ភ្នំពេញ៖ រថយន្តស្ទូច ១គ្រឿង បានបើកបរ ក្នុងល្បឿនលឿន ហើយពុំដឹងថា យ៉ាងម៉េចនោះទេ ស្រាប់​តែ​រេចង្កូត ឡើងលើចិញ្ចើមផ្លូវ ជ្រុលបុកចូល​ផ្ទះលក់គ្រឿងសមុទ្រ រួចចូលសំយ៉ាប​ផ្ទះលក់គ្រឿងក្រអូប​។ ហេតុការណ៍នេះ បណ្ដាលឲ្យបុរសម្នាក់ ដែលជាអ្នកគ្រឿងសមុទ្រ រងរបួសធ្ងន់ធ្ងរ។

ឧប្បត្តិហេតុនេះ បានកើតឡើង កាលពីវេលាម៉ោង ៣ និង ៤០នាទី រសៀល​ថ្ងៃទី១៥ ខែធ្នូ ឆ្នាំ២០២២ នៅតាមផ្លូវលេខ៤២ ស្ថិតនៅក្នុងភូមិត្រពាំងក្រសាំង សង្កាត់បឹងធំ ខណ្ឌកំបូល រាជធានី​ភ្នំពេញ។

រថយន្តបង្កខាងលើនោះ ពណ៌ស ពាក់ស្លាកលេខ ភ្នំពេញ 3C-1526 បើកបរដោយបុរស ពុំស្គាល់​អត្តសញ្ញាណម្នាក់។

អ្នកភូមិបាននិយាយថា នៅមុនពេលកើតហេតុ គាត់បានឃើញរថយន្តខាងលើ បើកបរ​ ក្នុងទិស​ដៅ​ពី​លិចទៅកើត ក្នុងល្បឿនលឿន លុះពេលទៅដល់ត្រង់ចំណុចកើតហេតុ ពុំដឹងថា អ្នកបើកបរ​ងងុយដេក ឬស្រវឹងស្រានោះទេ ស្រាប់តែរេចង្កូត ឡើងទៅលើចិញ្ចើមផ្លូវ។ បន្ទាប់មកបានបុក​ចូលផ្ទះលក់គ្រឿងសមុទ្រ បណ្ដាលឲ្យរងការខូចខាត ព្រមទាំងបណ្ដាលឲ្យបុរស ដែលជាអ្នក​លក់គ្រឿងសមុទ្រម្នាក់ រងរបួសធ្ងន់ធ្ងរ។

ប្រភពដដែល បាន​បន្តទៀតថា ពេលនោះ រថយន្ត​ពុំបានឈប់ស្ងៀមឡើយ ក៏ជ្រុលទៅបុកចូល​សំយ៉ាបផ្ទះលក់គ្រឿងក្រអូប នៅជិតនោះ បណ្ដាលឲ្យបាក់ និងខូចខាត​សម្ភារៈមួយចំនួនទៀត​។

ជាសំណាងដែរ ដោយសារតែមុនពេលកើតហេតុនោះ ពុំទាន់មានអ្នក​ទៅទិញគ្រឿងសមុទ្រច្រើន បើពុំនោះទេ នឹងមានអ្នករង​គ្រោះថ្នាក់ច្រើនមិនខាន។

ក្រោយកើតហេតុ អ្នកបើកររថយន្តស្ទួច ត្រូវបានអ្នកភូមិ នាំគ្នាឃាត់ខ្លួនបាន រួចប្រគល់ជូន​នគរបាល នាំទៅសាកសួរ។ រីឯអ្នករងរបួស ត្រូវបានក្រុមគ្រួសារ នាំយកទៅសង្រ្គោះបន្ទាន់។  នគរបាលខណ្ឌកំបូល បានទៅធ្វើការវាស់វែង និងនាំយករថយន្ត ទៅរក្សាទុក រង់ចាំការ​ដោះស្រាយ​៕ យន់ ស៊ីថា