន្ធ ឈ្មោះ ថឹង ណេង អាយុ៣០ឆ្នាំ មុខរបរដើរលក់នំផ្គត់ផ្គង់គ្រួសារ មានកូន៥នាក់ ក្នុងបន្ទុក ប្រុស៣នាក់ ស្រី២នាក់ កូនទី១ អាយុ៩ឆ្នាំ និងកូនពៅទី៥. អាយុ១ឆ្នាំកន្លះ បច្ចុប្បន្នជួលផ្ទះគេស្នាក់នៅក្នុងភូមិប៉ាហ៊ីជើង សង្កាត់ប៉ៃ លិន ក្រុងប៉ៃលិន ខេត្តប៉ៃលិន។
បើតាមប្រភពព័ត៌មានពីស្ត្រីវ័យក្មេងក្រីក្រឈ្មោះ ថឹង ណេង បានយំបណ្តើររៀបរាប់បណ្តើរទាំងមានទឹកភ្នែកហូររហាមដៃទាំងពីរបានបីកូនតូចឈរនៅខាងមុខម្ឈូសស.ពប្តីរៀបរាប់ឱ្យដឹងថា ៖ ប្តីរបស់នាងបានជាប់ពន្ធនាគារខេត្តប៉ៃលិនអស់រយ:ពេលជិត១ឆ្នាំមកហើយ ដោយពាក់ព័ន្ធនឹងករណីគ្រឿងញៀ.ន។
នាងបន្តទៀតទាំងអួលដើមក.ថា ៖ កាលពីខែសីហា ឆ្នាំ២០២២នេះ ប្តីរបស់នាងបានប្រាប់ថា រូបគេកើតមានបញ្ហាជំងឺរមាស ឈឺចុកចាប់ក្នុងខ្លួន ស្ពឹកដៃជើង ហើយគ្មានលុយទិញអ្វីហូបឡើយ រូបគេឃ្លានណាស់ ជាពិសេស គឺឈឺចុកឆ្អល់ខ្លាំង នៅក្នុងក្រពះពោះវៀន ហើយបើសិនជានាងមានថវិកា សូមឱ្យជួយទិញថ្នាំឱ្យប្តីលេបផង។ តែនាងបានឆ្លើយថា គ្មានលុយកាក់អ្វីច្រើនទេ ព្រោះរាល់ថ្ងៃនាងដើរលក់នំ យកមកផ្គត់ផ្គង់ឪពុកវ័យចំណាស់ និងកូនតូចៗស្ទើរតែមិនគ្រប់។
នាងបន្ថែមទៀតថា ក្រោយមកនាងបានសុំគេចូលទៅមើលប្តីរបស់ខ្លួន ឃើញសភាពប្តីកាន់តែទ្រុឌទ្រោម ដោយមិនអាចជួយអ្វីបានឡើយ ហើយគេមិនអាចឱ្យចេញមកក្រៅ ដើម្បីព្យាបាលជំងឺនោះទេ ព្រោះខាងអនុរក្សពន្ធនាគារប្រាប់ថា ទាល់តែអ្នកជំងឺធ្ងន់ធ្ងរខ្លាំង ទើបគេអនុញ្ញាតឱ្យយកអ្នកជំងឺមកព្យាបាលខាងក្រៅ។
លុះដល់ព្រឹកថ្ងៃទី១៦ ខែធ្នូ ឆ្នាំ២០២២នេះ ស្រាប់តែមាននគរបាលប្រាប់នាងឱ្យប្រញាប់ទៅយកស.ពនៅមន្ទីរពេទ្យបង្អែកខេត្តប៉ៃលិន ដើម្បីធ្វើបុណ្យដែលពិតជាធ្វើឱ្យនាងមានការហួសចិត្តយ៉ាងខ្លាំងខណ:ប្តីរបស់ខ្លួនឈឺធ្ងន់មិនដឹង ហើយមិនទាន់ដង្ហើម។
ទោះបីជាយ៉ាងណា នៅរសៀលថ្ងៃទី១៧ ខែធ្នូ ឆ្នាំ២០២២នេះ ស.ពប្តីរបស់នាងនឹងត្រូវគេយកទៅបូជានៅវត្តរតនសោភ័ណ ហៅវត្តកោងកាង ខណ:ខ្វះខាតថវិកា ដើម្បីរៀបចំធ្វើបុណ្យឱ្យត្រឹមត្រូវ តែក៏បានប្រជាពលរដ្ឋអ្នកភូមិផងរបងជាមួយជួយរៃអង្គាសគ្នាបានមួយចំនួនផងដែរ។
ពាក់ព័ន្ធទៅនឹងបញ្ហានេះ លោកវេជ្ជបណ្ឌិត កឹម សំណាង ប្រធានមន្ទីរពេទ្យបង្អែកខេត្តប៉ៃលិន បានឱ្យដឹងថា ៖ ជនរងគ្រោះ មានបញ្ហាជំងឺម្យ៉ាង គឺមេរោគក្នុងគ្រា.ប់ឈា.មធ្ងន់ធ្ងរស៊ីសុះសាច់អស់ ខណ:គេបញ្ជូនពីពន្ធនាគារទៅដល់មន្ទីរពេទ្យបង្អែកខេត្ត គឺគាត់មានសភាពខ្លាំងបាត់ទៅហើយ ពោល គឺមិនអាចជួយសង្គ្រោះបាននោះទេ។
លោកវេជ្ជបណ្ឌិតបន្តទៀតថា លោកគ្រូពេទ្យបានខិតខំខ្វះខ្វែង ដើម្បីជួយសង្គ្រោះជនរងគ្រោះដែរ តែពិតជាមានការសោកស្តាយ។ ទោះបីជាយ៉ាងណា ភ្នាក់ងារយើងបានទាក់ទងទៅលេខទូរស័ព្ទរបស់លោក រ័ត្ន ទី ប្រធានពន្ធនាគារ ខេត្តប៉ៃលិន ដើម្បីបញ្ជាក់ពីបញ្ហាជំងឺរបស់ជនរងគ្រោះ និងសួរនាំពាក់ព័ន្ធការលើកឡើងរបស់ស្ត្រីជាប្រពន្ធ តែទាក់ទងចូលច្រើនលើកច្រើនសារ អត់មានអ្នកទទួលនោះឡើយ៕
ចែករំលែកព័តមាននេះ