ខេត្តបន្ទាយមានជ័យ ៖ មន្ត្រីនគរបាលម្នាក់ មានឋានន្តរសក្តិជាអនុសេនីយ៍ឯក បានស្លាប់យ៉ាងអាណោចអាធម្ម ក្នុងហេតុការណ៍គ្រោះថ្នាក់ចរាចរណ៍ ។ ហេតុការណ៍បង្កឲ្យមានការភ្ញាក់ផ្អើលនេះ បានកើតឡើងនៅវេលម៉ោង០៣និង៤៥នាទី ថ្ងៃទី១២ ខែមិថុនា ឆ្នាំ២០១៧ លើកំណាត់ផ្លូវជាតិលេខ៥ ចំណុចខាងលិចខ្លោងទ្វារវត្តសូរិយាប្រហែល៥០ម៉ែត្រ ស្ថិតក្នុងភូមិសូរិយា ឃុំកូប ស្រុកអូរជ្រៅ ខេត្តបន្ទាយមានជ័យ ។
លោកវរសេនីយ៍ត្រី សួន នីប៉ូ នាយរងការិយាល័យនគរបាលចរាចរណ៍ខេត្តបន្ទាយមានជ័យ បានឲ្យដឹងថា ៖ ជនរងគ្រោះឈ្មោះ ខុង វែង ភេទប្រុស អាយុ៤៦ឆ្នាំ មានទីលំនៅភូមិប្រជាធម្ម សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ មានតួនាទីជានាយផ្នែករដ្ឋបាល នៃការិយាល័យសុខាភិបាល នៃស្នងការដ្ឋាននគរបាលខេត្តបន្ទាយមានជ័យ ។ លោកនាយរងការិយាល័យចរាចរណ៍ បានបញ្ជាក់ថា ៖ នៅថ្ងៃទី១២ ខែមិថុនា ឆ្នាំ២០១៧ ជនរងគ្រោះបានវិលត្រលប់ពីធ្វើការទៅផ្ទះ ដោយធ្វើដំណើរដោយជិៈម៉ូតូម៉ាក Honda Dream ពណ៌ខ្មៅ ស៊េរី២០១៧ ពាក់ស្លាកលេខ ប.មានជ័យ ១Q-៥៩៥០ ពីទិសខាងកើតទៅលិច ដោយដឹកអង្ករដាក់ពីមុខម៉ូតូ១ការុង និងការបូបខ្មៅ១ពីមុខផងដែរ ។ ពេលទៅដល់កន្លែងកើតហេតុ ស្រាប់តែម៉ូតូជនរងគ្រោះបានរេទៅកណ្តាលផ្លូវ ឆ្លងចូលទៅខាងឆ្វេងដៃ ស្របពេលនោះ មានរថយន្តបែន១គ្រឿងច្នៃដឹកដីឬថ្ម ម៉ាក FUZU ពណ៌ស ពាក់ស្លាកលេខ តាកែវ ៣A-០៧៩៧ បើកបរដោយឈ្មោះ លន ជីវ័ន្ត ភេទប្រុស អាយុ២៥ឆ្នាំ នៅភូមិអូរអំបិល សង្កាត់អូរអំបិល ក្រុងសិរីសោភ័ណ បានធ្វើដំណើរច្រាសទិសគ្នា ពីលិចទៅកើត ម៉ូតូបានបុករថយន្តនៅខាងឆ្វេងដៃពេញទំហឹង បណ្តាលឲ្យជនរងគ្រោះបែកក្បាលធ្លាយខួរជាប់នឹងទ្រុងរថយន្តចំហៀងខាងស្តាំ រួចរថយន្តបានបន្តដំណើរមកដល់ទីរួមខេត្តបន្ទាយមានជ័យ ត្រូវបានកម្លាំងនគរបាលជំនាញចរាចរណ៍ខេត្តស្ទាក់ចាប់បាន នៅចំណុចភូមិគាប សង្កាត់ទឹកថ្លា ក្រុងសិរីសោភ័ណ នាំយកមករក្សាទុក ។ បើតាមការសន្និដ្ឋាន សង្ស័យម៉ូតូជាប់ដៃចង្កូតខាងឆ្វេងនឹងការុងអង្ករ ទើបទាញចង្កូតទៅបុករថយន្ត ។ តាមសម្ដីអ្នកបើកបរឈ្មោះ លន ជីវ័ន្ត បាននិយាយថា ៖ មុនពេលកើតហេតុ រូបគេបានបើករថយន្តដឹកថ្ម ពីភ្នំធំទៅសង្កាត់និមិត្ត ក្រុងប៉ោយប៉ែត ពេលត្រលប់មកវិញ ដល់កន្លែងកើតហេតុ គេឃើញនគរបាលជិៈម៉ូតូបានរេចង្កូតមករករថយន្តរបស់ខ្លួន ស្របពេលនោះ គេបានបើករថយន្តគេចមកខាងឆ្វេងដៃ ដើម្បឲ្យផុតម៉ូតូ តែមិនផុត ម៉ូតូបានបុកចំកង់រថយន្តខាងមុខផ្នែកខាងស្តាំ ហើយមនុស្សបានបោកក្បាលនឹងទ្រុងរថយន្តដួលទៅនឹងផ្លូវ ។
លោកវរសេនីយ៍ត្រី សួន នីប៉ូ នាយរងការិយាល័យបានបញ្ជាក់ថា ៖ សពជនរងគ្រោះបានប្រគល់ជួនក្រុមគ្រួសារចាត់ចែងយកទៅធ្វើបុណ្យតាមប្រពៃណី ចំណែកអ្នកបើកបររងយន្តរៀបចំសំណុំរឿងបញ្ជូនទៅសាលាដំបូងខេត្តបន្ទាយមានជ័យ ដើម្បីមានវិធានការតាមនិតិវិធីច្បាប់ ៕
ចែករំលែកព័តមាននេះ